Read ქართული ბიბლია, სრული ვერსია Isaiah 7 Bible Online

Isaiah 7 - ქართული ბიბლია, სრული ვერსია bible

Isaiah 7

¹იუდას მეფის, ახაზის, იოთამის ძის, ყუზიას ძის დღეებში იყო, რომ გამოვიდნენ არამელთა მეფე რეცინი და ისრაელის მეფე ფეკახი, რემალიას ძე, იერუსალიმის წინააღმდეგ საომრად, მაგრამ ვერ დაიპყრეს.

²და ეუწყა დავითის სახლს ასე: ეფრემის მიწაზე დაბანაკდაო არამი. და გული შეერყა ახაზსა და მის ხალხს, როგორც ხეები ირყევიან ტყეში ქარისაგან.

³და უთხრა უფალმა ესაიას: წადით შენ და შენი ძე შეარ-იაშუბი, ახაზის შესახვედრად ზემო ტბორის წყალსადენის ბოლოს, მრეცხავთა ველის გზაზე რომ არის,

⁴და უთხარი მას: „მშვიდად იყავი, ნუ შეშინდები, ნუ წახდები იმის გამო, რომ რისხვით აინთო ეს ორი მხრჩოლავი მუგუზალი — არამელი რეცინი და რემალიას ძე.

⁵იმის გამო, რომ ბოროტი განიზრახეს შენს წინააღმდეგ არამელებმა, ეფრემელთ და რემალიას ძემ, როცა თქვეს:

⁶‘ავიდეთ იუდაში და შევაშინოთ ის, და დავიმორჩილოთ, და დავსვათ იქ მეფედ ტაბეელის ძე.’

⁷მაგრამ ასე ამბობს უფალი ღმერთი: არ გამოვა! ასე არ მოხდება!

⁸რადგან არამზე დამასკო მბრძანებლობს, დამასკოზე კი — რეცინი. კიდევ 65 წელი — და გაქრებიან ეფრემელნი.

⁹ეფრემზე მბრძანებლობს სამარია და სამარიაზე — რემალიას ძე. თუ თქვენი რწმენა მერყევია, თქვენც მერყევნი ყოფილხართ.“

¹⁰კვლავ ლაპარაკობდა უფალი ახაზთან და უთხრა:

¹¹„მოსთხოვე უფალს, შენს ღმერთს, ნიშანი: ქვესკნელიდან ან მაღლა ზეციდან.“

¹²და თქვა ახაზმა: „არ ვკითხავ და არ გამოვცდი უფალს.“

¹³მაშინ ესაიამ თქვა: „ისმინე, დავითის სახლო, არ გეყოთ ადამიანები რომ გასარჯეთ, ახლა ჩემი ღმერთის გარჯაც გინდათ?

¹⁴ამიტომ უფალი თვითონ მოგცემთ ნიშანს: აჰა, ქალწული დაორსულდება და შობს ძეს და უწოდებს მას სახელად ემანუელს. [3]

¹⁵სანამ ისწავლიდეს ბოროტისა და კეთილის გარჩევას, მისი საჭმელი ნაღები და თაფლი იქნება.

¹⁶და კიდევ, ვიდრე ისწავლიდეს ის ბოროტისა და კეთილის გარჩევას, იმ ორი მეფის მიწაზე, რომლებისაც შენ გეშინია, კაცი აღარ დარჩება.

¹⁷უფალი მოაწევს შენზე და შენს ხალხზე და შენი მამისსახლზე ისეთ დღეებს, როგორიც არ ყოფილა იუდასაგან ეფრემის განდგომის შემდეგ — აშურის მეფეს მოგივლენს.“

¹⁸იმ დღეს იქნება რომ სტვენით მოუხმობს უფალი ბუზს, რომელიც ეგვიპტის მდინარეების შესართავთანაა, და ფუტკარს, რომელიც აშურის ქვეყანაშია,

¹⁹და მოფრინდებიან და შეესევიან დაცლილ ველებსა და კლდეთა ნაპრალებს და ყოველ ეკლიან ბუჩქსა და ყოველ ღელეს.

²⁰იმ დღეს უფალი მოავლენს თქვენზე მდინარის გაღმიდან აშურის მეფისგან ნაქირავებ სამართებელს და გაგპარსავთ თავსა და ფეხის ბალანს, და წვერსაც მოგაკვეცთ.

²¹და იმ დღეს გამოზრდის კაცი ერთ დეკეულსა და ორ ცხვარს.

²²და იმდენს მოიწველიან ისინი, რომ ნაღებით გამოიკვებება ის, და ყველა ამ ქვეყანაზე გადარჩენილს ნაღები და თაფლი ექნება საკვებად.

²³და მაშინ იქნება, რომ ნავენახარი, სადაც ათასი ვაზი ათას ვერცხლად ფასობდა, ნარ-ეკლით დაიფარება.

²⁴მშვილდ-ისრით ივლიან იქ ადამიანები, რადგან მთელი ქვეყანა ნარ-ეკლით იქნება დაფარული.

²⁵იმ ფერდობებზე აღარ გახვალ, რომლებსაც თოხით ანარნარებდი, რადგან შეგეშინდება ნარ-ეკლისა და ჯაგნარის; საძოვრად გარეკავენ იქ ცხვარ-ძროხას, და საქონელი გადაჯეგავს მას.