Read ქართული ბიბლია, სრული ვერსია Song of Songs 4 Bible Online

Song of Songs 4 - ქართული ბიბლია, სრული ვერსია bible

Song of Songs 4

¹რა მშვენიერი ხარ, სატრფოვ ჩემო, რა მშვენიერი ხარ! შენი თვალები მტრედებია შენი პირბადის ქვეშ; შენი დალალები არვეა თხათა, გალაადის მთიდან რომ ეშვება.

²კბილნი შენნი — გაპარსული ცხვრების ფარაა, საბანელიდან ამომავალი, თითოეულ მათგანს ტყუპი მოჰყვება და ბერწი არ არის მათ შორის.

³ბაგენი შენნი ძოწის ძაფის მსგავსია, და შენი პირი — საამური. შენი ღაწვები ბროწეულის ლებნებია შენი პირბადის ქვეშ.

⁴შენი ყელი დავითის გოდოლია, აგებული საჭურველთათვის, ათასი ფარი ჰკიდია მასზე — ძლევამოსილთა ყველა ფარი.

⁵მკერდი შენი ტყუპი თიკანია ნიამორისა, შროშანთა ველზე რომ ძოვენ.

⁶ვიდრე ბინდი ჩამოწვებოდეს და ჩრდილები გაქრებოდნენ, მე ავალ მურის მთაზე და გუნდრუკის ბორცვზე.

⁷ყოვლად მშვენიერი ხარ, სატრფოვ ჩემო, ნაკლი არა გაქვს!

⁸წამომყევი ლიბანიდან, ჩემო პატარძალო! დაეშვი ამანას მწვერვალიდან, სენირისა და ხერმონის მწვერვალიდან, ლომთა ბუნაგთა და ჯიქთა მთებიდან.

⁹შენ დაატყვევე ჩემი გული, დაო ჩემო, პატარძალო ჩემო, ერთი შეხედვით, შენი ყელსაბამის ერთი გულქანდით.

¹⁰რა საამურია შენი ალერსი, პატარძალო ჩემო, დაო ჩემო! რა ტკბილია შენი ალერსი — ღვინოზე უმჯობესია, შენი სამოსის სურნელი უმჯობესია ყოველ საკმეველთა.

¹¹გოლი მოსწვეთს შენს ბაგეებს, ჩემო პატარძალო! თაფლი და რძეა შენი ენის ქვეშ; შენი სამოსის სურნელი ლიბანის სურნელია!

¹²ბაღი ხარ დახშული, პატარძალო ჩემო, დაო ჩემო, ჭა ხარ დაგმანული, წყარო დაბეჭდილი.

¹³შენი ნარგავები ბროწეულის ბაღია, რჩეული ნაყოფით — ინითა და ნარდიონით,

¹⁴ნარდიონით და ზაფრანით, სურნელოვანი ლერწმითა და დარიჩინით, ყოველგვარი გუნდრუკის ხეებითურთ, მურით და ალოეთი, ყოველგვარი რჩეული სურნელებით.

¹⁵წალკოტთა წყარო ხარ, ჭა ხარ ცხოველი წყლისა და ლიბანიდან მორაკრაკე ნაკადულები.

¹⁶აღსდექ ჩრდილოეთიდან, ქარო, მომეახლე სამხრეთის ქარო, მოჰბერე ჩემს წალკოტს, მიმოიფრქვეს მისი სურნელი! მოვიდეს თავის წალკოტში საყვარელი ჩემი და იგემოს მისი რჩეული ნაყოფი!