Read ქართული ბიბლია, სრული ვერსია Proverbs 4 Bible Online

Proverbs 4 - ქართული ბიბლია, სრული ვერსია bible

Proverbs 4

¹ისმინეთ, შვილებო, მამის დარიგება, ყური დაუგდეთ, ჭკუა რომ ისწავლოთ.

²რადგან კარგ შეგონებებს გაძლევთ ის; ნუ მიატოვებთ ჩემს მოძღვრებას,

³რადგან მეც შვილი ვიყავი ჩემი მამისა, ნებიერი ჩემი დედისა,

⁴მამა მასწავლიდა და მეუბნებოდა: „მიიღოს შენმა გულმა ჩემი სიტყვები, დაიცავი ჩემი მცნებები და იცოცხლებ.

⁵შეიძინე სიბრძნე, შეიძინე გონიერება, ნუ დაივიწყებ და ნუ გადაუხვევ ჩემს ნათქვამს.

⁶ნუ განაგდებ სიბრძნეს და ის შეგეწევა შენ, გიყვარდეს იგი და ის დაგიცავს შენ.

⁷სიბრძნის სათავეა სიბრძნის შეძენა, ყოველგვარი საუნჯის ფარდად გამჭრიახობა შეიძინე.

⁸განადიდე იგი და აგამაღლებს შენ, პატივს მოგაგებს, თუ შეიტკბობ მას.

⁹ის დაგადგამს მადლის გვირგვინს, დიდების შარავანდედით შეგამკობს შენ.“

¹⁰ისმინე, შვილო ჩემო, მიიღე ჩემი ნათქვამი და გაგიმრავლდება შენი სიცოცხლის წლები.

¹¹მე გასწავლე სიბრძნის გზა და სწორი გზა მიგითითე.

¹²გზაში არ დაგიმოკლდება ნაბიჯი და გაქცეული არ წაიბორძიკებ.

¹³კრძალვით მოეპყარ ჩემს დარიგებას, ნუ მიატოვებ, დაიცავი, რადგან შენი სიცოცხლეა იგი.

¹⁴უკეთურთა კვალზე ნუ ივლი და ბოროტთა გზას ნუ დაადგები,

¹⁵ჩამოსცილდი მას და ნუ გაივლი მასზე, გადაუხვიე და გაიარე.

¹⁶რადგან არ დაიძინებენ ისინი, ბოროტება თუ არ ჩაიდინეს, და ძილი გაუკრთებათ, თუ ვინმე არ აცდუნეს,

¹⁷რადგან უღმრთოების პურს ჭამენ და ძალადობის ღვინოს სვამენ.

¹⁸მართალთა კვალი განთიადის ნათელივითაა, რომელიც თანდათან ძლიერდება დღის დადგომამდე.

¹⁹უღმრთოთა გზა კი წყვდიადია, არ იციან, სად წაიბორძიკებენ.

²⁰შვილო ჩემო, ჩემს სიტყვებს უსმინე და ჩემს ნათქვამს მოაპყარ ყური;

²¹ნუ მოიშორებ მათ, გულის წიაღში დაიმარხე,

²²რადგან ისინი სიცოცხლეა მათი მპოვნელისათვის და კურნებაა მთელი მისი სხეულისათვის.

²³ყველა დასაცავზე მეტად დაიცავი შენი გული, რადგან მისგან მოედინებიან სიცოცხლის წყაროები.

²⁴მოიცილე სიცრუე ბაგეთაგან და მზაკვრობა ენისაგან.

²⁵დაე, შენმა თვალებმა წინ იყურონ, და შენი წამწამები არ დახარო.

²⁶სწორად წარმართე შენი ნაბიჯები და ყველა შენი გზა უსაფრთხო იქნება.

²⁷ნურც მარჯვნივ გადაუხვევ, ნურც მარცხნივ და ფეხი შენი განარიდე ბოროტებას.