Read ქართული ბიბლია, სრული ვერსია Isaiah 61 Bible Online

Isaiah 61 - ქართული ბიბლია, სრული ვერსია bible

Isaiah 61

¹უფალი ღმერთის სულია ჩემზე, რადგან მცხო მე უფალმა გლახაკთა სახარებლად; წარმომავლინა, რათა წყლული გავუმრთელო გულშემუსვრილთ, ტყვეებს ვახარო გათავისუფლება და პატიმართ — დილეგის კარის გაღება;

²რათა გამოვაცხადო უფლის სასურველი წელი და ჩვენი ღმერთის შურისგების დღე, და რათა ვანუგეშო ყოველი მგლოვიარე,

³ვაუწყო სიონზე მყოფ მგლოვიარეთ, რომ მიიღებენ ნაცრის წილ დიადემას, გლოვის წილ — სიხარულის საცხებელს, მჭმუნვარე სულის წილ მშვენიერ სამოსელს, და უწოდებენ მათ სიმართლის მუხებს, უფლისგან დანერგილს მის სადიდებლად.

⁴და გააშენებენ საუკუნოვან ნაოხარებს, აღადგენენ წარსულის დღეთა ნანგრევებს და განაახლებენ დანგრეულ ქალაქებს, თაობიდან თაობამდე გაუდაბურებულთ.

⁵მოვლენ უცხოთა ნაშობნი და დამწყემსავენ თქვენს ფარებს; და უცხოთესლნი იქნებიან თქვენი მიწისმუშები და თქვენი მევენახეები.

⁶უფლის მღვდლებს გიწოდებენ, და თქვენზე იტყვიან: ჩვენი ღვთის მსახურნი არიანო; ხალხების დოვლათს შეჭამთ და მათი დიდება გადმოვა თქვენზე.

⁷თქვენი სირცხვილის ნაცვლად ორმაგი სიხარული მოგეზღვებათ, და შეურაცხების ნაცვლად — მხიარულება, ამიტომ თავიანთ ქვეყანაში ორმაგ წილს დაიმკვიდრებენ, და საუკუნო სიხარული ექნებათ.

⁸რადგან მე, უფალს, მიყვარს სამართალი, მძაგს ყაჩაღობა, მე მივაგებ მათ საზღაურს ჭეშმარიტებით და საუკუნო აღთქმას დავუდებ;

⁹და ცნობილი გახდება მათი მოდგმა წარმართთა შორის, და მათი შთამომავალნი — ერებს შორის; ყველა მათი მხილველი მიხვდება, რომ უფლის მიერ ნაკურთხი თესლია ის.

¹⁰სიხარულით ვიხარებ უფალში და მოილხენს ჩემი სული ჩემს ღმერთში, რადგან მან შემმოსა მე ხსნის სამოსლით, სიმართლის ტანსაცმელი ჩამაცვა მე, როგორც ნეფეს დამადგა გვირგვინი და როგორც სასძლო, მომრთო სამკაულებით.

¹¹რადგან, როგორც მიწა აღმოაცენებს მცენარეს და, როგორც ბაღი ზრდის ჭირნახულს, ისე უფალი ღმერთი გამოავლენს სამართალს და დიდებას ყოველი მოდგმის წინაშე.