Read ქართული ბიბლია, სრული ვერსია Isaiah 8 Bible Online

Isaiah 8 - ქართული ბიბლია, სრული ვერსია bible

Isaiah 8

¹და მითხრა უფალმა: „აიღე დიდი დაფა და დაწერე ზედ გარკვევით: ‘მაჰერ-შალალ-ხაშ-ბაზ.’“ [4]

²და ავიყვანე სარწმუნო მოწმენი: ურია მღვდელი და ზაქარია იებერექიას ძე.

³და მივუწექი ქადაგ ქალს; დაორსულდა ის და ძე გამიჩინა. და მითხრა უფალმა: „სახელად დაარქვი მას მაჰერ-შალალ-ხაშ-ბაზ,

⁴რადგან, სანამ ყმაწვილი შეძლებს თქვას: ‘მამა’ ან ‘დედა’, დამასკოს სიმდიდრესა და სამარიის ნადავლს წაიღებენ აშურის მეფის წინაშე.“

⁵და კვლავ მითხრა მე უფალმა:

⁶„იმის გამო, რომ ხალხმა მოიძულა შილოახის მდორე წყალი და შეხარიან რეცინსა და რემალიას ძეს,

⁷უფალი მიუგდებს მათ დიდი მდინარის უზღვავ და მქუხარე წყლებს — აშურის მეფეს და მთელ მის ძალას — და აიწევს მისი კალაპოტი, გადმოხეთქავს და წალეკავს მთელ სანაპიროებს.

⁸წარღვნასავით მოვა, იუდას წალეკავს, ყელამდე იქნება, ფრთებით დაფარავს მთელს შენს ქვეყანას, ემანუელ!“

⁹აბობოქრდით, ხალხებო, და თრთოდეთ! ყურად იღე, ქვეყნის კიდით-კიდევ! ბრძოლისთვის განემზადეთ და თრთოდეთ! ბრძოლისთვის განემზადეთ და თრთოდეთ!

¹⁰ბჭობდეთ, მაგრამ დაირღვევა თქვენი თათბირი, სიტყვა თქვით, მაგრამ არ შესრულდება, რადგან ჩვენთანაა ღმერთი!

¹¹აი რა მითხრა მე უფალმა, როცა ხელით შემეხო და მარიგებდა, რომ არ მევლო ამ ხალხის გზებით. მან მითხრა:

¹²„შეთქმულებას ნუ დაარქმევთ ყოველივე იმას, რასაც ეს ხალხი შეთქმულებას უწოდებს. და ნურც იმისი შეგეშინდებათ, რისიც მათ ეშინიათ, და ნურც შეძრწუნდებით.

¹³წმიდად შერაცხეთ ცაბაოთ უფალი, მისი შიშის ზარი გცემდეთ.

¹⁴ის იქნება სიწმიდე და დაბრკოლების ქვა, ქვა, რომელსაც ფეხს წამოჰკრავს ისრაელიანთა ორივე სამეფო; მახე და ბადე იქნება ის იერუსალიმის მკვიდრთათვის.

¹⁵მრავალნი წაიბორძიკებენ მასზე, დაეცემიან, ჩაცვივიან და შეპყრობილ იქნებიან.

¹⁶შეკარი ეს მოწმობა, ბეჭედი დაასვი ამ დარიგებას, იყოს ეს ჩემს მოწაფეთათვის.“

¹⁷უფლის იმედით ვიქნები, თუმცა მან გარემიიქცია სახე იაკობის სახლისგან. და მე ვესავ უფალს.

¹⁸აჰა, მე და ბავშვები, რომლებიც მომცა მე უფალმა, როგორც ნიშნები და სასწაულები ისრაელიანთათვის ცაბაოთ უფლისგან, რომელიც სიონის მთაზეა დავანებული.

¹⁹თუ გეტყვიან: რჩევისთვის მიმართეთო მკვდრის გამომძახებელთ და გრძნეულთ, მოჩურჩულეთ და მობუტბუტეთ — განა ყოველი ხალხი თავის ღმერთს არ გამოჰკითხავს მკვდართა მეშვეობით ცოცხალთათვის?

²⁰რჯულსა და მოწმობას ვფიცავ, უეჭველად ასე გეტყვიან, მაგრამ ასეთ სიტყვას ძალა არა აქვს.

²¹და ჩაივლის იქ სასოწარკვეთილი და მშიერი და განრისხებული დასწყევლის თავის მეფესა და თავის ღმერთს, და აიხედავს ზემოთ,

²²ან მიწას დახედავს და, აჰა, ყველგან ვაება და წყვდიადი. უკუნეთში არიან განდევნილი. მაგრამ აღარ იქნება წყვდიადი ჩაგრულთათვის.[5]