Read ქართული ბიბლია, სრული ვერსია Proverbs 28 Bible Online

Proverbs 28 - ქართული ბიბლია, სრული ვერსია bible

Proverbs 28

¹ბოროტნი მაშინაც გარბიან, როცა არავინ მისდევთ; მართალნი კი ლომივით უშიშარნი არიან.

²ამბოხის დროს მმართველები მრავლდებიან, ხოლო გონიერ და მცოდნე კაცთა ხელში ხანგრძლივი სტაბილობაა.

³ღატაკი, რომელიც ჩაგრავს ღატაკს, წვიმის თქეშია, ნათესს რომ სპობს.

⁴რჯულის დამტოვებელნი უღვთოს აქებენ, რჯულის დამცველნი კი ებრძვიან ურჯულოს.

⁵ბოროტთ არ ესმით, რა არის სამართალი, უფლის მაძიებელთ კი ყველაფერი იციან.

⁶თავისი სიმართლით მავალი ღარიბი სჯობს მრუდე გზით მავალ მდიდარს.

⁷რჯულის დამცველი გონიერი ძეა; ხარბებთან დამეგობრებული კი მამის შემარცხვენელია.

⁸ვინც ქონებას ვახშითა და სარგებლით იმრავლებს, ღატაკთა მწყალობლისთვის აგროვებს მას.

⁹ვინც რჯულის მოსმენას ყურს არიდებს, მისი ლოცვაც კი სიბილწეა.

¹⁰ვინც წრფელებს აცდუნებს და ბოროტი გზისკენ უბიძგებს, თავად ჩავარდება თავის ამოთხრილ ორმოში; ხოლო უბიწონი სიკეთეს დაიმკვიდრებენ.

¹¹მდიდარ კაცს ბრძენი ჰგონია თავი, მაგრამ მას გონიერი უპოვარი ამხელს.

¹²მართალთა აღზევება დიდი ზეიმია, უკეთურთა აღზევებისას კი ხალხი იმალება.

¹³საკუთარ დანაშაულთა დამფარველს ხელი არ მოემართება, ვინც აღიარებს და მიატოვებს ცოდვას, შეიწყალებული იქნება.

¹⁴ნეტარია ფრთხილი კაცი, ხოლო ვინც გულს გაისასტიკებს, უბედურებაში ჩავარდება.

¹⁵უკეთური ბატონი ღატაკთათვის მბრდღვინავი ლომია და მღრინავი დათვი.

¹⁶უგუნური მთავარი სასტიკი მოძალადეა, ანგარების მოძულე კი დღეგრძელი იქნება.

¹⁷კაცის სისხლით დამძიმებულმა სამარემდე ირბინოს, ნურავინ დაეხმარება მას.

¹⁸უმწიკვლოდ მავალი კაცი გადარჩება, ხოლო ღვლარჭნილი გზით მავალი კი, ერთხელაც იქნება, დაეცემა.

¹⁹თავისი მიწის მხვნელ-მთესველი მაძღარი იქნება; ამაო საქმეთა მადევარი კი სიღარიბით აივსება.

²⁰ერთგული კაცი კურთხევითაა მდიდარი, გამდიდრების მოსწრაფე კი დაუსჯელი არ დარჩება.

²¹პირმოთნეობა კარგი არ არის: პირმოთნე ლუკმა პურისთვისაც კი შესცოდავს.

²²ხარბი კაცი გამდიდრებას ესწრაფვის, ის კი არ იცის, რომ გაჭირვება ემუქრება.

²³მამხილებელი კაცი ბოლოს უფრო მეტ მადლს ჰპოვებს, ვიდრე პირმოთნე.

²⁴ვინც დედ-მამას ძარცვავს და ამბობს: „ეს დანაშაული არ არის,“ მარცველთა თანაზიარია.

²⁵ხარბი მუდამ შუღლს ეძებს, უფალს მინდობილი კი გამდიდრდება.

²⁶საკუთარი თავის იმედით მყოფი ბრიყვია, სიბრძნით მავალი კი გადარჩება.

²⁷ღარიბის გამკითხავი არ გაღარიბდება, ხოლო ვინც გაჭირვებულს თვალს არიდებს, წყევლა-კრულვით აივსება.

²⁸უკეთურთა აღზევებისას ხალხი იმალება, ხოლო მათი წარწყმედისას მართალნი ძლიერდებიან.