Read ქართული ბიბლია, სრული ვერსია Jeremiah 10 Bible Online

Jeremiah 10 - ქართული ბიბლია, სრული ვერსია bible

Jeremiah 10

¹ისმინე სიტყვა, ისრაელის სახლო, რომელსაც უფალი გეუბნება შენ.

²ასე ამბობს უფალი: ნუ ისწავლით წარმართთა გზას და ცის ნიშნებისა ნუ შეგეშინდებათ, რომლებისაც წარმართებს ეშინიათ.

³რადგან ადამიანთა კერპები არარაობაა: ტყეში მოჭრეს ხე, დურგლმა გათალა ნაჯახით,

⁴ვერცხლითა და ოქროთი დაფერა და ლურსმნებითა და ჩაქუჩით დაამაგრა, რომ არ ირყეოდეს.

⁵ბოსტანში დადგმულ საფრთხობელას ჰგვანან, ლაპარაკი არ შეუძლიათ, ხელით ატარებენ, რადგან თავად ვერ დადიან; ნუ შეგეშინდებათ მათი, რადგან ვერ იბოროტებენ, მაგრამ არც სიკეთის ქმნა შეუძლიათ.

⁶არავინ არის შენი მსგავსი, უფალო, დიდი ხარ შენ და დიდი ძალისაა შენი სახელი.

⁷ვის არ შეეშინდება შენი, ხალხთა მეუფევ? მხოლოდ შენ ერთს გეკუთვნის ეს; რადგან წარმართთა ყველა ბრძენს შორის და ყველა მათ სამეფოში არავინ არის შენი მგავსი.

⁸ყველა ერთიანად გამოტვინდა და გასულელდა, ხის კერპია მათი ჭკუის მასწავლებელი,

⁹თარშიშის ვერცხლით და უფაზის ოქროთი მოჭედილი, დურგლისა და ოქრომჭედლის ნახელავი; მათი სამოსელი — იაკინთი და ძოწეული — ოსტატთა ნახელავია.

¹⁰უფალი კი ჭეშმარიტი ღმერთია, ის არის ცოცხალი ღმერთი და საუკუნო მეფე, დედამიწა ირყევა მისი რისხვით და ვერ უძლებენ ხალხები მის რისხვას.

¹¹ასე უთხარით მათ: ღმერთები, რომელთაც არ შეუქმნიათ ცა და მიწა, გაქრებიან ამ ქვეყნიდან და ცისქვეშეთიდან.

¹²უფალმა შექმნა დედამიწა თავისი ძალით, განამტკიცა სამყარო თავისი სიბრძნით, და თავისი გონიერებით განავრცო ზეცა,

¹³მის ხმაზე ხმაურობენ წყლები ზეცაში, ღრუბლები ამოჰყავს მას ქვეყნის კიდეებიდან, ის წარმოშობს საწვიმრად ჭექა-ქუხილს, აგზავნის ქარს თავისი საგანძურებიდან.

¹⁴უვიცობისგან გაბრიყვდა ადამიანი, შერცხვენილია ოქრომჭედელი თავისი კერპით, რადგან ფუჭია მისი ქანდაკი, სული არ უდგას.

¹⁵სრული სიცარიელეა ისინი — საქმე ცთომილებისა, მათი განკითხვისას გაქრებიან ისინი.

¹⁶ასეთი არ არის იაკობის წილხვედრი, რადგან იგია ყოველივეს შემოქმედი, ისრაელი კი მისი სამკვიდროს კვერთხია, ცაბაოთ უფალია მისი სახელი.

¹⁷აიკრიფე გუდა-ნაბადი და დატოვე შენი ქვეყანა, ალყაში მოქცეულო!

¹⁸რადგან ასე ამბობს უფალი: აჰა, მე გავდევნი ახლა ამ ქვეყნის მცხოვრებთ, ამჯერად უბედურებას დავატეხ მათ თავს, რათა ბოლომდე შესვან იგი.

¹⁹ვაი, ჩემს უბედურებას! უკურნებელია ჩემი წყლული! ვიფიქრე: ნამდვილად ეს იყო-მეთქი ჩემი უბედურება და მე მეწია-მეთქი ის!

²⁰ჩემი კარავი გაძარცვულია და ყველა საბელი გაწყვეტილია, ჩემი ძენი წავიდნენ ჩემგან და აღარ არიან: აღარავინ მყავს კარვის გამშლელი და ფარდების გამჭიმავი.

²¹გამიგიჟდნენ მწყემსები და არ მოიკითხეს უფალი, გაუგუნურდნენ და მთელი მათი სამწყსო გაიფანტა.

²²ხმა დადის: აჰა, ის მოდის, და დიდი ღრიანცელი ჩრდილოეთის ქვეყნიდან, რათა უდაბნოდ აქციოს იუდას ქალაქები და ტურების ბუნაგად.

²³ვიცი, უფალო, რომ ადამიანის ხელთ არაა მისი გზა, რომ მავალი ვერ წარმართავს თავის ნაბიჯებს.

²⁴დამსაჯე მე, უფალო, ოღონდ სამართლით და არა შენი რისხვით, რათა არ დამამცრო.

²⁵გადმოანთხიე შენი გულისწყრომა წარმართებზე, რომლებიც არ გიცნობენ, და ტომებზე, რომლებიც შენს სახელს არ მოუხმობენ; რადგან შეჭამეს მათ იაკობი, მოსპეს ის და მოაოხრეს მისი საძოვრები.