Read ქართული ბიბლია, სრული ვერსია Isaiah 5 Bible Online

Isaiah 5 - ქართული ბიბლია, სრული ვერსია bible

Isaiah 5

¹ვუმღერებ ჩემს სატრფოს ჩემი ტრფობის სიმღერას მის ვენახზე. ვენახი ჰქონდა ჩემს სატრფოს პოხიერ გორაკზე.

²ღობე შემოავლო და ქვა აკრიფა, ვაზი ჩაყარა რჩეული და კოშკი ააგო შუაგულ ზვარში, საწნახელიც ამოკვეთა შიგ და ესავდა რჩეული ყურძენის მტევნებს, მაგრამ მან კრიკინა მოისხა.

³და ახლა, იერუსალიმის მცხოვრებნო და იუდას ხალხნო, გთხოვთ განმსაჯოთ:

⁴მეტი რა უნდა გამეკეთებინა ჩემი ვენახისათვის და რა არ გავუკეთე მას? რატომ ველოდი რჩეულ ყურძენს, როცა მან კრიკინა მოისხა?

⁵და ახლა გეტყვით, რასაც ვუზამ ჩემს ვენახს: ღობეს მოვარღვევ და გახდება საძოვარი, ზღუდეს მოვანგრევ და გასაჯეგი გახდება.

⁶ოხრად დავაგდებ და აღარც გაისხვლება და აღარც გაითოხნება; ნარ-ეკლი მოედება და ღრუბლებს ვუბრძანებ, არ აწვიმონ მასზე წვიმა.

⁷ცაბაოთ უფლის ვენახი ისრაელის სახლია, და იუდას ხალხი ნერგია მისი სიამისა; და ესავდა ის სამართალს და, აჰა, — ძალადობაა! ესავდა სიმართლეს და, აჰა, — სასოწარკვეთის ხმაა!

⁸ვაი თქვენ, სახლზე სახლს რომ მიიტაცებთ და მინდორზე მინდორს რომ იმატებთ და სხვას ადგილი აღარ რჩება, თითქოს მხოლოდ თქვენ უნდა ცხოვრობდეთ ქვეყანაზე.

⁹ჩემს გასაგონად თქვა ცაბაოთ უფალმა: მრავალი ასეთი სახლი დაიცლება — დიდი და ლამაზი — გამოცარიელდება.

¹⁰რადგან ათი ქცევა ვენახი ერთ ბათსაც ვერ გამოიღებს და ხომერი თესლი ეფასაც ვერ გამოიღებს.

¹¹ვაი მათ, დილაადრიან სასმელს რომ ეძებენ და გვიან ღამემდე უსხედან — ღვინო აღაგზნებს მათ.

¹²და ქნარი და ებანი, დაფი და სტვირი, და ღვინოა მათ ნადიმებზე; და უფლის საქმეს არ უყურებენ, და მის ხელთა ქმნილებას ვერ ხედავენ.

¹³უგონობის გამო განიდევნება ჩემი ხალხი; მისი ღირსეულნი შიმშილით გაწყდებიან, მისი ბრბო კი — წყურვილით.

¹⁴ამიტომ გააფართოვა შავეთმა ხახა და დააფჩინა პირი; და იქ ჩავა მისი ბრწყინვალება, მისი ხმაურიანი და ხალისიანი ბრბო.

¹⁵დამდაბლდება ადამიანი და დამცირდება კაცი, და ქედმაღალნი დახრიან თვალებს.

¹⁶და აღზევდება ცაბაოთ უფალი სამსჯავროზე, და წმიდა ღმერთი სიწმიდეს გამოაჩენს სამართალში.

¹⁷და აქ, როგორც საძოვარზე, დაიმწყემსება ცხვარი; და ბატკნები[2] საკვების ძებნას ნანგრევებში დაიწყებს.

¹⁸ვაი, მათ, ვინც ამაოების საბელებით მიითრევენ ურჯულოებას, და საურმე ჭაპნებით — ცოდვას;

¹⁹რომელნიც ამბობენ: „ისწრაფოს, დააჩქაროს თავისი საქმე, რათა ვიხილოთ; მოვიდეს და აღსრულდეს რჩევა ისრაელის წმიდა ღმერთისა, აი მაშინ კი დავრწმუნდებით.“

²⁰ვაი მათ, რომელნიც ავს კარგს უწოდებენ და კარგს — ავს, სიბნელეს სინათლედ თვლიან და სინათლეს — სიბნელედ, მწარეს ტკბილად თვლიან და ტკბილს — მწარედ.

²¹ვაი მას, ვისაც თავი ბრძენი ჰგონია და გონიერი — თავისი ჭკუით.

²²ვაი მათ, ღვინის სმით რომ ვაჟკაცობენ და მამაცობენ თაფლუჭის დაყენებით;

²³ქრთამით დამნაშავის გამამართლებელთ და ალალმართლის გამამტყუნებელთ.

²⁴ამიტომ, როგორც ბზეს შეჭამს ცეცხლის ენა და თივა ჩაიფერფლება ალში, მათი ფესვი ჩალპება და მათ ყვავილს ქარი წაიღებს, რადგან უკუაგდეს ცაბაოთ უფლის რჯული და ისრაელის წმიდის ნათქვამი არაფრად მიიჩნიეს.

²⁵ამიტომ აენთება უფლის რისხვა მის ხალხზე, და ხელს მოუღერებს ის თავის ხალხს და დაჰკრავს ისე, რომ შეიძვრიან მთები; და მათი მძორები სკორესავით ეყრება ქუჩებში, მაგრამ მაინც არ დაცხრება მისი რისხვა და მისი ხელი ისევ იქნება დაღერებული მათზე.

²⁶და ბაირაღს აუწევს შორეულ ხალხებს, და სტვენით ნიშანს მისცემს ქვეყნის განაპირას მცხოვრებთ, — და, აჰა, სწრაფად და მსუბუქად მოვლენ ისინი.

²⁷მათგან არავინ იქნება არც დაღლილი და არც დაქანცული; არც ჩასთვლემს ვინმეს და არც ჩაეძინება; სარტყელი არავის შეეხსნება წელზე და ფეხსაცმლის თასმა არავის გაუწყდება.

²⁸მათი ისრები წამახულია და მათი ყველა მშვილდი მოჭიმულია; მათი ცხენების ფლოქვები კაჟივითაა და მათ ეტლთა ბორბლები გრიგალივითაა.

²⁹მათი ღრიალი ლომის ღრიალია; და ღრიალებენ ისინი, ვით ლომის ბოკვერნი. და დაიღმუვლებენ ისინი და დაიტაცებენ ნადავლს, წაათრევენ და ვერავინ გამოგლეჯთ.

³⁰იმ დღეს მათი ღმუილი საკბილოზე იქნება ზღვის ღმუილივით. დახედავ მიწას და დაინახავ წყვდიადსა და ნაღველს, და ღრუბლები დაფარავენ სინათლეს.