Read ქართული ბიბლია, სრული ვერსია Isaiah 24 Bible Online

Isaiah 24 - ქართული ბიბლია, სრული ვერსია bible

Isaiah 24

¹აჰა, უფალი გააპარტახებს დედამიწას და უნაყოფოდ აქცევს მას; სახეს შეუცვლის და გაფანტავს მის მცხოვრებთ.

²ერთი ბედი ელის ერსა და ბერს, მონასა და მის ბატონს, მხევალსა და მის ქალბატონს, მყიდველსა და გამყიდველს, გამსესხებელსა და მსესხებელს, მევახშესა და მოვალეს.

³გაპარტახდება ქვეყანა და გაიძარცვება, რადგან უფალმა თქვა ეს სიტყვა.

⁴გლოვობს, იღუპება ქვეყანა, სასოწარკვეთილებაში მიილია ქვეყნიერება, იღუპებიან ქვეყნის ძლიერნი.

⁵დედამიწა შეიბილწა მის მკვიდრთა მიერ, რადგან გადაუხვიეს რჯულს, შეცვალეს წესი, დაარღვიეს საუკუნო აღთქმა.

⁶ამის გამო წყევლა ჭამს დედამიწას და ისჯებიან მისი მკვიდრნი; ამიტომ ქრებიან ქვეყნის მკვიდრნი, სულ ცოტაღა დარჩა ხალხი.

⁷მაჭარი დამწარდა, გახმა ვაზი, ოხრავს ყველა გულმხიარული,

⁸შეწყდა დაფდაფებით ლხინი, მიწყდა მოლხინეთა ჟრიამული, გაცუდდა ქნარების ჟღერა.

⁹სიმღერით აღარ სვამენ ღვინოს; ემწარებათ თაფლუჭი მის მსმელებს.

¹⁰დანგრეულია დაცლილი ქალაქი, დაიკეტა ყველა სახლი, ვეღარ შეხვალ.

¹¹ღვინოზე ტირიან ქუჩებში; ჩაჟამდა ყოველგვარი მხიარულება; განიდევნა ქვეყნიდან სიხარული.

¹²გაუდაბურდა ქალაქი. ნანგრევებად იქცა კარიბჭე.

¹³რადგან ასე იქნება შუაგულ ქვეყანაში, ხალხებს შორის, როგორც ზეთისხილის ჩამობერტყისას, როგორც მომცვრევისას, როცა მთავრდება მოსავლის აღება.

¹⁴ხმამაღალი, მხიარული ხმა ისმის — დასავლეთში უფლის დიდებას უმღერიან.

¹⁵აქეთ უფალი, აღმოსავლეთის მკვიდრნო! ზღვისპირეთის მკვიდრნო ადიდეთ უფლის სახელი, ისრაელის ღმერთისა.

¹⁶ქვეყნის კიდიდან ვისმინეთ სიმღერა: დიდება მართალს! და მე ვამბობ: ვაგლახ მე! ვაგლახ მე! ვაი მე! მზაკვარნი მზაკვრობენ, ზაკვით იმოსებიან მზაკვარნი.

¹⁷შიში, ორმო და მახეა შენთვის, ქვეყნის მკვიდრო!

¹⁸შიშის ხმაზე გაქცეული ხაროში ჩავარდება, და ხაროდან ამოსული მახეში გაებმება; რადგან გახსნილია ცის სარკმელნი და ქვეყნის საფუძვლები ირყევიან.

¹⁹ძლიერ დაილეწა ქვეყანა, სრულად დაიმსხვრა ქვეყანა, საშინლად შეირყა ქვეყანა.

²⁰მთვრალივით ბარბაცებს დედამიწა და აკვანივით ირწევა; ცოდვამ დაამძიმა; დაეცემა და ვეღარ აღდგება.

²¹და იქნება იმ დღეს: დასჯის უფალი ზეცაში ციურ მხედრობას და მიწაზე მიწის მეფეებს.

²²ტყვეებს ერთად შეკრებენ, და ორმოში ჩაყრიან, ჩაკეტავენ, და მრავალი დღის შემდეგ მოვა სასჯელი.

²³გაწბილდება მთვარე და შერცხვება მზეს, როცა ცაბაოთ უფალი გამეფდება სიონის მთაზე და იერუსალიმში. და თავის დიდებას მოუვლენს თავის უხუცესთ.