Read ქართული ბიბლია, სრული ვერსია Song of Songs 8 Bible Online

Song of Songs 8 - ქართული ბიბლია, სრული ვერსია bible

Song of Songs 8

¹ნეტავ ჩემი ძმა ყოფილიყავი, დედაჩემის ძუძუს მწოველი! შემოგხვდებოდი, გაკოცებდი და არ დამძრახავდნენ.

²წაგიძღვებოდი და დედაჩემის სახლში შეგიყვანდი; შენ მასწავლიდი, მე კი სურნელოვან ღვინოს — ჩემი ბროწეულის წვენს — შეგასმევდი.

³მისი მარცხენა ჩემს თავქვეშ იქნებოდა, მარჯვენა მომეხვეოდა მისი!

⁴გაფიცებთ თქვენ, ასულნო იერუსალიმისანო, არ შეაშფოთოთ, არ გამოაფხიზლოთ სიყვარული, ვიდრემდის თავად არ ინებებს!

⁵ვინ არის იგი, უდაბნოდან ამომავალი, თავისი საყვარლის მხარს დაყრდნობილი? ვაშლის ხის ქვეშ გაგაღვიძე შენ. იქ გშვა შენ დედამ შენმა, იქ გშვა შენ მშობელმა შენმა.

⁶დამდე, როგორც ბეჭედი, შენს მკერდზე, როგორც სამკლაური — შენს მკლავზე; რადგან სიკვდილივით ძლიერია სიყვარული, ჯოჯოხეთივით სასტიკია ეჭვი; მისი ისრები ცეცხლის ისრებია; მრისხანე ცეცხლის ალია ის.

⁷ვერ დაშრეტს სიყვარულს წყალი მრავალი და მდინარეები ვერ წარხოცავენ მას. კიდეც რომ შესთავზოს კაცმა მთელი თავისი სახლის დოვლათი სიყვარულის წილ, არავინ დათანხმდება ამაზე.

⁸პატარა და გვყავს და ჯერ არ დაკოკრებია მკერდი. რა ვუყოთ ჩვენს დას იმ დღეს, როცა დაუდგება ნიშნობის ჟამი?

⁹ზღუდე რომ იყოს, ვერცხლის ქონგურებს დავაშენებდით; კარი რომ იყოს, კედარის ფიცრებით მოვჭედავდით.

¹⁰მე ზღუდე ვარ და გოდლებივითაა ჩემი მკერდი; ამიტომაც მოწიფული ვჩანვარ მის თვალში.

¹¹ჰქონდა ბაალ-ხამონში ვენახი სოლომონს და ჩააბარა მცველებს ეს ვენახი. თითოეულს ათასი ვერცხლი უნდა მოეტანა ყურძნის სანაცვლოდ.

¹²ჩემი ვენახი კი ჩემთანაა. ათასი შენი იყოს, სოლომონ, და 200 — ნაყოფთა მცველებისა.

¹³ბაღების მკვიდრო, მეგობრები ისმენენ შენს ხმას — მეც მასმინე!

¹⁴გაიქეცი, საყვარელო ჩემო! ემსგავსე ქურციკსა და შვლის ნუკრს სურნელთა მთებზე.