Read ქართული ბიბლია, სრული ვერსია Isaiah 65 Bible Online

Isaiah 65 - ქართული ბიბლია, სრული ვერსია bible

Isaiah 65

¹გამოვეცხადე მათ, ვინც არ მკითხულობდა; მიპოვნეს მათ, ვინც არ მეძებდა. აქა ვარ, აქა ვარ-მეთქი! — ვეუბნებოდი ხალხს, რომელიც ჩემი სახელით არ იწოდებოდა.

²დღენიადაგ ხელს ვიშვერდი ურჩი ხალხისკენ, უკეთური გზით რომ დადიან თავიანთი ზრახვების კვალზე,

³ხალხისკენ, რომელიც გამუდმებით შეურაცხმყოფს თვალდათვალ! ჭალებში მსხვერპლს რომ სწირავენ და საკმეველს აკმევენ აგურებზე;

⁴აკლდამებში სხედან და მღვიმეებში ათევენ ღამეებს; ღორის ხორცს ჭამენ და საძაგელი ნახარში უდგათ ქოთნებში;

⁵და ამბობენ: „შეჩერდი, ნუ მომეკარები, რადგან მე წმიდა ვარ შენთვის.“ ეს კვამლია ჩემს საყნოსელად, ცეცხლი, რომელიც დღენიადაგ გიზგიზებს.

⁶აჰა, დაწერილია ეს ჩემს წინაშე. არ დავდუმდები, მივუზღავ, მთლიანად მივუზღავ მე მათ წიაღს.

⁷თქვენი ურჯულოების და თქვენი მამების ურჯულოების გამო, რომლებიც გუნდრუკს უკმევდნენ მთებზე, და ბორცვებზე შეურაცხმყოფდნენ მე, — ამბობს უფალი, — და გავზომავ წინდაწინ მათ ნამოქმედარს მათ წიაღში!

⁸ასე ამბობს უფალი: „როცა ყურძნის მტევანში თვალი შევა, იტყვიან: ‘ნუ დააზიანებ მას, რადგან კურთხევა არის მასში!’ მეც ასევე მოვექცევი ჩემს მონებს, რათა არ დავღუპო ყველანი.

⁹აღმოვაცენებ იაკობისგან თესლს და იუდასაგან — ჩემი მთების მემკვიდრეს, და დაიმკვიდრებენ მას ჩემი რჩეულნი და ჩემი მონები დასახლდებიან იქ.

¹⁰გახდება შარონი ცხვრის საძოვრებად და ყაქორის ველი — ნახირის დასაყრელად ჩემი ერისა, რომელმაც მომძებნა მე.

¹¹თქვენ კი, რომელთაც მიატოვეთ უფალი და დაივიწყეთ ჩემი წმიდა მთა, თქვენ, რომლებიც გადს უმზადებთ სუფრას და მენს სასმისებს უვსებთ,

¹²მე გადაგცემთ მახვილს და ყველანი დასაკლავად იქნებით მუხლმოყრილნი, რადგან მე გიხმობდით და არ გამომეპასუხეთ, ვლაპარაკობდი და არ ისმინეთ; და ბოროტს აკეთებდით ჩემს თვალში და, რაც არ მსურდა, იმას ირჩევდით.“

¹³ამიტომ ასე ამბობს უფალი ღმერთი: აი, ჩემი მონები შეჭამენ და თქვენ დაიმშევით; ჩემი მონები შესვამენ და თქვენ წყურვილი შეგიპყრობთ, ჩემი მსახურნი გაიხარებენ და თქვენ სირცხვილს ჭამთ;

¹⁴ჩემი მონები იმღერებენ გულის სიამით და თქვენ იყვირებთ გულისტკივილით, და სულშემუსვრილნი აქვითინდებით.

¹⁵დაუტოვებთ თქვენს სახელს საწყევრად ჩემს რჩეულთ, და დაგხოცავთ თქვენ უფალი ღმერთი. და თავის მონებს სხვა სახელს შეარქმევს.

¹⁶ვინც კურთხევას მოუხმობს თავის თავზე ქვეყნად, ჭეშმარიტების ღმერთის სახელით იკურთხება; და ვინც ქვეყნად დაიფიცებს, ჭეშმარიტების ღმერთის სახელით დაიფიცებს, რადგან დავიწყებული იქნება უწინდელი მწუხარებანი და დაფარული ჩემს თვალთაგან.

¹⁷რადგან, აჰა, მე ვქმნი ახალ ცასა და ახალ მიწას, აღარ გაიხსენებენ უწინდელს, ფიქრადაც არავის მოუვა.

¹⁸მაგრამ გაიხარებთ და ილხენთ უკუნისამდე იმით, რასაც მე შევქმნი: რადგან, აჰა, მე ვქმნი იერუსალიმს სალხენად და მის ერს სასიხარულოდ.

¹⁹და მეც მოვილხენ იერუსალიმზე და გავიხარებ ჩემი ხალხის გამო; მეტად აღარ გაისმება იქ ხმა მოთქმისა და გოდებისა.

²⁰იქ არ იქნება არც ბავშვი და არც მოხუცი, რომლის დღენიც არ იქნებიან აღვსილნი; და ასი წლის კაცი რომ მოკვდება, იტყვიან, რომ ჯერ დრო არა ჰქონდაო; ხოლო ვინც ას წელს ვერ მიაღწევს, წყეულად ჩაითვლება.

²¹აიგებენ სახლებს და შიგ თავად იცხოვრებენ; ვაზს ჩაყრიან და თავად მოისთვლიან ნაყოფს.

²²არ ააგებენ სხვის საცხოვრებლად, და ვაზს არ ჩაყრიან სხვის მოსასთვლელად, რადგან ჩემი ხალხის ასაკი ხის ასაკივით იქნება და თავადვე გაცვეთენ საკუთარი ხელის ქმნილებას ჩემი რჩეულნი.

²³ამაოდ არ დაშვრებიან და ბავშვებს სამსხვერპლოდ არ შობენ, რადგან უფლის კურთხეული თესლი არის ის და მთელი მათი მოდგმა.

²⁴და სანამ მომიხმობენ, მე ვუპასუხებ; ვიდრე ლაპარაკში იქნებიან, მე უკვე მოსმენილი მექნება.

²⁵მგელი და კრავი ერთად დაიმწყესება და ლომი ხარივით თივას მოძოვს, გველის საკვები კი მიწა იქნება: ისინი არ იბოროტებენ და არც რასმე წაახდენენ ჩემს წმიდა მთაზე, — ამბობს უფალი.