Read ქართული ბიბლია, სრული ვერსია Isaiah 25 Bible Online

Isaiah 25 - ქართული ბიბლია, სრული ვერსია bible

Isaiah 25

¹უფალო, შენა ხარ ჩემი ღმერთი! აღგამაღლებ შენ, ვადიდებ შენს სახელს, რადგან საოცრება მოიმოქმედე — ის იყო შენი ჩანაფიქრი შორეული დროიდან, და ახლა შენ გამოაჩინე ჭეშმარიტება.

²შენ აქციე ქალაქი ქვა-ღორღის გროვებად, გამაგრებული ქალაქი — ნანგრევებად, უცხოტომელთა სასახლეები აღარაა ქალაქში, აღარ აღდგება უკუნისამდე.

³ამიტომ გადიდებს შენ ძლიერი ერი, სასტიკ ტომთა ქალაქები ძრწიან შენს წინაშე.

⁴რადგან შენ ხარ საწყლის თავშესაფარი, თავშესაფარი გლახაკისა გაჭირვების ჟამს. შენ ხარ საფარი ქარიშხლით დევნილთა, ჩრდილი პაპანაქებაში; რადგან მტარვალთა სუნთქვა ქარიშხალს ჰგავდა კედელზე მიმწყდარს.

⁵როგორც ხვატმა უდაბნოში, შენ ჩაახშე მტრების გნიასი; როგორც ხორშაკი ღრუბლების ჩრდილში, ისე დაითრგუნა მოძალადეთა ზეიმი.

⁶ცაბაოთ უფალი გამართავს ამ მთაზე ხალხებისთვის უხვ ნადიმს, მსუყე საჭმელებით, წკრიალა ღვინოებით.

⁷და გააქრობს ამ მთაზე საფარველს ყველა ხალხებისა, ყველა ტომებს რომ ბურავს.

⁸შთანთქავს სიკვდილს საუკუნოდ, და მოწმედს უფალი ღმერთი ცრემლს ყოველ სახეს, და სირცხვილს მოხოცავს თავის ერს მთელს ქვეყანაზე; რადგან ასე ამბობს უფალი.

⁹და იტყვიან იმ დღეს: აჰა, ის, ჩვენი ღმერთია! მას მოველოდით; და მან გვიხსნა ჩვენ. ეს არის უფალი, მისი გვეიმედებოდა; ვილხინოთ და ვიხაროთ, რადგან გვიხსნა მან.

¹⁰რადგან დაადგება უფლის ხელი ამ მთას და გაითელება მოაბი თავის ადგილზე, როგორც ჩალა ითელება სანეხვეზე.

¹¹და გაშლის მოაბი ხელებს მის წიაღში, როგორც მოცურავე საცურაოდ; მაგრამ უფალი დაამდაბლებს მის სიამაყეს მისი ხელის ცბიერებასთან ერთად.

¹²და შენს გამაგრებულ მაღალ კედლებს ჩამოშლის, მიწაზე დაანარცხებს, გააცამტვერებს.