Read ქართული ბიბლია, სრული ვერსია Isaiah 52 Bible Online

Isaiah 52 - ქართული ბიბლია, სრული ვერსია bible

Isaiah 52

¹გაიღვიძე, გაიღვიძე, შეიმოსე შენი ძალა, სიონ! შეიმოსე შენი დიდების სამოსი, იერუსალიმ, წმიდა ქალაქო! რადგან ვეღარ გაივლის შენს ქუჩებში წინადაუცვეთელი და უწმიდური.

²ჩამოიბერტყე მტვერი; ადექი, დატყვევებულო იერუსალიმ, ქედზე შეიხსენი ჯაჭვები, დატყვევებულო სიონის ასულო!

³რადგან ასე ამბობს უფალი: მუქთად იყავით მიცემულნი და ვერცხლით არ გამოისყიდებით.

⁴რადგან ასე ამბობს უფალი ღმერთი: ერთ დროს მწირობად ჩავიდა ჩემი ერი ეგვიპტეში; შემდეგ კი აშურმა უსამართლოდ დაიმონა იგი.

⁵ახლა რა დამრჩენია აქ? — ამბობს უფალი, — როცა ჩემი ხალხი მუქთად არის დატყვევებული, მისი მთავრები გოდებენ, — ამბობს უფალი, — და დღენიადაგ გაუთავებლად იბღალება ჩემი სახელი.

⁶ამიტომ შეიცნობს ჩემი ერი ჩემს სახელს; ამიტომ სწორედ იმ დღეს შეიცნობს, რომ მე იგივე ვარ, ვინც თქვა: „აჰა, მე აქა ვარ!“

⁷რა საამოა მთებზე მახარობლის ფეხის ხმა, მშვიდობის მაუწყებლის, სიკეთის მაცნის, ხსნის მოამბის, რომელიც ეუბნება სიონს: „გამეფდა შენი ღმერთი!“

⁸ხმა გაისმა შენი გუშაგებისა — მათ ხმა აღიმაღლეს, და ყველამ ერთად შეჰყიჟინა, რადგან თავისი თვალით ხედავენ უფლის დაბრუნებას სიონში.

⁹მხიარულად შემოსძახეთ ყველამ ერთად, იერუსალიმის ნანგრევებო, რადგან ანუგეშა უფალმა თავისი ერი, გამოისყიდა იერუსალიმი.

¹⁰დაიკაპიწა უფალმა წმიდა მკლავები ყველა ხალხების თვალწინ; და დაინახავს დედამიწის ყოველი კიდე ხსნას ჩვენი ღმერთის მიერ.

¹¹გაშორდით, გაშორდით, გამოდით იქიდან, ნუ შეეხებით უწმიდურს, გამოდით იქიდან, განიწმიდეთ, უფლის ჭურჭლის მტვირთველნო!

¹²მაგრამ გამოსვლისას არ იჩქარებთ და არც სირბილით ივლით, რადგან უფალი წაგიძღვებათ, და თქვენს უკან მცველად იგივე იქნება — ისრაელის ღმერთი.

¹³აჰა, წარემართება ჩემს მონას, აღიმართება, აიწევა და დიდად ამაღლდება.

¹⁴მრავალი მისი მნახველი განცვიფრდა, რადგან დამახინჯებული იყო მისი პირისახე ისე, როგორც არავისი, და მისი იერი ადამის ძისას აღარ ჰგავდა.

¹⁵აჰა, გაოცდებიან მრავალი ხალხები, მისი შემხედვარე მეფენი დადუმდებიან მის წინაშე, როცა იხილავენ იმას, რაც არავის უამბია მათთვის, და რაც არ სმენიათ, იმას გაიგებენ.