Read ქართული ბიბლია, სრული ვერსია Proverbs 26 Bible Online

Proverbs 26 - ქართული ბიბლია, სრული ვერსია bible

Proverbs 26

¹ისევე, როგორც თოვლი ზაფხულისთვის და წვიმა მკისთვის, ასევე შეუფერებელია ბრიყვისთვის პატივი.

²ბეღურას გაფრენისა და მერცხლის ნავარდივით ასცდება კაცს უმიზეზო წყევლა.

³მათრახი — ცხენისთვის, ლაგამი — ვირისთვის, სახრე — ბრიყვისთვის.

⁴ნუ უპასუხებ ბრიყვს მისი სირეგვნისამებრ, რათა არ დაემსგავსო მას.

⁵უპასუხე ბრიყვს მისი სიბრიყვის შესაბამისად, თორემ თავი ბრძენი ეგონება.

⁶ვინც ბრიყვს აგზავნის მაცნედ, ფეხქვეშ მიწას იცლის და თავს გასაჭირში იგდებს.

⁷რაღა კოჭლის ფეხები და რაღა ბრიყვის ბაგეზე იგავი.

⁸ბრიყვისთვის პატივის მიგება იგივეა, რაც მიბმული ქვის შურდულით სროლა.

⁹რაღა ძეძვის ეკლიანი ჯოხი მთვრალის ხელში და რაღა იგავი ბრიყვის პირში.

¹⁰ბრიყვისა და გზად გამვლელის დამქირავებელი ჰგავს მოისარს, განურჩევლად ყველას რომ ესვრის.

¹¹როგორც ძაღლი უბრუნდება თავის ნარწყევს, ისე იმეორებს ბრიყვი თავის სისულელელეს.

¹²გინახავს კაცი, რომელსაც თავი ბრძენი ჰგონია? ბრიყვს მეტი ფასი აქვს, ვიდრე მას.

¹³ზარმაცი ამბობს: „ლომია გზაზე! ლომია ქუჩაში!“

¹⁴კარი თავის ანჯამაზე ბრუნავს, ზარმაცი — თავის საწოლზე.

¹⁵ზარმაცი ჯამში ჰყოფს ხელს, პირთან მიტანა კი ეზარება.

¹⁶საკუთარ თვალში ზარმაცი გონიერი პასუხების გამცემ შვიდ ბრძენზე ბრძენია.

¹⁷რაღა კაცი, რომელმაც ძაღლს ყურებში წაავლო ხელი და რაღა სხვის ჩხუბში ჩარეული.

¹⁸რაღა გიჟი, რომელიც ისვრის მუგუზლებს, ისრებს და სიკვდილს,

¹⁹და რაღა კაცი, რომელიც ატყუებს თვის მოყვასს და ამბობს: „გეხუმრეო.“

²⁰სადაც შეშა არ არის, ცეცხლი ქრება; სადაც ენის მიმტანი არ არის, შუღლს ბოლო ეღება.

²¹ნახშირი — ნაკვერცხლისათვის, შეშა — ცეცხლისათვის, შარიანი კაცი შუღლისათვის.

²²ენატანიას სიტყვები ნუგბარივითაა და მუცლის წიაღამდე აღწევენ.

²³როგორც წიდიანი ვერცხლი თიხის ჭურჭელზე, ისეა ფარისეველი ენა და ბოროტი გული.

²⁴ენით თავს მოაჩვენებს მტერი, გულში კი მზაკვრობა უდევს.

²⁵ნუ ენდობი მას, როცა ხმას ინაზებს, რადგან შვიდი სიბილწეა მის გულში.

²⁶თუმც სიძულვილს პირფერობით ფარავს, მისი ბოროტება კრებულში გამომჟღავნდება.

²⁷ვინც ორმოს თხრის, შიგ ჩავარდება, ვინც ქვას ზემოთ აისვრის, მასვე დაუბრუნდება.

²⁸ცრუ ენას სძულს თავისი მსხვერპლი და მლიქვნელი პირი დამხობას ამზადებს.