Read ქართული ბიბლია, სრული ვერსია Ecclesiastes 3 Bible Online

Ecclesiastes 3 - ქართული ბიბლია, სრული ვერსია bible

Ecclesiastes 3

¹ყველაფერს აქვს თავისი დრო და ყოველ მოვლენას თავისი ჟამი ცისქვეშეთში:

²ჟამი დაბადებისა და ჟამი გარდაცვალებისა; ჟამი დარგვისა და ჟამი დარგულის აღმოფხვრისა;

³ჟამი მოკვდინებისა და ჟამი კურნებისა; ჟამი ნგრევისა და ჟამი შენებისა;

⁴ჟამი ტირილისა და ჟამი სიცილისა; ჟამი გლოვისა და ჟამი ცეკვა-თამაშისა;

⁵ჟამი ქვათა გაფანტვისა, და ჟამი ქვათა შეგროვებისა; ჟამი შეხვედრისა, და ჟამი განშორებისა;

⁶ჟამი ძებნისა და ჟამი დაკარგვისა; ჟამი შენახვისა და ჟამი გაფლანგვისა;

⁷ჟამი დარღვევისა და ჟამი შეკერვისა; ჟამი დუმილისა, და ჟამი საუბრისა;

⁸ჟამი სიყვარულისა და ჟამი სიძულვილისა; ჟამი ომისა და ჟამი მშვიდობისა.

⁹რასა რგებს მშრომელს მისი ნაშრომი?

¹⁰მე ვიხილე საქმენი, რომელიც ღმერთმა მიუჩინა ადამიანებს შესასრულებლად.

¹¹ყველაფერი, რაც ღმერთმა შექმნა, მშვენიერია თავისი დროის შესაფერად; და თუმცა მარადიულის შეცნობის უნარი მიანიჭა მან კაცთა გონებას, მაგრამ ისე, რომ ვერ შეიცნოს ღმერთის ნამოქმედარის თავი და ბოლო.

¹²ვიცი, რომ არაფერია კაცთათვის იმაზე კარგი, რომ იბედნიერონ და იხარონ სანამ ცოცხლობენ.

¹³და თუ ვინმე ჭამს და სვამს და სიკეთეს ხედავს მთელ მის ნაღვაწში, ეს ღვთისგან აქვს მას ნაბოძები.

¹⁴ვუწყი, რომ ყოველივე, რასაც ღმერთი აკეთებს, მარადიულად იარსებებს — ვერც დაემატება რაიმე და ვერც მოაკლდება; და ეს იმისთვის მოაწყო ღმერთმა, რათა შიში ჰქონდეთ მის წინაშე.

¹⁵რაც არის, ის უკვე იყო; და რაც იქნება, ისიც უკვე იყო ადრე, და ღმერთი გამოიძიებს უკვე გარდასულს.

¹⁶და კიდევ ვიხილე მზისქვეშეთში: მართლმსაჯულების ადგილას — უსამართლობა; სამართლიანობის ადგილას — უკანონობა.

¹⁷ვთქვი ჩემს გულში: მართალს და მტყუანს ღმერთი განსჯის, რადგან მან განსაზღვრა ჟამი ყოველი საგნისა და ყოველი საქმისა.

¹⁸ვთქვი მე ჩემს გულში კაცთა მოდგმაზე: ასე გამოსცდის ღმერთი მათ, რათა დარწმუნდნენ, რომ თავისთავად პირუტყვები არიან მხოლოდ.

¹⁹რადგან ხვედრი ადამიანთა და ხვედრი პირუტყვთა ერთი და იგივეა: როგორც ერთი კვდება, ისე კვდება მეორეც. და ერთი სუნთქვა უდგას ყველას, და არა აქვს ადამიანს უპირატესობა პირუტყვზე, რამეთუ ყოველივე ამაოებაა.

²⁰ყოველივე ერთი ადგილისკენ მიდის: ყველაფერი მტვერია და ყველაფერი მტვრად იქცევა.

²¹ვინ უწყის, ადის კი ზევით სული კაცისა, ხოლო პირუტყვისა — ქვევით, ქვესკნელისაკენ?

²²და ვიხილე, რომ არაფერია იმაზე უკეთესი, ვიდრე იხაროს ადამიანმა თვისი საქმით, რადგან ესაა მისი ხვედრი. და ვინ დაანახვებს მას, რა მოხდება მის შემდეგ?