Read ქართული ბიბლია, სრული ვერსია Song of Songs 1 Bible Online

Song of Songs 1 - ქართული ბიბლია, სრული ვერსია bible

Song of Songs 1

¹ქებათა ქება სოლომონისა.

²დაე მომიძღვნას მან მე თავის ბაგეთა ამბორი! რადგან ღვინოზე ტკბილია შენი სიყვარული,

³სურნელოვანია შენი ნელსაცხებელი, და სახელი შენი დაღვრილი ნელსაცხებელია. ამიტომ შეგიყვარეს შენ ქალწულებმა.

⁴თან წარმიტაცე და გავიქცეთ ერთად. მეფემ შემიყვანა თავის პალატებში. ვიხარებთ და ვიშვებთ შენით, ვაქებთ შენს ალერსს ღვინოზე მეტად. ღირსეულად შეგიყვარეს შენ!

⁵შავგვრემანი ვარ და მშვენიერი, ასულნო იერუსალიმისანო, ვით კედარის კარვები და სოლომონის კრეტსაბმელნი.

⁶ნუ უყურებთ, რომ შავგვრემანი ვარ, რამეთუ მზისგან ვარ დამწვარი. ძენი დედისა ჩემისანი გამირისხდნენ, ვენახის მცველად დამაყენეს, მაგრამ ვენახი ჩემი ვერ დავიცავი.

⁷მითხარ, შენ, რომელიც შეიყვარა ჩემმა სულმა, სად აძოვებ, სად ისვენებ შუადღის ხვატში, რად ვიხეტიალო შენი მეგობრების ფარებში?

⁸თუ არ იცი, უმშვენიერესო ასულთა შორის, გაჰყევი ცხვრის კვალს და მწყემსთა კარვების შორიახლო აძოვე შენი თიკნები.

⁹ფარაონის ეტლში შებმულ მერანს გამსგავსე, სატრფოვ ჩემო!

¹⁰მშვენიერია შენი ღაწვები, მძივებით შემკული, და ყელი — მარგალიტების მძივებით მორთული.

¹¹ოქროს საყურეებს გაგიკეთებთ, ვერცხლით დაწინწკლულს.

¹²როდესაც ინახით იჯდა მეფე, სურნელს აკმევდა ჩემი ნარდიონი.

¹³საყვარელი ჩემი მურის ჭურჭელია — ჩემთანაა, ჩემს ძუძუთა შორის ისვენებს.

¹⁴ვამსგავსე ჩემი სატრფო ყენ-გედის ვენახების ინის მტევანს.

¹⁵აჰა, მშვენიერი ხარ, სატრფოვ ჩემო, აჰა, მშვენიერი ხარ! მტრედები ბუდობენ შენს თვალებში.

¹⁶აჰა, მშვენიერი ხარ, საყვარელო ჩემო, და სანატრელი! ხასხასა მოლია ჩვენი სარეცელი!

¹⁷კედარისაა ჩვენი სახურავი, ჭერი კი — კვიპაროსისა.