Read ქართული ბიბლია, სრული ვერსია Isaiah 26 Bible Online

Isaiah 26 - ქართული ბიბლია, სრული ვერსია bible

Isaiah 26

¹იმ დღეს იმღერებენ ამ სიმღერას იუდაში: გამაგრებული ქალაქი გვაქვს! ხსნა მოგვენიჭა ჩვენ, ის ზღუდეა ჩვენთვის და მიწაყრილი.

²გახსენით კარიბჭე! შემოვიდეს მართალი, რწმენის დამცველი ხალხი.

³სულით ძლიერთ, შენ გაუგზავნი კეთილდღეობას, რადგან შენზეა მონდობილი.

⁴მიენდეთ უფალს უკუნითი უკუნისამდე, რადგან უფალი ღმერთია საუკუნო კლდე.

⁵მან დაამხო მაღლის მკვიდრნი, აღზევებული ქალაქი; დაამხო, მიწასთან გაასწორა, გააცამტვერა.

⁶ფეხი თელავს მას, ბეჩავთა ფეხი, ღატაკთა ტერფები.

⁷მართლის გზა მოსწორებულია. უფალო, შენ ასწორებ მართალთა სავალს.

⁸შენი სამართლის გზებზე შენი იმედით ვიყავით უფალო; შენი სახელისა და შენი ხსოვნისაკენ იყო ჩვენი სულის წადილი.

⁹ჩემი სამშვინველით ვისწრაფოდი შენსკენ ღამით, და ჩემი სულით გეძებდი ჩემში განთიადიდან: რადგან, როდესაც მსჯავრს სდებდი ქვეყანას, სამართლიანობას სწავლობდნენ ქვეყნიერების მკვიდრნი.

¹⁰თუ შეწყალებული იქნებიან ბოროტნი, აღარ ისწავლიან სამართლიანობას. მართალთა ქვეყანაში უსამართლოდ მოიქცევიან და არ დაინახავენ უფლის სიდიადეს.

¹¹უფალო! აღმართული იყო შენი ხელი, მაგრამ ისინი არ უყურებდნენ მას; დაინახავენ და შერცხვებათ შენი ერის მოძულეთ; ცეცხლი შეჭამს შენს მტრებს.

¹²უფალო! შენ გვაძლევ მშვიდობას, რადგან ყველა ჩვენი საქმეები შენ მოიმოქმედე.

¹³უფალო, ღმერთო ჩვენო! შენს გარდა სხვებიც ბატონობდნენ ჩვენზე, ჩვენ კი სხვა არავინ ვიცით, შენს სახელს ვადიდებთ.

¹⁴მიძინებულნი ვერ გაცოცხლდებიან; აჩრდილები ვერ აღდგებიან: შენ დასაჯე და გაანადგურე ისინი, მოსპე მათი სახსენებელი.

¹⁵შენ გაამრავლე ხალხი, უფალო! შენ გაამრავლე ხალხი, შენ განდიდდი, განავრცე ქვეყნის კიდეები.

¹⁶უფალო! როცა გასაჭირი დგება, შენ დაგეძებთ; როდესაც სასჯელს გვიმზადებ, შიში და ძრწოლა გვიპყრობს.

¹⁷მსგავსად ფეხმძიმისა, მშობიარობის მოახლოებისას რომ იტანჯება და კივის ტკივილებისაგან, ასე ვართ შენს წინაშე, უფალო!

¹⁸ფეხმძიმედ ვიყავით, ვიტანჯეთ, მაგრამ მხოლოდ ქარი ვშობეთ; ხსნა ვერ მოვუტანეთ ქვეყანას, ქვეყნიერების მკვიდრი არ დაიბადებიან.

¹⁹გაცოცხლდებიან შენი მიძინებულნი. აღდგებიან გარდაცვლილთა გვამები. გამოიღვიძეთ და იყიჟინეთ, მტვრის ბინადარნო, რადგან შენი ცვარი ნათლის ცვარია! მიწა მკვდრებს გამოუშვებს.

²⁰წადი, ჩემო ხალხო, შედი შენს საკნებში და კარი ჩაიკეტე! ერთი წამით დაიმალე, სანამ რისხვა გადაივლიდეს.

²¹რადგან, აჰა, უფალი გამოდის თავისი ადგილიდან, რათა მოძებნოს მიწის მკვიდრთა ბოროტება. და მიწა გამოაჩენს მასზე დათხეულ სისხლს, და ვეღარ დაფარავს მასზე დახოცილთ.