Read ქართული ბიბლია, სრული ვერსია Proverbs 30 Bible Online

Proverbs 30 - ქართული ბიბლია, სრული ვერსია bible

Proverbs 30

¹სიტყვები აგურისა, იაკეს ძისა, მისნისა, თქმული ითიელის, ითიელის და უქალისადმი:

²ყველაზე უმეცარი ვარ კაცთაგან და ადამიანური გონება არ გამაჩნია;

³არ მისწავლია სიბრძნე და ღვთიურისა არაფერი გამეგება.

⁴ვინ ავიდა ზეცაში და ვინ ჩამოვიდა? ვინ შეაგროვა ქარი მუჭებით? ვინ გამოიკრა წყალი კვართში? ვინ დაადგინა მიწის ყველა საზღვარი? რა არის მისი სახელი და რა არის მისი ძის სახელი, თუ იცი?

⁵ღმერთის ყოველი სიტყვა ხალასია; ფარია მასზე მინდობილთათვის.

⁶ნურაფერს მიუმატებ მის სიტყვებს, რათა არ გამხილოს და ცრუ არ გამოდგე.

⁷ორ რამეს გთხოვ, უარს ნუ მეტყვი, სანამ ცოცხალი ვარ:

⁸განმაშორე ტყუილი და სიყალბე, ნუ მომცემ ნურც სიღარიბეს და ნურც სიმდიდრეს, მაკმარე პური ჩემი არსობისა,

⁹რათა გამძღარმა არ უარგყო და არა ვთქვა: „ვინ არის უფალი?“ ან გაღარიბებულმა არ ვიქურდო და არ შევბღალო სახელი ჩემი ღმერთისა.

¹⁰ნუ დასწამებ ცილს მონას თავისი ბატონის წინაშე, თორემ მოგეწევა მისი წყევლა.

¹¹არიან ისეთნი, ვინც მამას სწყევლის და დედას არ ლოცავს;

¹²არიან საკუთარ თვალში სუფთანი, მაგრამ განუბანელი თავიანთი სიბინძურისაგან;

¹³არიან კაცნი — როგორი ამპარტავანნი, რა ქედმაღალი მზერის!

¹⁴არიან კაცნი, რომელთა კბილები მახვილებია, ღოჯები დანებია, ღვთისმოსავთა და კაცთა შორის ღარიბ-ღატაკთა შესაჭმელად ამქვეყნად.

¹⁵წურბელას ორი ასული ჰყავს: „მომე, მომე!“ ეს სამნი გაუმაძღარნი არიან და ოთხნი არასდროს იტყვიან: „კმარა“

¹⁶შავეთი და უნაყოფო საშო, წყლით გაუმაძღარი მიწა და ცეცხლი არასდროს არ ამბობენ: „კმარა!“

¹⁷მამის დამცინავ და დედის ურჩ ყვავ-ყორანი ამოკორტნის თვალებს და ორბის მართვენი შეჭამენ.

¹⁸სამი რამ მაოცებს და ოთხი რამ არ ვიცი:

¹⁹არწივის გზა ცაში, გველის გზა კლდეზე, ხომალდის გზა შუაგულ ზღვაში და კაცის გზა ქალწულისაკენ.

²⁰ასეთია გზა მრუში ქალისა: შეჭამს, პირს მოიწმენდს და ამბობს: „ცუდი არაფერი გამიკეთებია.“

²¹სამი რამ არყევს მიწას და ოთხი ვერ აუტანია:

²²გამეფებული მონა, მაძღარი ბრიყვი,

²³კახპას გათხოვება და ქალბატონის ადგილს რომ იჭერს მისი მხევალი.

²⁴ოთხი რამ არის მცირე დედამიწაზე, მაგრამ ისინი ბრძენზე ბრძენნი არიან:

²⁵ჭიანჭველა სუსტია, მაგრამ ზაფხულშივე იმზადებს საზრდოს;

²⁶კლდის ბოცვერი ძლიერი არ არის, მაგრამ კლდეზე იდგამს სახლს;

²⁷მეფე არა ჰყავთ კალიებს, მაგრამ მწყობრად გამოდიან;

²⁸ხვლიკს ხელით დაიჭერ, მაგრამ მეფის სასახლეშიც კი ცხოვრობს.

²⁹სამნი გამართულნი დააბიჯებენ და ოთხნი მარჯვედ დადიან:

³⁰ლომი უძლიერესია მხეცთა შორის და გზიდან არავის ჩამოეცლება;

³¹ამაყი ვაცი და მეფე, ლაშქარს რომ მიუძღვის.

³²თუ სისულელით თავი აიმაღლე ან ბოროტება განიზრახე, პირი მოკუმე,

³³რადგან რძის დღვება კარაქს იძლევა, ცხვირის ქექვა — სისხლი გადმოადენს და რისხვის გადმონთხევა კი შუღლს წარმოშობს.