Read ქართული ბიბლია, სრული ვერსია Jeremiah 13 Bible Online

Jeremiah 13 - ქართული ბიბლია, სრული ვერსია bible

Jeremiah 13

¹ასე მითხრა უფალმა: წადი და იყიდე სელის სარტყელი, შემოირტყი წელზე და წყალში არ დაგისველდეს.

²ვიყიდე სარტყელი უფლის სიტყვისამებრ და შემოვირტყი თეძოებზე.

³და იყო უფლის სიტყვა ჩემს მიმართ მეორედ:

⁴აიღე ეს სარტყელი, რომელიც იყიდე და თეძოებზე გაქვს შემორტყმული; ადექი და წადი ევფრატზე და დამალე იქ, კლდის ნაპრალში.

⁵და წავედი ევფრატზე და დავმალე, როგორც მიბრძანა მე უფალმა.

⁶მრავალი დღის შემდეგ მითხრა მე უფალმა: ადექი, წადი ევფრატზე და აიღე იქიდან ის სარტყელი, რომლის იქ დამალვაც გიბრძანე.

⁷და წავედი მე ევფრატზე და ამოვთხარე და ავიღე ის სარტყელი იქიდან, სადაც დავმალე და, აჰა, დამპალიყო სარტყელი, აღარაფრად ვარგოდა.

⁸და იყო უფლის სიტყვა ჩემს მიმართ:

⁹ეს არის, რასაც ამბობს უფალი: ასე დავალპობო იუდას მედიდურებას და იერუსალიმის ამპარტავნებას.

¹⁰ეს ბოროტი ხალხი, რომელსაც არ უნდა ჩემი სიტყვის გაგონება, დადის თავისი უკუღმართი გულის შეუპოვრობით და მიჰყვება სხვა ღმერთებს, რათა ემსახუროს მათ და თაყვანი სცეს, იქნება, როგორც ეს სარტყელი, რომელიც არაფრისათვის აღარ გამოდგება.

¹¹რადგან როგორც სარტყელი ეკრობა კაცის თეძოებს, ისე მივიახლოვე მე მთელი ისრაელის სახლი და იუდას სახლი, — ამბობს უფალი, — რათა ყოფილიყვნენ ისინი ჩემს ერად, ჩემს დიდებად, საქებრად და მშვენებად; მაგრამ არ მისმინეს.

¹²და უთხარი მათ: ასე ამბობს-თქო უფალი, ისრაელის ღმერთი: ყველა ტიკი ღვინით ივსება. და გეტყვიან ისინი: განა არ ვიცით, რომ ყველა ტიკი ღვინით ივსება?

¹³უთხარი მათ, რომ ასე ამბობს-თქო უფალი: აჰა, მე ღვინით გავბრუჟავ ამ ქვეყნის ყველა მცხოვრებს და ყველა მეფეებს, დავითის ტახტზე რომ სხედან, და ყველა მღვდელს და წინასწარმეტყველს და იერუსალიმის ყველა მცხოვრებს,

¹⁴და ერთმანეთს შევალეწ მათ, მამებს და შვილებს ერთიანად, — ამბობს უფალი; — არ შევიბრალებ და არ დავინდობ, და არ ვინანებ მათ გაწყვეტას!

¹⁵მოისმინეთ და გაიგონეთ: ნუ გამედიდურდებით, რადგან უფალი ლაპარაკობს.

¹⁶პატივი მიაგეთ უფალს, თქვენს ღმერთს, სანამ არ ჩამოუბნელებია მას, და სანამ არ წაფორხილებულხართ წყვდიადის მთებზე. თქვენ დაელოდებით სინათლეს, მაგრამ ის სიკვდილის აჩრდილად და სიბნელედ აქცევს მას.

¹⁷და თუ არ მოისმენთ, მალულად იტირებს ჩემი სული თქვენი სიამაყის გამო, მწარედ იგოდებს და ცრემლებად დაიღვრება ჩემი თვალები; რადგან ტყვედ გაირეკავენ უფლის სამწყსოს.

¹⁸უთხარი მეფესა და დედოფალს:[14] ტახტიდან გადმოდით-თქო, ქვემოთ დასხედით, რადგან თავიდან მოგეხადათ გვირგვინი თქვენი დიდებისა.

¹⁹სამხრეთის ქალაქები ალყაშია და არავინაა შემწე: ტყვედ გაირეკეს მთელი იუდა, სრულად წაასხეს.

²⁰გაიხედეთ, შეხედეთ ჩრდილოეთიდან მომავალთ. სადაა სამწყსო, შენ რომ მოგეცა, შენი მშვენიერი ფარები?

²¹მაშინ რას იტყვი, სიონის ასულო, როდესაც მოგიხილავს უფალი? განა შენ არ ასწავლე მათ, როგორ გაგბატონებოდნენ? განა ტკივილები არ გაგაწამებენ მაშინ მშობიარე ქალივით?

²²და თუ იტყვი შენს გულში: რატომ დამემართაო ეს ყოველივე? განა შენი მრავალი ცოდვების გამო არ გადაგეხადა კალთები და გამოგიჩნდა ტერფები.

²³თუ ქუშელი შეძლებს შეიცვლოს კანის ფერი და ჯიქი თავის ხალებს, მაშინ თქვენც, ბოროტებას ჩვეულნი, შეძლებთ სიკეთის ქმნას.

²⁴და გავანიავებ როგორც ბზეს, უდაბნოს ქარი რომ წარიტაცებს.

²⁵ეს არის შენი ხვედრი, ჩემგან გამოზომილი შენი წილი, — ამბობს უფალი, — რადგან დამივიწყე და სიცრუით სასოებდი.

²⁶და მეც წამოგხდი კალთებს სახემდე და გამოჩნდება შენი სირცხვილი,

²⁷ვიხილე შენი გახრწნილება და შენი ავხორცი ჭიხვინი, უხამსობა შენი სიძვისა, ველად ვიხილე შენი სისაძაგლე ბორცვებზე. ვაი შენ, იერუსალიმ! როდისღა განიწმიდები?!