Read ქართული ბიბლია, სრული ვერსია Isaiah 17 Bible Online

Isaiah 17 - ქართული ბიბლია, სრული ვერსია bible

Isaiah 17

¹წინასწარმეტყველება დამასკოზე. ქალაქი დამასკო გაქრება, ნანგრევებად იქცევა.

²ყაროყერის ქალაქებს მიატოვებენ სამუდამოდ, ცხვრის ფარების საძოვრებად იქცევა, დაეყრებიან და არავინ იქნება მათი წამომშლელი.

³აღარ ექნება ეფრემს ციხესიმაგრეები, აღარ დასხდებიან მეფეები დამასკოში. არამის ნატამალსაც იგივე დაემართება, რაც ისრაელიანთა დიდებას, — ამბობს ცაბაოთ უფალი.

⁴და იქნება იმ დღეს: დაკნინდება იაკობის დიდება, გამოიფიტება მისი გაფუებული ტანი.

⁵ყანის მკას დაემსგავსება ეს ყოველივე: მომკელის მარჯვენა რომ გადამკის ყანას, რეფაიმის ველზე რომ მოიმცვრევენ ჩაბნეულ თავთავს.

⁶გადარჩებიან მხოლოდ ცოტანი. ზეთისხილის ხის ბერტყასავით იქნება, როცა ბერტყის შემდეგ აქა-იქ თითო-ოროლა ნაყოფი რჩება კენწეროზე, ოთხი-ხუთი ცალი ტოტებზე, — ამბობს უფალი, ღმერთი ისრაელისა.

⁷იმ დღეს მიმართავს ადამიანი თავის შემოქმედს, თვალს მიაპყრობს ისრაელის წმიდა ღმერთს.

⁸და აღარ შეხედავს თავისი ხელით ნაგებ სამსხვერპლოებს, თვალს მოარიდებს იმას, რაც მისმა ხელმა გააკეთა: აშერას სვეტებს და სასაკმევლეებს.

⁹იმ დღეს დაიცლება მათი გამაგრებული ქალაქები — როგორც მიატოვეს ისრაელიანთა წინაშე ხიველებმა და ამორეველებმა ყველაფერი, და დაიწყება დიდი გავერანება.

¹⁰დაგავიწყდა ღმერთი, ის ვინც შენი მხსნელია. აღარ გახსოვს შენი სიმტკიცის კლდე. ნეტარების ბაღებს აშენებ და უცხოური ვაზი ჩაგიყრია.

¹¹რა დღესაც დარგავ, იმავე დღეს იზრდებიან — ნარგავები დილიდანვე ყვავიან, მაგრამ შენი მოსავალი გაქრება, როდესაც დადგება ტანჯვის დღე, უკურნებელი ტკივილების დღე.

¹²ვაი, ხმაურს უზღვავი ხალხისა! — ხმაურობენ ზღვის ხმაურით. ვაი, ხალხების ღრიალს! — ღრიალებენ ადიდებული მდინარის ღრიალით.

¹³ტომები ღრიალებენ, როგორც დიდი წყლები ღრიალებენ; მაგრამ როცა ის მათ დაემუქრება, გაიქცევიან შორს, და გაიხვეტებიან, როგორც ქარი მიანიავებს ბზეს გორდაგორ, და როგორც მტვერს — ქარბორბალა.

¹⁴დადგება მწუხრი და, აჰა, დაეცემა შიშისზარი და განთიადამდე ვეღარ გაძლებს. ასეთია ჩვენს მძარცველთა წილი და ჩვენს მაოხრებელთა ხვედრი.