Read ქართული ბიბლია, სრული ვერსია Ecclesiastes 5 Bible Online

Ecclesiastes 5 - ქართული ბიბლია, სრული ვერსია bible

Ecclesiastes 5

¹დაუკვირდი შენს ნაბიჯებს, როდესაც ღმერთის სახლისაკენ მიემართები; არჩიე მოსმენა უგნურთა მსხვერპლშეწირვას, რადგან არ უწყიან, უკეთურებას რომ სჩადიან.

²ენა ნუ გაგისწრებს წინ და გული ნუ აგიჩქარდება ღმერთის წინაშე სიტყვის სათქმელად, რადგან ღმერთი ცაშია, შენ კი — მიწაზე. ამიტომ შეიკავე თავი მრავალსიტყვაობისაგან.

³ბევრ საზრუნავს სიზმრები მოსდევს, ბრიყვის ხმას კი მრავალსიტყვაობა ახლავს.

⁴თუ აღთქმას მისცემ ღმერთს, ნუ დააყოვნებ აღსრულებას, მას არ უყვარს უგუნურნი; დროზე აღასრულე შენი აღთქმა.

⁵ჯობს არ აღუთქვა, ვიდრე აღუთქვა და არ აღასრულო.

⁶ნუ დაგცდება პირიდან ისეთი სიტყვა, რომ ცოდვაში ჩაიგდო თავი; და ნუ იტყვი ანგელოზის წინაშე: შევცდიო. ნუ განარისხებ ღმერთს შენი სიტყვებით, რათა არ დაღუპოს მან შენი ხელით შექმნილი.

⁷სიზმრების სიმრავლეს ამაოება და მრავალსიტყვაობა მოსდევს. გეშინოდეს ღმერთის!

⁸თუ იხილავ სადმე ღატაკთა ჩაგვრას და სამართლისა და სიმართლის შერყვნას, ნუ გაიკვირვებ, რადგან მაღალს უმზერს უფრო მაღალი, ხოლო მათ ზემოთ კიდევ უფრო მაღალი არის.

⁹მიწის ნაყოფი საერთოა, გადახნულ მიწას კი მეფემ უნდა მიხედოს.

¹⁰ვერცხლისმოყვარე ვერ გაძღება ვერცხლით, და ვერც ფუფუნების ტრფიალი აღივსებს საწყაულს. ესეც — ამაოებაა!

¹¹დოვლათი რომ იზრდება, მჭამელთა რიცხვიც იზრდება. რა სარგებელი აქვს პატრონს, გარდა მათი ყურებისა?

¹²ტკბილია მშრომელის ძილი, ბევრს შეჭამს თუ ცოტას; მდიდარს კი სიმაძღრე ძილს უფრთხობს.

¹³მძიმე სატკივარი ვიხილე მზისქვეშეთში: სიმდიდრე — პატრონის მიერ დამარხული თავის საუბედუროდ.

¹⁴დაეკარგა სიმდიდრე უბედური შემთხვევის გამო და მისი შვილი ხელცარიელი დარჩა;

¹⁵შიშველი გამოვიდა დედის მუცლიდან და შიშველი წავა, ამაოდ ჩაივლის მისი შრომა, ვერას წაიღებს თან!

¹⁶და ესეც მტანჯველი ბოროტებაა: როგორც მოვიდა, ისე წავა; და რას მიიღებს ქარის დევნით?!

¹⁷მთელი მისი სიცოცხლის დღეებს ბნელში ამოჭამს დარდსა და ვაებაში.

¹⁸და დავინახე, რა არის კეთილი და შესაფერი: ჭამა, სმა და სიამე საკუთარი შრომის ნაყოფით, რასაც კაცი აკეთებს მზისქვეშეთში თავისი სიცოცხლის იმ დათვლილ დღეებში, რომელსაც ღმერთი გვაძლევს; რადგან ესაა ჩვენი წილხვედრი.

¹⁹თუ ღმერთი კაცს აძლევს სიმდიდრეს და ქონებას, რათა ისარგებლოს და მიიღოს თავისი წილი და იხაროს თავისი შრომით — ეს ღმერთის ნაბოძებია.

²⁰ის აღარ დარდობს თავისი სიცოცხლის გარდასულ დღეებზე, რადგან ღმერთი აძლევს მას გულის სიხარულს.