Read ქართული ბიბლია, სრული ვერსია Isaiah 63 Bible Online

Isaiah 63 - ქართული ბიბლია, სრული ვერსია bible

Isaiah 63

¹„ვინ არის ის, ედომიდან რომ მოდის, ბოცრადან — მეწამული სამოსლით? ეს ვინ არის თავისი ბრწყინვალე სამოსლით თავისი ძალის სიდიადით მომავალი?“ — „მე ვარ, სიმართლის მთქმელი, ხსნის შემძლებელი.“

²„რატომ არის წითელი შენი სამოსელი და შენი მოსასხამი საწნახლის შხეფებით დასვრილივით?“ —

³„მე მარტო ვწურავდი საწნახელში, და ჩემიანი კაცი არ იყო ჩემთან. ვწურავდი განრისხებული და ვწნეხავდი გულისწყრომით; მათი სისხლი ეშხეფებოდა ჩემს მოსასხამს, და მთელი ჩემი სამოსელი დავსვარე.

⁴რადგან შურისგების დღეა ჩემს გულში და ჩემს გამოსყიდულთა წელიწადი დადგა.

⁵ვიყურებოდი და არ იყო ჩემი შემწე; მიკვირდა, რომ არ იყო მხარდამჭერი; და მიხსნა მე ჩემმა მარჯვენამ, და ჩემმა რისხვამ მიშველა.

⁶და დავთრგუნე მე ხალხები ჩემი მძვინვარებით და დავათვრე ჩემი რისხვით, და მიწაზე დავღვარე მათი სისხლი.“

⁷მადლს მივაგებ უფალს, ქება-დიდებას უფალს ყველა წყალობისთვის, რაც მოიმოქმედა ჩვენთვის უფალმა, და დიდი სიკეთისთვის, ისრაელის სახლზე რომ მოიმოქმედა თავისი მოწყალებით და, მრავალი წყალობით რომ მიაგო.

⁸მან თქვა: „ის ჭეშმარიტად ჩემი ერია, ძენი, რომლებიც არ მიღალატებენ.“ და იყო ის მათი მხსნელი.

⁹მათი ყველა ტანჯვები მისი ტანჯვები იყო, და მისი სახის ანგელოზი შველოდა მათ; თავისი სიყვარულითა და თავისი მოწყალებით გამოისყიდა ისინი, აიყვანა და ხელით ატარებდა მათ ძველ დღეთაგან.

¹⁰მაგრამ ისინი ეურჩნენ და დაამწუხრეს მისი წმიდა სული; ამიტომაც მტრად ექცა იგი მათ და თავად ებრძოდა.

¹¹და გაიხსენა მისმა ხალხმა მოსეს ძველი დღეები. სად არის ახლა ის, ვინც ამოიყვანა ისინი ზღვიდან თავისი სამწყსოს მწყემსებთან ერთად? სად არის ის, ვინც დადო მათზე თავისი წმიდა სული,

¹²ვინც წარმართა მოსეს მარჯვენა თავისი დიდებული მკლავით? ვინც გააპო წყლები მათ წინაშე, რათა გაეთქვა თავისი საუკუნო სახელი?

¹³მორევში მათი გამომყვანი წაუფორხილებლად უდაბნოს ცხენებივით?

¹⁴ხეობაში ჩასული ნახირივით დაავანა ისინი უფლის სულმა. ასე ატარებდი შენს ერს, რათა მოგეპოვებინა შენთვის დიდებული სახელი.

¹⁵გადმოიხედე ზეციდან და შეხედე შენი წმიდა და დიადი სავანიდან: სად არის შენი შურისგება და შენი ძლევამოსილება? შენი გულის ძვრა და შენი მოწყალება არ მოვიდა ჩემამდის.

¹⁶მხოლოდ შენა ხარ ჩვენი მამა; რადგან აბრაამი არ გვცნობს და ისრაელი თავისებად არ გვაღიარებს. შენა ხარ, უფალო, ჩვენი მამა. ჩვენი მხსნელია შენი სახელი დასაბამიდან.

¹⁷რატომ გვაცდენ ჩვენ, უფალო, შენი გზებიდან, ასასტიკებ ჩვენს გულებს, რათა არ გვეშინოდეს შენი? მოხედე შენს მონებს, შენს წილხვედრ შტოთ.

¹⁸მცირეხანს მბრძანებლობდა აქ შენი წმიდა ერი, მტრები შემოიჭრნენ შენს საწმიდარში.

¹⁹ისე ვართ, როგორც დასაბამს, როცა არ ხელმწიფებდი ჩვენზე, როცა არ ვიწოდებოდით შენი სახელით.