Read ქართული ბიბლია, სრული ვერსია Ecclesiastes 10 Bible Online

Ecclesiastes 10 - ქართული ბიბლია, სრული ვერსია bible

Ecclesiastes 10

¹მკვდარი ბუზები ამყრალებენ მენელსაცხებლის სურნელოვან ზეთს; მცირე სიბრიყვეს შეუძლია გადაწონოს სიბრძნე და ღირსება.

²ბრძენის გული მარჯვნივ იხრება, ბრიყვის გული კი — მარცხნივ.

³რა გზასაც არ უნდა გაუდგეს ბრიყვი, ბრიყვადვე რჩება, ყველა ხედავს, რომ სულელია.

⁴თუ ბატონი გაგირისხდა, ნუ გაექცევი, რადგან მომთმენს ბევრს აპატიებენ.

⁵არის ბოროტება, რომელიც ვიხილე მზისქვეშეთში, რომელიც მოდის ხელისუფლის შეცდომისაგან:

⁶უგუნური დიდ სიმაღლეზე აჰყავთ, მდიდრები კი დაბლა სხედან.

⁷ვიხილე მონები ცხენებზე, მთავრები კი მონებივით ფეხით მოარულნი.

⁸ვინც ორმოს თხრის, თავად ჩავარდება შიგ, ხოლო ვინც ზღუდეს გამოანგრევს, მას გველი უკბენს.

⁹ქვისმთლელს ქვა დაეცემა და ხის მჭრელს ხისგან ემუქრება საფრთხე.

¹⁰თუ ცული დაგიჩლუნგდა, გალესე, თორემ ჯაფა დაგადგება; საქმე ჭკუით უნდა აკეთო.

¹¹თუ შეულოცველს უკბინა გველმა, შემლოცველი ვეღარ უშველის.

¹²ბრძენის სიტყვებს მისთვის პატივი მოაქვს, უგუნურს კი მისი ბაგეები ღუპავენ.

¹³მისი სიტყვები უგუნურებით იწყება და ავი სიშლეგით მთავრდება.

¹⁴ბრიყვი ბევრს ლაყბობს. მაგრამ არავინ იცის, რა იქნება და ვინ იტყვის, რა მოხდება შემდგომ?

¹⁵უგუნურთა შრომა ქანცავს მათ, რადგან ქალაქის გზაც კი არ იციან.

¹⁶ვაი ქვეყანას, რომლის მეფეც ყრმაა, მისი მთავარნი კი დილას ჭამით იწყებენ.

¹⁷ნეტარება შენ, ქვეყანავ, როდესაც შენი მეფე კეთილშობილია, ხოლო შენი მთავრები თავის დროზე ჭამენ ძალ-ღონის მოსაკრებად და არა სიმთვრალისთვის.

¹⁸სიზარმაცით ჭერი ჩამოწვება და გულხელდაკრეფით წყალი ჩამოვა სახლში.

¹⁹ნადიმი გასართობად ეწყობა; ღვინო ახალისებს სიცოცხლეს, ფული კი ყველა მოთხოვნილებას აკმაყოფილებს.

²⁰გულშიც კი ნუ გაივლებ მეფის წყევლას, შენს მოსასვენებელშიც ნუ აგინებ მდიდარს; თორემ ცის ფრინველი მიუტანს ამბავს და ფრთოსანი აუწყებს შენს სიტყვებს.