Read ქართული ბიბლია, სრული ვერსია Isaiah 34 Bible Online

Isaiah 34 - ქართული ბიბლია, სრული ვერსია bible

Isaiah 34

¹მოდექით, წარმართნო, და მოისმინეთ; ტომებო, ყურად იღეთ! დაე, მოისმინოს მიწამ და მისმა სავსებამ, ქვეყნიერებამ და ყოველმა, რაც მასზე ცოცხლობს!

²რადგან უფალი მრისხანებს ყველა წარმართზე და წყრება — მთელ მათ მხედრობაზე. დაარისხა ისინი, გაწირა დასაკლავად.

³მათი დახოცილნი მიტოვებულ იქნებიან, მათი გვამები აყროლდება, მთებს მორწყავს მათი სისხლი;

⁴დალპება ცის მხედრობა, ცა ეტრატივით დაიგრაგნება, და მთელი მისი მხედრობა ჩამოცვივა, როგორც ფოთოლი სცვივა ვაზს, და როგორც დამჭკნარი ფოთოლი სცვივა ლეღვს.

⁵ცაში გამოჩნდება ჩემი მახვილი; ედომს დააცხრება — სასჯელს აღასრულებს იმ ხალხზე, რომელიც დასაღუპად დავარისხე.

⁶უფლის მახვილი სისხლშია დასვრილი! კრავების, ვაცების სისხლსა და ვერძთა თირკმელების ქონში ცურავს: მსხვერპლს სწირავენ უფალს ბოცრაში, დიდი დაკვლებია ედომელთა მიწაზე.

⁷მათთან ერთად ხოცავენ გარეულ ხარებს და მოზვრებს და უშობელებს, მიწა დათვრება სისხლით, და ნიადაგი ქონით გაიპოხება.

⁸შურისძიების დღე აქვს უფალს, საზღაურის წელი სიონის გამო.

⁹და იქცევა მისი მდინარეები ფისად და მისი ნიადაგი — გოგირდად. და მისი მიწა გავარვარებულ ფისად გადაიქცევა.

¹⁰არც ღამით, არც დღისით არ ჩაქრება; საუკუნოდ იდენს მისი კვამლი; თაობიდან თაობამდე უკაცრიელი იქნება ყოველთვის. უკუნეთიდან უკუნისამდე არავინ გაივლის იქ.

¹¹და დაიმკვიდრებენ მას ვარხვი და ზღარბი; ჭოტი და ყორანი დაიბუდებენ მასზე; და გადაიზომება ის მოოხრების ლარით და უკაცრიელების შვეულით.

¹²მისი დიდებულნი გამოაცხადებენ, რომ იქ აღარაა სამეფო. და მისი მთავარნი არარაობად იქცევიან.

¹³მის სასახლეებში ეკალ-ბარდი აღმოცენდება, ციხესიმაგრეებში — ჭინჭარი და კუროსთავი; და იქნება ის ტურების ბუნაგი, სირაქლემათა საყუდელი.

¹⁴და შეხვდებიან იქ უდაბნოს მხეცები აფთრებს, ჭინკები ერთმანეთს გასჩხავლებენ. იქ დაივანებს ალი და ჰპოვებს მშვიდ ადგილს.

¹⁵იქ დაიბუდებს ბუ, კვერცხებს დადებს და ბარტყებს გამოიყვანს, და შემოიკრებს ჩრდილში. იქ შეგროვდებიან ძერებიც, წყვილ-წყვილად მოფრინდებიან.

¹⁶მოძებნეთ უფლის წიგნში, წაიკითხეთ: არცერთი მათგანი არ დააკლდება იქ, სათითაოდ საძებარნი არ იქნებიან, რადგან უფლის ბაგეებმა ასე უბრძანა მათ, მისი სუნთქვა შეკრებს მათ იქ.

¹⁷ყველა მათგანს თავად უყრის წილს და საზომი ლარით გაუნაწილებს იმ მიწას მათ და მარად დაიმკვიდრებენ მას, თაობიდან თაობამდე დაეპატრონებიან მას.