Read ქართული ბიბლია, სრული ვერსია Isaiah 18 Bible Online

Isaiah 18 - ქართული ბიბლია, სრული ვერსია bible

Isaiah 18

¹ვაი, ფრთებმოშრიალე ქვეყანას, ქუშის მდინარეთა გაღმა რომ არის!

²ელჩებს რომ აგზავნის ზღვით, და მდინარეებზე — ჭილის ნავებით. წადით, მკვირცხლო მოციქულნო, ბრგე და უწვერულ ერთან, დასაბამიდან დღესაქამომდე ხალხთა დამთრგუნველთან და გადამთელავთან, რომლის ქვეყანასაც მდინარეები სერავენ!

³ქვეყნიერების ყველა მცხოვრებო და ყველა ბინადარო! როცა ბაირაღი აღიმართება მთებზე — დაინახავთ, და როცა რქის საყვირი ახმიანდება — გაიგონებთ!

⁴რადგან ასე მითხრა მე უფალმა: მშვიდად გადმოვიხედავ ჩემი განსასვენებელი ადგილიდან, როცა მზე გამობრწყინდება და ხვატი ჩამოდგება, როცა ალოობის პაპანაქებაში ცვარის ღრუბელი ჩამოეშვება.

⁵რადგან რთვლობის წინ, როცა ყვავილობა დამთავრებულია და მტევანი მწიფობას იწყებს, უფალი დანით აკაფავს ლერწმებს და რქებს მოაშორებს ვაზს.

⁶ყველაფერი მტაცებელ ფრინველებს მთებზე და ველის ნადირს დარჩება; გაიზაფხულებენ მასზე მტაცებელი ფრინველები და მიწის ყველა ცხოველი დაიზამთრებს იქ.

⁷მაშინ ძღვენს მიართმევს ცაბაოთ უფალს, ცაბაოთ უფლის ადგილას, სიონის მთაზე, ბრგე და უწვერული ერი, დასაბამიდან დღესაქამომდე ხალხთა დამთრგუნველი და გადამთელავი, რომლის ქვეყანასაც მდინარეები სერავენ.