Read ქართული ბიბლია, სრული ვერსია Leviticus 14 Bible Online

Leviticus 14 - ქართული ბიბლია, სრული ვერსია bible

Leviticus 14

²ეს იქნება წესი კეთროვანისა მისი გასუფთავების დროს: იგი უნდა მიიყვანონ მღვდელთან;

³გავა მღვდელი ბანაკს გარეთ, და თუ ნახავს, რომ განიკურნა კეთროვანი კეთრისაგან,

⁴ბრძანებს, გასაწმიდავებლისთვის მოიყვანონ ორი ცოცხალი წმიდა ფრინველი, კედარის ხის ნაჭერი, ნართი ძოწეულის ფერისა და უსუპის კონა,

⁵და უბრძანებს მღვდელი და დააკვლევინებს ერთ ფრინველს გამდინარე წყლით სავსე თიხის ჭურჭელზე,

⁶აიღებს ცოცხალ ფრინველს, კედარის ხის ნაჭრის, ძოწეულის ფერის ნართს, უსუპის კონას და ამოავლებს მათ დაკლული ფრინველის სისხლში,

⁷მიასხურებს კეთრისაგან გაწმედილს შვიდგზის და გამოაცხადებს მას გაწმედილად და ცოცხალ ფრინველს ველზე გაუშვებს.

⁸განწმედილმა გაირეცხოს სამოსი, გაიკრიჭოს მთელი თმა და განიბანოს წყლით, და გახდება სუფთა; შემდეგ მივიდეს ბანაკში, მაგრამ კარვის გარეთ იცხოვროს შვიდ დღეს.

⁹მეშვიდე დღეს გაიპარსოს მთელი თმა, თავი და წვერი, და წარბები, მთელი თმა გაიპარსოს, და გაირეცხოს სამოსი და განიბანოს სხეული წყლით, და ასე გახდება სუფთა.

¹⁰მერვე დღეს აიყვანოს ორი უხინჯო კრავი და ერთი წელგამოვლილი უხინჯოდედალი ცხვარი და ეფის სამი მეათედი წმიდა პურის გამტკიცული ფქვილი პურეულ ძღვნად, ზეთში შეზელილი, და ერთი ლოგი ზეთი.

¹¹განმწმედი მღვდელი დააყენებს გასაწმენდს ამ შესაწირავით უფლის წინაშე, საკრებულო კარვის შესასვლელთან;

¹²აიყვანს მღვდელი ერთ კრავს და შესწირავს მას დანაშაულის გამოსასყიდ მსხვერპლად, და ერთ ლოგ[3] ზეთთან ერთად აღმართავს უფლის წინაშე.

¹³და დაკლავს კრავს იმ ადგილას, სადაც კლავენ ცოდვის გამოსასყიდ მსხვერპლსა და სრულადდასაწველს, წმიდა ადგილზე, რადგან მსგავსად ცოდვის მსხვერპლისა, დანაშაულის ეს მსხვერპლიც ეკუთვნის მღვდელს. უწმიდესია ის.

¹⁴აიღებს მღვდელი დანაშაულის გამოსასყიდი მსხვერპლის სისხლს და განსაწმედს სცხებს მარჯვენა ყურის ბიბილოზე და მარჯვენა ხელის ცერსა და მარჯვენა ფეხის ცერზე;

¹⁵აიღებს მღვდელი ზეთს მისი ლოგიდან და დაისხამს მარცხენა ხელისგულზე;

¹⁶და დააწობს მღვდელი მარჯვენა თითს ზეთში, რომელიც მარცხენა ხელისგულზეა უსხია და შვიდგზის მოაპკურებს თითით შვიდგზის უფლის წინაშე;

¹⁷დანარჩენ ზეთს, რომელიც ხელისგულზე უსხია, განსაწმედს სცხებს მარჯვენა ყურის ბიბილოზე, მარჯვენა ხელის ცერსა და მარჯვენა ფეხის ცერზე, იქ, სადაც დანაშაულის მსხვერპლის სისხლი სცხია;

¹⁸ხოლო ნარჩენ ზეთს, რაც მღვდელს ხელისგულზე უსხია, განსაწმედს სცხებს თავზე და გამოითხოვს მისთვის შენდობას უფლის წინაშე.

¹⁹შესწირავს მღვდელი ცოდვის გამოსასყიდ მსხვერპლს და განწმედს განსაწმედს მისი უწმიდურებისაგან; და მერე დაკლავს სრულადდასაწველს მსხვერპლს.

²⁰და შესწირავს მღვდელი სრულადდასაწველს და პურეულ ძღვენს საკურთხეველზე; და განწმედს მას მღვდელი და სუფთა იქნება იგი.

²¹თუ ღარიბია იგი და ხელი არ მიუწვდება ამდენზე, აიყვანოს ერთი კრავი დანაშაულის მსხვერპლად, თავისი შენდობის შესარხევ მსხვერპლად, და ეფის მეათედი წმიდა პურის გამტკიცული ფქვილი, ზეთში აზელილი, პურეულ ძღვნად, და ერთი ლოგი ზეთი,

²²და ორი გვრიტი ან მტრედის ორი მართვე, რაზეც მიუწვდება ხელი, და იქნება ერთი ცოდვის გამოსასყიდი მსხვერპლი, ხოლო მეორე — სრულადდასაწველი.

²³მიიტანოს ისინი თავისი განწმენდის მერვე დღეს მღვდელთან საკრებულო კარვის შესასვლელთან, უფლის წინაშე;

²⁴და აიღებს მღვდელი დანაშაულის მსხვერპლის კრავს და ზეთის ლოგს და შეარხევს უფლის წინაშე,

²⁵და დაკლავს კრავს დანაშაულის მსხვერპლად; და აიღებს მღვდელი დანაშაულის მსხვერპლის სისხლს, და წაუსვამს განსაწმედს მარჯვენა ყურის ბიბილოზე, მარჯვენა ხელის ცერსა, და მარჯვენა ფეხის ცერზე;

²⁶დაისხამს მღვდელი ზეთს მარცხენა ხელისგულზე,

²⁷და მარჯვენა თითით აპკურებს ზეთს, რაც მარცხენა ხელისგულზე უსხია, უფლის წინაშე შვიდგზის,

²⁸და სცხებს მღვდელი ზეთს, რომელიც ხელისგულზე უსხია, განსაწმედს მარჯვენა ყურის ბიბილოზე, მარჯვენა ხელის ცერსა და მარჯვენა ფეხის ცერზე, იქ, სადაც დანაშაულის გამოსასყიდი მსხვერპლის სისხლი სცხია;

²⁹ხოლო ნარჩენ ზეთს, რაც მღვდელს ხელისგულზე უსხია, იგი განსაწმედს თავზე სცხებს, და გამოითხოვს მისთვის შენდობას უფლის წინაშე.

³⁰და გაამზადებს ერთ-ერთ გვრიტს ან მტრედის ხუნდს, რაზეც მიუწვდება ხელი:

³¹ერთს ცოდვის გამოსასყიდ მსხვერპლად, ხოლო მეორეს სრულადდასაწველად პურეულის ძღვენთან ერთად; და განწმედს მღვდელი განსაწმედელს უფლის წინაშე.

³²ესაა წესი იმისთვის, ვისაც კეთროვანი წყლული აქვს და ვინც ხელმოკლეა თავის განწმენდისას.

³³და ელაპარაკებოდა უფალი მოსეს და აარონს და უთხრა:

³⁴რაჟამს შეხვალთ ქანაანის ქვეყანაში, რომელსაც მე გაძლევთ დასამკვიდრებლად, და მე მოვგვრი კეთროვან წყლულს თქვენს სამფლობელო ქვეყანაში რომელიმე სახლს,

³⁵და წავა ის, ვისიცაა სახლი, და განუცხადებს მღვდელს: თითქოს წყლული შევამჩნიეო ჩემს სახლში,

³⁶უბრძანებს მღვდელი და დაცლიან სახლს, ვიდრე მივა იგი წყლულის სანახავად, რათა არ გაუწმიდურდეს ყოველივე, რაც სახლშია; და მერე მივა ის სახლის სანახავად.

³⁷იხილავს წყლულს, და ნახავს, რომ წყლული სახლის კედლებზეა, მომწვანო ან მოწითალო ღრმულებად. და თუ ის ჩაღრმავებულია კედლებში,

³⁸გავა მღვდელი სახლიდან მისი შესასვლელისკენ და ჩაკეტავს სახლს შვიდი დღით.

³⁹მეშვიდე დღეს კვლავ მივა, და თუ დაინახავს, რომ წყლული გავრცელებულა სახლის კედლებზე,

⁴⁰უბრძანებს იგი და ამოტეხენ ქვებს, რომლებზეც წყლულია, და გადაყრიან ქალაქგარეთ უწმიდურ ადგილზე;

⁴¹სახლს ჩამოფხეკენ შიგნიდან მთლიანად, და გადაყრიან ჩამოფხეკილ ნაგავს ქალაქგარეთ უწმიდურ ადგილზე.

⁴²აიღებენ სხვა ქვებს და ჩადგამენ იმ ქვების ნაცვლად, მოზელენ სხვა ბათქაშს და გალესენ სახლს.

⁴³თუ წყლული კვლავ გამოჩნდა და აყვავდა სახლში მას შემდეგ, რაც ქვები გამოტეხეს, კედლები ჩამოფხიკეს და გალესეს,

⁴⁴მივა მღვდელი და ნახავს, რომ წყლული გავრცელებულა სახლზე, ეს მწვავე კეთრია სახლში, და სახლი უწმიდურია;

⁴⁵უნდა დაანგრიონ სახლი, მისი ქვები, მისი ხე-ტყე და მთელი მისი ნაშალი უნდა გაიტანონ ქალაქგარეთ უწმიდურ ადგილზე.

⁴⁶ყველა იმ სახლში შემსვლელი იმ დღეებში, როცა ის ჩაკეტილი იყო, უწმიდური იქნება საღამომდე.

⁴⁷და ვინც იმ სახლში დაიძინებს ანდა საჭმელს შეჭამს, უნდა გაირეცხოს სამოსი.

⁴⁸თუ მოვა მღვდელი და ნახავს, რომ წყლული სახლზე არ გავრცელდა სახლის გალესვის შემდეგ, ის სახლს სუფთად ჩათვლის, რადგან წყლული განიკურნა.

⁴⁹აიღებს იგი სახლის გასაწმიდავებლად ორ ფრინველს, კედარის ხის რტოს, და ძოწეულის ფერის ნართს, და უსუპის კონას,

⁵⁰და დაკლავს ერთ ფრინველს გამდინარე წყლით სავსე თიხის ჭურჭელზე,

⁵¹და აიღებს კედარის ხის რტოს და უსუპის კონას, და ძოწეული ფერის ნართს, და ცოცხალ ფრინველს, და ამოავლებს მათ დაკლული ფრინველის სისხლში და სასმელ წყალში, და შვიდგზის მოასხურებს სახლს.

⁵²გაასუფთავებს სახლს ფრინველის სისხლით და გამდინარე წყლით, და ცოცხალი ფრინველით, და კედარის ხის რტოთი, უსუპის კონითა და ძოწეულის ფერის ნართით;

⁵³და გაუშვებს ცოცხალ ფრინველს ქალაქგარეთ ველზე, და შეუნდობს სახლს, და გასუფთავდება იგი.

⁵⁴ეს არის წესი კეთრისა და ქეცისა და ყოველი წყლულისა.

⁵⁵სამოსლისა და სახლის კეთრისა,

⁵⁶სიმსივნისა, ქეცისა და ლაქებისა,

⁵⁷რათა მიეთითოს, როდის არის ეს უწმიდურება და როდის სისუფთავე. ესაა კეთრის წესი.