Read ქართული ბიბლია, სრული ვერსია Isaiah 23 Bible Online

Isaiah 23 - ქართული ბიბლია, სრული ვერსია bible

Isaiah 23

¹წინასწარმეტყველება ცორზე. ივალალეთ, თარშიშის ხომალდებო, რადგან ცორი გაპარტახდა, აღარც სახლია, აღარც სახლში შესასვლელი. ქითიმის ქვეყნიდან დაბრუნებულებმა შეიტყვეს ეს ამბავი.

²იგლოვეთ, ზღვისპირეთის მკვიდრნო, ციდონის ზღვაოსანი ვაჭრები გამდიდრებდნენ შენ.

³დიდი წყლებით მოდიოდა შიხორის მარცვლეული, ნილოსის სანაპიროების სამკალი იყო მისი მოსავალი, სხვადასხვა ხალხებიდან ნაყიდი.

⁴გრცხვენოდეს, ციდონო! ასე ამბობს ზღვა, ზღვისპირეთის სიმაგრე: „არ განმიცდია მშობიარობის ტკივილები, არ მიშვია და არ გამიზრდია ჭაბუკნი, არ აღმიზრდია ქალწულები.“

⁵როდესაც ცორის ამბავს შეიტყობენ ეგვიპტელნი, ძრწოლა შეიპყრობთ.

⁶გადადით თარშიშში! იქვითინე, ზღვისპირეთის ტომო.

⁷ნუთუ ესაა თქვენი მხიარული ქალაქი, რომლის დასაბამი ძველისძველია? მისი ფეხები შორეთში დაატარებენ მას.

⁸ვინ გადაუწყვიტა ეს ცორს, ქალაქს, რომელიც გვირგვინებით ამკობდა მეფეებს, რომლის სოვდაგარნიც მბრძანებლობდნენ, რომლის ვაჭრებსაც პატივით ეპყრობოდა მთელი ქვეყანა?

⁹ცაბაოთ უფალმა გადაწყვიტა, შეებღალა ქედმაღლობა ყოველგვარი დიდებისა, დაემცირებინა ქვეყნის ყველა ღირსებანი.

¹⁰გაეშურე შენი ქვეყნისკენ, თარშიშის ასულო! რადგან აღარაა ნავსაყუდელი.

¹¹უფალმა ხელი დაუღერა ზღვას და შეძრა სამეფოები; უფალმა ბრძანა ქანაანზე, დაექციათ მისი ციხესიმაგრენი.

¹²მან თქვა: ვეღარ გაიხარებ ამიერიდან, შერცხვენილო ქალწულო, ციდონის ასულო! ადექი, გადადი ქითიმში, მაგრამ არც იქ გექნება მოსვენება.

¹³აჰა, ქალდეველთა ქვეყანა — ეს ხალხი უწინ არ იყო. აშურმა მისცა ის უდაბნოს ველურ არსებებს. აშურელებმა მიაყენეს მას საბრძოლო კოშკები, დაანგრიეს, გააცამტვერეს მისი ციხესიმაგრეები.

¹⁴ივალალეთ, თარშიშის ხომალდებო, რადგან თქვენი სიმაგრე შემუსრულია.

¹⁵და მოხდება იმ დღეს, დავიწყებული იქნება ცორი 70 წელიწადს — ერთი მეფის ცხოვრების დღეების კვალობაზე; 70 წლის ბოლოს დაემართება ცორს ის, რაც მეძავის სიმღერაშია:

¹⁶აიღე ქნარი, შემოიარე ქალაქი, დავიწყებულო მეძაო! ტკბილად დაუკარი, ბევრი იმღერე, იქნებ გაგიხსენონ შენ!

¹⁷70 წლის შემდეგ მოხედავს უფალი ცორს. და ისევ დაუბრუნდება ცორი თავის სიძვის გასამრჯელოს და იმეძავებს ქვეყნის ყველა სამეფოსთან დედამიწის ზურგზე.

¹⁸მაგრამ მისი ნავაჭრი და მისი მოგება მიძღვნილი იქნება უფლისადმი; არ დაგროვდება საგანძურებსა და საწყობებში, რადგან უფლის წინაშე მცხოვრებთათვის იქნება, რომ მაძღრისად ჭამონ და დიდებულად შეიმოსნენ.