Read ქართული ბიბლია, სრული ვერსია Isaiah 64 Bible Online

Isaiah 64 - ქართული ბიბლია, სრული ვერსია bible

Isaiah 64

¹ნეტავ გაგერღვია ცა და ჩამოსულიყავ! მთები შეირყეოდნენ შენს წინაშე —

²ასე აბრიალებს ცეცხლი ფიჩხს, წყალს ადუღებს — შენ გამოუცხადებდი მტრებს შენს სახელს! შენი სახის წინაშე შეძრწუნდებოდნენ ხალხები.

³როდესაც შენ იქმოდი საშინელებებს, რომლებსაც არ ველოდით და ჩამოდიოდი, მთები დნებოდნენ შენს წინაშე.

⁴დასაბამიდან არ სმენიათ, ყური არ მოუკრავთ, თვალს არ უხილავს სხვა ღმერთი შენს გარდა, რომ მოემოქმედა ასეთი რამ თავის მოიმედეთათვის.

⁵შენ ეგებები მას, ვინც სიმართლეს იქმს სიხარულით, ვინც შენი გზებით დადის და გიხსენებს. შენ მრისხანებდი, რადგან ძველთაგან ვცოდავთ, და როგორღა გადავრჩებით?

⁶და გავხდით ჩვენ ყველანი უწმიდურებივით, წვირიანი სამოსელივით გახდა ყოველი ჩვენი სიქველე; ფოთოლივით დავჭკნით ყველანი და ჩვენმა ურჯულოებამ ქარივით წაგვხვეტა.

⁷და არავინაა შენი სახელის მხმობელი, რომელიც მაგრად მოგეჭიდებოდა, რადგან გვიფარავ შენს სახეს და მიგვატოვე ჩვენივე ურჯულოების მსხვერპლად.

⁸მაგრამ ახლა, უფალო, ჩვენი მამა ხარ შენ, ჩვენ თიხა ვართ, შენ კი ჩვენი გამომსახველი; შენი ხელის ნაკეთობა ვართ ჩვენ ყველანი.

⁹ნუ განრისხდები, უფალო, მეტისმეტად და სამუდამოდ ნუ გემახსოვრება ჩვენი ურჯულოება. აჰა, შეხედე, შენი ერი ვართ ჩვენ ყველანი.

¹⁰შენი სიწმიდის ქალაქები გაუდაბურდა, სიონი უდაბნოდ იქცა; — გაუკაცრიელდა იერუსალიმი.

¹¹სახლი ჩვენი სიწმიდისა და დიდებისა, სადაც გაქებდნენ ჩვენი მამები, ცეცხლმა შთანთქა, და ყოველივე ჩვენთვის ძვირფასი ნანგრევებად იქცა.

¹²ნუთუ ყოველივე ეს არ შეგძრავს, უფალო? კვლავ დადუმდები და უარესად დაგვტანჯავ?