Read ქართული ბიბლია, სრული ვერსია Isaiah 56 Bible Online

Isaiah 56 - ქართული ბიბლია, სრული ვერსია bible

Isaiah 56

¹ასე ამბობს უფალი: „დაიცავით რჯული და ქმენით სამართალი, რადგან ახლოსაა ჩემი ხსნა, და ჩემი სიმართლე გაცხადდება.

²ნეტარია კაცი, ვინც ამას მისდევს, და ადამის ძე, ვინც მას შეითვისებს; ვინც იცავს შაბათს და ხელს არ იწვდის სიავის საქმნელად.“

³ნუ იტყვის უფალთან შემოერთებული უცხოტომელის ძე: უფალმა სრულიად გამმიჯნაო თავისი ერისაგან; და ნუ იტყვის საჭურისი: მე ხომ გამხმარი ხე ვარო!

⁴რადგან ასე ამბობს უფალი: „საჭურისებს, რომლებიც ჩემს შაბათებს იცავენ, ჩემს საწადელს ირჩევენ და ჩემს აღთქმას ინახავენ,

⁵მე მივცემ ჩემს სახლში და ჩემს კედლებში ადგილსა და სახელს უკეთესს, ვიდრე ჩემს ვაჟებსა და ასულებს; საუკუნო სახელს მივცემ მათ, რომელიც არასოდეს წაიშლება.

⁶და ასევე, უფალთან შემოერთებულ უცხოტომელთ, რომლებიც ემსახურებიან მას და უყვართ უფლის სახელი, რათა იყვნენ მისი მსახურნი; ყველას, შეუბღალავად რომ იცავს შაბათს, და ჩემს აღთქმას მოჭიდებულთ.

⁷მე მოვიყვან მათ ჩემს წმიდა მთაზე და გავახარებ ჩემს სამლოცველო სახლში; მათი სრულადდასაწველები და შესაწირავები სასურველი იქნება ჩემს სამსხვერპლოზე, რადგან ჩემს სახლს სამლოცველო სახლი დაერქმევა ყველა ხალხებისათვის.“

⁸ამბობს უფალი ღმერთი, გაფანტულ ისრაელიანთა შემკრები: „მასთან შეკრებილებთან კიდევ სხვებსაც შევკრებ.“

⁹მოდით, ველის ნადირებო, ტყის მხეცებო, მოდით და ჭამეთ!

¹⁰გუშაგნი აქ ბრმები არიან, უგუნურნი, ყველა მათგანი მუნჯი ძაღლია, არ შეუძლია ყეფა, ძილისგუდები არიან, დაბლა ყრიან, თვლემა უყვართ.

¹¹სულხარბი ძაღლები არიან, რომლებიც ვერ ძღებიან; მწყემსები არიან, უგონონი, ყველა თავისი გზით გაემართა, თითოეული — თავის ანგარებას ეძებს.

¹²და ამბობენ: „მოდით, ავიღოთ ღვინო და დავთვრეთ სასმელით, დღესაც გვეყოფა და ხვალისთვისაც ბევრი დარჩება!“