Read ქართული ბიბლია, სრული ვერსია Isaiah 30 Bible Online

Isaiah 30 - ქართული ბიბლია, სრული ვერსია bible

Isaiah 30

¹ვაი, გაურჩებულ შვილებს, — ამბობს უფალი, — რჩევებს მიჰყვებიან, მაგრამ არა ჩემსას, კავშირებს კრავენ, მაგრამ არა ჩემი სულით, რათა ცოდვას ცოდვა მიუმატონ.

²მე არ მეკითხებიან და ისე მიდიან ეგვიპტეში, რათა განმტკიცდნენ ფარაონის ძალით, და ეგვიპტის ჩრდილს შეაფარონ თავი.

³მაგრამ ფარაონის მფარველობა სირცხვილად გექცევათ, ეგვიპტის ჩრდილში თავშეფარება — დამცირებად.

⁴რადგან მისი[12] მთავარნი უკვე ცოყანში არიან, მისმა მოციქულებმა ხანესამდე მიაღწიეს.

⁵მაგრამ ყველა ისინი შერცხვენილი არიან იმ ხალხის გამო, რომელიც ვერ შეეწევა მათ; რადგან ის ხალხი ვერც დაეხმარება მათ და ვერც გვერდში დაუდგება; მხოლოდ სირცხვილს აჭმევს და სამასხროდ გახდის.

⁶წინასწარმეტყველება სამხრეთის პირუტყვებზე. ტანჯვისა და წვალების ქვეყნის გავლით, საიდანაც გამოდიან ძუ და ხვადი ლომები, ასპიტები და მფრინავი ურჩხულები, სახედრებზე აკიდებული მიაქვთ მათ თავიანთი დოვლათი, და აქლემთა კუზით — თავიანთი საუნჯე გამოუსადეგარ ხალხთან.

⁷ეგვიპტის შემწეობა კი ამაო და ფუჭია; ამიტომაც შევარქვი მას: „უქმად მოქადული.“

⁸ახლა მიდი და დაუწერე მათ ეს დაფაზე, და წიგნში ამოკვეთე, რომ დარჩეს უკუნითი უკუნისამდე.

⁹რადგან ურჩი ხალხია ის, ცრუ ძენი; ძენი, რომელთაც არ სურთ უფლის რჯულის მოსმენა,

¹⁰რომლებიც მისნებს ეუბნებიან: ნუ მისნობთო! და წინასწარმეტყველთ: ნუ გვიწინასწარმეტყველებთო სიმართლეს, გვითხარით რამ საამებელი, გვიწინასწარმეტყველეთ რამ სამხიარულო.

¹¹გადადექით გზიდან, გადაუხვიეთ ბილიკიდან; თვალიდან მოგვაშორეთ ისრაელის წმიდა.

¹²ამიტომ ასე ამბობს ისრაელის წმიდა ღმერთი: რაკი თქვენ შეიძულეთ ეს სიტყვა და მიენდეთ ტყუილსა და სიცრუეს,

¹³ამიტომ ეს ურჯულოება თქვენთვის იქნება მუქარა, როგორც მაღალ კედელზე გაჩენილი ბზარი, რომელიც დაარღვევს მას ერთ წამში, ანაზდეულად ჩამოაქცევს. რომლის ჩამოქცევა მეყსეულად მოვა.

¹⁴და უფალი დაამსხვრევს მას, როგორც ლეწავენ თიხის ჭურჭელს, ნამსხვრევებად, რომ აქცევენ შეუბრალებლად ისე, რომ არ მოინახება იმ ნამსხვრევებში ნატეხი, კერიდან ცეცხლის ასაღებად, ან საგუბრიდან წყლის ამოსახაპად.

¹⁵რადგან ასე ამბობს უფალი ღმერთი, ისრაელის წმიდა: თქვენი გადარჩენა ის იქნება, რომ დაბრუნდეთ და მშვიდად იყოთ. თქვენი ძალა სიმყუდროვესა და იმედით ყოფნაშია. მაგრამ თქვენ ეს არ ისურვეთ.

¹⁶და ამბობდით: არა, ცხენებით გავქუსლავთო, — ამიტომაც გაქუსლავთ; ჩვენ სწრაფი ცხენებით გავჭენდებითო, — ამიტომაც სწრაფნი იქნებიან თქვენი მდევარნი.

¹⁷თუ ერთი დაგემუქრებათ, ათასნი გაიქცევით, ხუთნი დაგემუქრებიან და ყველანი გაიქცევით; ხოლო ვინც თქვენგან გადარჩება, როგორც ჭოკი ისე დარჩება მთის თხემზე, როგორც ბაირაღი ბორცვზე.

¹⁸მაგრამ უფალი დროს უცდის და შეგიწყალებთ, აღდგება და გიხსნით, რადგან სამართლის ღმერთია უფალი, ნეტარია ყველა მისი მოიმედე.

¹⁹სიონის ხალხო, და იერუსალიმში მცხოვრებნო, გაშრება თქვენი ცრემლები. როცა ხსნისთვის შეღაღადებთ, უფალი გიშველით. უმალ გიპასუხებთ, როგორც კი თქვენი ხმა მისწვდება.

²⁰და მოგცემთ უფალი გაჭირვებაში პურს და სიმძიმილში წყალს. და თქვენი მოძღვრები აღარ დაიმალებიან, და თქვენი თვალით იხილავთ თქვენს მოძღვარს.

²¹როცა მარჯვნივ ან მარცხნივ გადაუხვევთ გზიდან, ხმას გაიგონებთ ზურგიდან: „აი გზა, მას გაჰყევით!“

²²სიბილწედ შერაცხავთ თქვენი ძეგლების ვერცხლის პერანგებს და თქვენი კერპების ოქროს სამოსელს; მიმოფანტავთ მათ, როგორც სიბინძურეს; და ეტყვით მათ: აქედან მოშორდითო!

²³და მისცემს უფალი წვიმას შენს თესლს, რომელსაც მიწაზე დათესავ. და შენ მოგცემს პურს — მიწის მოსავალს — უხვსა და ყუათიანს; შენი სამწყსო იმ დღეს გაშლილ ველებზე იბალახებს.

²⁴შენი გუთნის ხარი და ვირი მარილიან ბზეს შეჭამს, ნიჩბითა და ფიწლით განიავებულს.

²⁵და ყოველი მაღალი მთიდან და ყოველი მაღალი ბორცვიდან ნაკადულები გადმოხეთქენ, დიდი შემუსვრის დღეს, როცა გოდლები დაეცემიან.

²⁶და იქნება მთვარის ნათელი, როგორც მზის ნათელი, და მზის ნათელი შვიდმაგად იბრწყინებს, შვიდი დღის ნათელივით, იმ დღეს, როდესაც უფალი შეუხვევს მოტეხილს თავის ხალხს და ჭრილობებს განუკურნავს.

²⁷აჰა, უფლის სახელი მოდის შორიდან, გიზგიზებს მისი რისხვა, გაუსაძლისია, მისი ბაგენი სავსეა მრისხანებით და მისი ენა დამბუგავი ცეცხლივითაა.

²⁸მისი სუნთქვა მოვარდნილი ღვართქაფივითაა, ყელამდე რომ უწვდენს, რათა გაცხრილოს ხალხები სიკვდილის ცხრილში, ლაგამი ამოსდოს ხალხებს რომ წარმართოს ცდუნებათაკენ.

²⁹იმღერებთ, როგორც წმიდა დღესასწაულის ღამეს, და გულით იხარებთ, როგორც უფლის მთისაკენ მიმავალი ხარობს სალამურის ხმაზე, ისრაელის კლდეზე რომ ადის.

³⁰იქუხებს უფლის მრისხანე ხმა, და თავის შემართულ მკლავს გამოაჩენს მძვინვარე რისხვაში და შემჭმელი ცეცხლის ალში, მეხისტეხასა და თავსხმაში, და მბუგავი ცეცხლის ალში, ქარიშხალსა და ქვის სეტყვაში.

³¹უფლის ხმა შეარყევს აშურს, უფალი კვერთხით ჰგვემს მას.

³²ყოველი დარტყმა სასჯელის კვერთხისა, რომელსაც უფალი დასცემს მას, დაფდაფთა და ქნართა ხმის თანხლებით იქნება; და ის ბრძოლით წავა მის წინააღმდეგ.

³³დიდი ხანია მზადაა დაკრძალვის კოცონი, გამზადებულია მეფის მისაღებად: დიდი კოცონია გაწყობილი ღრმა ორმოში — ცეცხლი მზადაა, მოგროვებულია ბევრი შეშა. უფლის სუნთქვა გააჩაღებს მას, მსგავსი გავარვარებული გოგირდის ნაკადივით.