Read ქართული ბიბლია, სრული ვერსია Song of Songs 3 Bible Online

Song of Songs 3 - ქართული ბიბლია, სრული ვერსია bible

Song of Songs 3

¹ვეძებე ღამით ჩემს სარეცელზე საყვარელი ჩემი სულისა, ვეძებე და ვერ ვიპოვე.

²„ავდგები-მეთქი და მოვივლი ქალაქის ქუჩებსა და მოედნებს. მოვძებნი ჩემი სულის საყვარელს.“ ვეძებე და ვერ ვიპოვე.

³შემომხვდნენ მცველნი, ქალაქის შემომვლელნი: „ხომ არ გინახავთ ჩემი სულის სატრფო?“

⁴ცოტას გავშორდი და ვიპოვე საყვარელი ჩემი სულისა. დავიჭირე და აღარ გავუშვი, ვიდრე არ შევიყვანე დედაჩემის სახლში და ჩემი მშობლის გალიაკში.

⁵გაფიცებთ, ასულნო იერუსალიმისანო, ველის ნიამორებს და ირმებს გაფიცებთ, არ შეაშფოთოთ, არ გამოაფხიზლოთ სიყვარული, ვიდრემდის თავად არ ინებოს!

⁶ვინ არის იგი, უდაბნოდან ამომავალი, ვით კვამლის სვეტი, კმეული მურითა და გუნდრუკით და მენელსაცხებელთა ნელსაცხებელთა სურნელით?

⁷აჰა, სოლომონის სარეცელი! დგას მის გარშემო 60 ძლიერი ძლიერთაგან ისრაელისა.

⁸მახვილამოწვდილნი დგანან; ბრძოლაში ნაცადნი არიან; თითოეულს ხმალი აკრავს წელზე ღამეულ საფრთხეთა გამო.

⁹ლიბანის ნაძვის ტახტრევანი გაიკეთა მეფე სოლომონმა;

¹⁰სვეტები ვერცხლისა გაუკეთა, საზურგე — ოქროსი, საჯდომი — ძოწეულისა, სიყვარულით რომ მოჰქარგეს იერუსალიმის ასულებმა.

¹¹გამოდით, ასულნო სიონისა, და იხილეთ მეფე სოლომონი გვირგვინით, რომელიც დედამ დაადგა მას მისი ქორწილისა და გულის სიხარულის დღეს.