Read ქართული ბიბლია, სრული ვერსია Isaiah 1 Bible Online

Isaiah 1 - ქართული ბიბლია, სრული ვერსია bible

Isaiah 1

¹ხილვა ესაიასი, ამოცის ძისა, რომელიც იხილა იუდეასა და იერუსალიმზე, იუდას მეფეების: ყუზიას, იოთამის, ახაზისა და ხიზკიას დღეებში.

²ისმინე ცაო და ყურადიღე, მიწაო, რადგან უფალი ლაპარაკობს: ძენი დავზარდე და აღვაზევე, ისინი კი განმიდგნენ.

³ხარი იცნობს თავის ბატონს და ვირი — თავისი პატრონის ბაგას; ისრაელი კი ვერ ცნობს, ჩემი ერი ვერ იგებს.

⁴ვაი, ცოდვილო ხალხო, დანაშაულით დამძიმებულო ხალხო, ბოროტმოქმედთა მოდგმავ, წარწყმედილო ძენო! მათ მიატოვეს უფალი, ისრაელის წმიდა ღმერთი დაგმეს, განუდგნენ!

⁵რამდენიღა უნდა გცემონ, ურჩობას რომ აგრძელებთ? თავი მთლიანად დაგისნეულდათ და გული დაგიუძლურდათ.

⁶თავით ფეხთამდე საღი ადგილი აღარ შეგრჩათ: ყველგან ჭრილობა და წყლული, დაჩირქებული იარები, გამოურწყველი და შეუხვეველი, სალბუნით დაუამებელი.

⁷აოხრებულია თქვენი ქვეყანა, ცეცხლითაა გადამწვარი თქვენი ქალაქები; თქვენს მინდვრებს თქვენს თვალწინ ჭამენ უცხონი; ყველაფერი გაუდაბურებულია, როგორც უცხოთა შემოსევებისას.

⁸და დარჩა სიონის ასული, როგორც კარავი ვენახში, როგორც ქოხი ბოსტანში, როგორც ალყაშემორტყმული ქალაქი.

⁹ცაბაოთ უფალს რომ მცირე ნატამალი არ დაეტოვებინა ჩვენთვის, სოდომივით ვიქნებოდით, გომორას დავემსგავსებოდით.

¹⁰ყურად იღეთ უფლის სიტყვა, თქვე სოდომის მთავრებო! ყური დაუგდეთ ჩვენი ღმერთის რჯულს, თქვე გომორას ხალხო!

¹¹რად მინდა მე თქვენი შესაწირავები? — ამბობს უფალი, — გავძეხი სრულადდასაწველი ვერძებით და მსუქანი მოზვრების ლურთებით; აღარ მსურს კურატების, ცხვრებისა და ვაცების სისხლი.

¹²როდესაც მოდიხართ ჩემს წინაშე წარსადგომად, ვინ დაგავალათ, რომ ჩემს ეზოებს თელავთ?

¹³არ მომიტანოთ მეტად ამაო ძღვენი; თქვენი საკმეველი სისაძაგლეა ჩემთვის, ახალმთვარობების და შაბათების სადღესასწაულო შეკრებები მძულს — ურჯულოება და დღესასწაული?!

¹⁴თქვენი ახალმთვარობები და დღესასწაულები შეიძულა ჩემმა სულმა, ტვირთად მექცა ისინი, დავიღალე მათი ზიდვით.

¹⁵და, როცა ხელს გამომიშვერთ, მე თვალს აგარიდებთ, და რამდენიც არ უნდა ილოცოთ, არ მოგისმენთ, რადგან სისხლითაა დასვრილი თქვენი ხელები.

¹⁶განიბანეთ, განიწმიდეთ, მოაშორეთ თქვენი ბოროტი საქმეები ჩემს თვალთაგან, შეწყვიტეთ ბოროტება.

¹⁷ისწავლეთ სიკეთის კეთება, ეძიეთ სამართალი; გაამხნვეთ ჩაგრული, სამართლიანად განიკითხეთ ობოლი, გამოესარჩლეთ ქვრივს.

¹⁸მოდით და ვიკამათოთ, — ამბობს უფალი. — ყირმიზივით რომ იყოს თქვენი ცოდვები, თოვლივით გასპეტაკდება, და ჭიაფერივით წითელიც რომ იყოს, მატყლივით გახდება.

¹⁹თუ მოინდომებთ და შეისმენთ, მიწის დოვლათს შეჭამთ,

²⁰მაგრამ თუ უარს იტყვით და ურჩობას გასწევთ, მახვილით მოისპობით, რადგან უფლის პირმა თქვა ეს.

²¹როგორ იქცა მეძავად ერთგული ქალაქი? სავსე იყო სამართლიანობით, სიმართლე დაივანებდა იქ, ახლა კი მკვლელები არიან.

²²შენი ვერცხლი წიდად იქცა, შენი ღვინო გაწყალდა.

²³შენი მთავარნი განდგომილნი არიან და მპარავთა მეგობრები. ქრთამები უყვართ და საზღაურს ელტვიან, ობოლს არ განიკითხავენ სამართლიანად და ქვრივის საჩივარს არ უყურებენ.

²⁴ამიტომ ამბობს მეუფე, ცაბაოთ უფალი, ისრაელის ძლიერი: რისხვას გადმოვანთხევ ჩემს მოწინააღმდეგეებზე და შურს ვიძიებ ჩემს მტრებზე!

²⁵ხელს შემოგიბრუნებ და გამოგადნობ, გაგწმედ ხენჯისგან, და მოგაცილებ ყველა მინარევს.

²⁶და დაგიბრუნებ შენს მსაჯულებს, როგორც თავდაპირველად იყო და შენს მრჩეველთ, როგორც დასაწყისში იყო; ამის შემდეგ გეწოდება შენ სამართლიანობის ქალაქი, სარწმუნო დედაქალაქი.

²⁷სიონი სამართლით გამოისყიდება და მისკენ მოქცეულნი — სიმართლით.

²⁸ყველა განდგომილი და ცოდვისმქნელი ერთად შეიმუსრება და უფლის მიმტოვებელნი მოისპობიან.

²⁹რადგან შერცხვებით მუხათა გამო, რომლებსაც თქვენ შენატროდით, და შერცხვებათ ბაღებისა, რომლებიც თქვენ ამოირჩიეთ;

³⁰რადგან იქნებით შიშველ მუხასავით და უწყლო ბაღივით.

³¹და ძენძად იქცევა ძლიერი, და მისი საქმე — ნაპერწკლად; და ორივე ერთად აბრიალდება, და ჩამქრობი არავინ იქნება.