Read ქართული ბიბლია, სრული ვერსია Isaiah 11 Bible Online

Isaiah 11 - ქართული ბიბლია, სრული ვერსია bible

Isaiah 11

¹და გამოვა ყლორტი იესეს მოჭრილი ძირკვიდან და ნორჩი ამონაყარი მისი ფესვებიდან.

²და დაივანებს მასზე უფლის სული, სული სიბრძნისა და გონიერებისა, სული რჩევისა და ძლიერებისა, სული ცოდნისა და უფლის მოშიშებისა.

³უფლის მოშიშება აავსებს მას. დანახულით არ განსჯის, და გაგონილით არ გადაწყვეტს.

⁴ღარიბთა საქმეებს პატიოსნად განსჯის, და სისწორით განიკითხავს ამ ქვეყნის ჩაგრულთ. ქვეყანას დასჯის თავისი სიტყვების კვერთხით, თავის ბაგეთა ქარით მოკლავს უკეთურს.

⁵შემოისარტყლება ჭეშმარიტებით და სიმართლე იქნება მისი სარტყელი.

⁶მგელი იცხოვრებს კრავთან ერთად, ჯიქი თიკნის გვერდით წამოწვება, ხბო და ლომი ერთად გამოიკვებებიან, და პატარა ბიჭი დამწყემსავს მათ.

⁷ძროხა და დათვი ერთად დაიმწყემსება, და მათი შვილები გვერდი-გვერდ წამოწვებიან, და ლომი ხარივით დაიწყებს ჩალის ჭამას.

⁸ძუძუთა ბავშვი ასპიტის ხვრელთან ითამაშებს და ბიჭუნა ხელს ჩაყოფს გველგესლას ბუნაგში.

⁹არ იბოროტებენ და არ იბილწებენ მთელს ჩემს წმიდა მთაზე, რადგან ქვეყანა აივსება უფლის ცოდნით, როგორც წყალი ავსებს ზღვას.

¹⁰და იქნება იმ დღეს: იესეს ფესვი ბაირაღად იდგება ხალხთათვის, და მისკენ გაემართებიან ერები; მისი ქვეყანა იქნება დიდებაში.

¹¹და იქნება იმ დღეს: უფალი მეორედ გაიწვდენს ხელს და დაიბრუნებს თავისი ხალხის ნატამალს, დაიბრუნებს გადარჩენილთ აშურიდან, ეგვიპტიდან, ფათროსიდან და ქუშიდან, ყელამიდან და შინყარიდან, ხამათიდან და ზღვისპირეთის მიწიდან.

¹²ბაირაღს აღუმართავს ერებს, შეკრებს ისრაელიდან დევნილთ, და იუდადან გაფანტულთ შემოიკრებს ქვეყნის ოთხივე კიდიდან.

¹³დაცხრება ეფრემის სიძულვილი, გაქრება იუდას მტრობა: ეფრემი აღარ შეიძულებს იუდას და იუდა აღარ დაემტერება ეფრემს.

¹⁴და დააცხრებიან ისინი ფილისტიმელთა ქვეყანას დასავლეთში, და ერთიანად ყველას გაძარცვავენ, ვინც აღმოსავლეთში ცხოვრობს. ედომსა და მოაბს ხელს დაადებენ, და ყამონელნი დაემორჩილებიან მათ.

¹⁵მაშინ უფალი ამოაშრობს ეგვიპტის ზღვის ყურეს, ხელს დააღერებს მდინარეზე, და გაგზავნის იქ თავის ძლიერ ქარს, და დაყოფს მდინარეს შვიდ ნაკადად, რომლის გადალახვაც ფეხგაუხდელად იქნება შესაძლებელი.

¹⁶და გზას გაუშლის წინ თავისი ხალხის ნატამალს, მათ, ვინც გადარჩა, — გზას აშურიდან, ისე, როგორც მისცა ისრაელიანთ ეგვიპტიდან მათი გამოსვლის დღეს.