Read ქართული ბიბლია, სრული ვერსია Ecclesiastes 4 Bible Online

Ecclesiastes 4 - ქართული ბიბლია, სრული ვერსია bible

Ecclesiastes 4

¹და კიდევ ვიხილე ყოველი ძალადობა, რომელიც ხდება მზისქვეშეთში: ვნახე ცრემლი ჩაგრულთა და ნუგეშისმცემელი არ ჰყავდათ მათ; და ძალა მათ მჩაგვრელთა ხელთ იყო, მათ კი არ ჰყავდათ ნუგეშისმცემელი.

²დიდი ხნის მკვდარნი უფრო ბედნიერად შევრაცხე, ვიდრე ჯერაც ცოცხალნი.

³ხოლო ორივეზე ბედნიერი მაინც ის არის, ვინც ჯერ არ შობილა, რომელსაც არ უხილავს ის ბოროტება, მზისქვეშეთში რომ ხდება.

⁴და ისიც ვიხილე, რომ ყოველი სიბეჯითე და მოხერხება საქმეში მხოლოდ კაცთა შორის ერთურთის შურით არის გამოწვეული. ესეც ამაოებაა და დევნა ქარისა.

⁵ბრიყვს გულზე ხელები დაუკრეფია და თავის ხორცს ჭამს.

⁶ერთი მუჭა სიმშვიდე სჯობს ტანჯვით სავსე მთელ კალთა ფუჭ საზრუნავსა და ქარის დევნას.

⁷და კვლავ ვიხილე ამაოება მზისქვეშეთში:

⁸ესენი არიან მარტოხელანი: არც ძე ჰყავთ, არც ძმა, ბოლო კი არ უჩანს მათ ჯაფას, მაგრამ მათი თვალი ვერ ძღება სიმდიდრით. „ვისთვისა ვშრომობ“, კითხულობენ ისინი, „და რისთვის ვაკლებ ჩემს სულს სიამეს?“ — ესეც ამაოებაა და ფუჭი საქმე.

⁹ორის ყოფნა სჯობს ერთისას, რადგან უკეთესი საზღაური მიეზღვება მათ გარჯას.

¹⁰რადგან თუ დაეცემა ერთი, მეორე წამოაყენებს მეგობარს; მარტომყოფი კი თუ დაეცა, ვინ წამოაყენებს მას?

¹¹თუ ორნი დაწვებიან, თბილად იქნებიან. მარტომყოფს კი ვინ გაათბობს?

¹²ერთის ძლევა იოლია, ორს კი ძალუძს გამკლავება. სამმაგი ბაწარი დიდხანს ძლებს.

¹³ღარიბი და გონიერი ჭაბუკი სჯობს მოხუცებულ უგუნურ მეფეს, რომელსაც აღარ ესმის შეგონება.

¹⁴ჭაბუკი შეიძლება სატუსაღოდან გამოვიდეს და მეფე გახდეს, თუმცა ღატაკად იყო შობილი იმ სამეფოში.

¹⁵ვიხილე, რომ ყოველ მცხოვრებს, ვიდრე ის მზისქვეშეთში დადის, მიჰყვება ყრმა, რომელიც მის ადგილს დაიჭერს.

¹⁶დასასრული არ უჩანდა მთელ იმ ხალხს, ვისაც ის წინამძღოლობდა. მაგრამ არც მათ შემდგომნი მოიპოვებენ სიხარულს. ჭეშმარიტად, ესეც ამაოებაა და დევნა ქარისა.