Read ქართული ბიბლია, სრული ვერსია Isaiah 35 Bible Online

Isaiah 35 - ქართული ბიბლია, სრული ვერსია bible

Isaiah 35

¹გაიხარებს უდაბნო და ხრიოკი მიწა, გამხიარულდება ვრცელი ქვეყანა და შროშანივით აყვავდება.

²თვალისწარმტაცად აყვავდება და იხარებს; ლიბანის დიდებულებას შეიძენს, ქარმელისა და შარონის ბრწყინვალებას; ისინი იხილავენ უფლის დიდებას, ჩვენი ღმერთის სიდიადეს.

³განიმტკიცეთ ჩამოყრილი მკლავები და დასუსტებული მუხლები გაიმაგრეთ.

⁴უთხარით სულმოკლეთ: „განმტკიცდით, ნუ შეშინდებით; აჰა, თქვენი ღმერთი, შურისგება მოვა — ღვთის საზღაური, ის მოვა და გიხსნით.“

⁵მაშინ აეხილებათ თვალი ბრმებს და ყრუთ ყურები გაეღებათ.

⁶მაშინ ირემივით იხტუნებს ხეიბარი და მუნჯის ენა ამღერდება; რადგან უდაბნოში წყლები ამოხეთქავენ და მწყურვალ მიწაზე — ნაკადები.

⁷და იქცევა უდაბნოს წყლის მირაჟები ტბებად და მწყურვალი მიწა — წყლის ნაკადებად; ტურების სანებივრო ბუნაგი ლერწმითა და ლელით გადამწვანდება.

⁸შარაგზა იქნება იქ, და წმიდათა გზა დაერქმევა მას: უწმიდური არ გაივლის მასზე; განწმედის გზაზე მავალისთვის იქნება იგი; ამ გზით მავალნი — გამოუცდელნიც კი — არ შეცდებიან.

⁹არ იქნება იქ ლომი და ნადირი ვერ ავა იქ; ვერ გაიჭაჭანებს, და ივლიან მხოლოდ გადარჩენილნი.

¹⁰და დაბრუნდებიან უფლის გამოსყიდულნი, ავლენ სიონში მხიარული შეძახილებით. საუკუნო სიხარული იქნება მათ თავზე; ლხინსა და სიხარულს ეწევიან, დარდი და ოხვრა გაქრება.