Read ქართული ბიბლია, სრული ვერსია Ecclesiastes 7 Bible Online

Ecclesiastes 7 - ქართული ბიბლია, სრული ვერსია bible

Ecclesiastes 7

¹კარგი სახელი სჯობს ძვირფას ნელსაცხებელს და სიკვდილის დღე — გაჩენის დღეს.

²ქორწილში წასვლას სატირალში წასვლა სჯობს, რადგან ეს არის ბოლო ყოველი კაცისა, ცოცხალს უნდა ახსოვდეს ეს.

³მწუხარება სჯობს სიცილს, რადგან სევდიანი სახე გულს ალმობიერებს.

⁴ბრძენთა გული სატირალშია, ბრიყვთა გული კი — ქორწილში.

⁵სჯობს ბრძენმა შეგრისხოს, ვიდრე ბრიყვმა გაქოს.

⁶ცეცხლზე დაყრილი ფიჩხის ტკაცუნია ბრიყვის სიცილი; ესეც ამაოებაა.

⁷ჩაგვრა ბრძენს უგუნურს გახდის, და ქრთამი კი გულს რყვნის.

⁸საქმის ბოლო მის დასაწყისს სჯობს, მოთმინება კი — ქედმაღლობას.

⁹ნუ ეშურები გულისწყრომას, გულისწყრომა უგუნურთა უბეში ბუდობს.

¹⁰ნუ იტყვი: წარსული აწყმოს რად სჯობდაო? რადგან სიბრძნე აკლია ამ კითხვას.

¹¹სიბრძნე მემკვიდრეობას სჯობს, და დიდად სარგოა მზის მჭვრეტელთათვის.

¹²სიბრძნეც იცავს კაცს და ფულიც, მაგრამ ცოდნის უპირატესობა ის არის, რომ სიბრძნე სიცოცხლეს ანიჭებს მის მფლობელს.

¹³შეხედე ღმერთის საქმეებს: ვინ შეძლებს გაასწოროს, რაც მან გაამრუდა?

¹⁴კეთილდღეობისას გაიხარე და ძნელბედობისას იფიქრე; ესეც და ისიც ღმერთმა შექმნა, ისე რომ კაცი ვერ მისწვდება იმას, რაც მოხდება შემდგომში.

¹⁵ყოველივე ვიხილე ჩემი ამაოების დღეებში: მართალი დაღუპულა თავის სიმართლეში და უკეთური დღეგრძელობს თავის ბოროტებაში.

¹⁶ნუ იქნები ზედმეტად მართალი და ნურც ზედმეტად დაბრძენდები, ნუ დაიღუპავ თავს.

¹⁷ნუ იქნები მთლად უღმრთო და ნურც მთლად ბრიყვი, რათა მშვიდობით გალიო შენი სიცოცხლის დღენი.

¹⁸უმჯობესია, ერთიც იყო და მეორეც; არც ერთი უარყო და არც მეორე; რადგან ღვთისმოშიში ყველაფერს გაუძლებს.

¹⁹სიბრძნე კაცს ათ ხელისუფალზე ძლიერად აქცევს, ქვეყნად რომ მბრძანებლობენ.

²⁰არ არის ქვეყანაზე მართალი კაცი, მხოლოდ სიკეთეს რომ იქმოდეს და არ სცოდავდეს.

²¹ყველა სიტყვას, რასაც ამბობენ, ყურს ნუ მიუგდებ, რათა არ გაიგონო, როგორ გაძაგებს შენი მონა;

²²შენმა გულმა ხომ იცის, რომ შენც ბევრს აძაგებ.

²³სიბრძნით გამოვცადე ეს ყოველივე და ვთქვი: დავბრძენდები-მეთქი, მაგრამ შორსაა ის ჩემგან!

²⁴რაც არის, ის შორსაა და მიწის უფსკრულებშია, ვინ მისწვდება მას?

²⁵გულში ჩავიდე, შემეცნო, შემესწავლა და გამომეკვლია, რა არის სბრძნე და გონიერება, რათა გამეგო, რომ უკეთურება სიბრიყვეა და უგუნურება — შეშლილობა.

²⁶მივხვდი, რომ სიკვდილზე მწარეა დიაცი, რადგან ის ხაფანგია, მისი გული ბადეა და მისი ხელები — ბორკილები. უფლის სათნო გადაურჩება მას, ცოდვილს კი გააბამს მახეში.

²⁷აი, რას მივხვდი, — თქვა ეკლესიასტემ, — ერთი მეორის მიყოლებით, ხანგრძლივი კვლევით —

²⁸რასაც ჩემი გონება კვლავაც ეძებდა, მაგრამ ვერ ვპოვე. ათასში ერთი მამაკაცი ვნახე, მაგრამ ქალი მათ შორის — ვერც ერთი.

²⁹და აჰა, მხოლოდ ეს ვპოვე: ღმერთმა ადამიანები მართლად შექმნა, მათ კი მრავალი თავსატეხი გაიჩინეს.