Read ქართული ბიბლია, სრული ვერსია Jeremiah 19 Bible Online

Jeremiah 19 - ქართული ბიბლია, სრული ვერსია bible

Jeremiah 19

¹ასე ამბობს უფალი: წადი და იყიდე მეთუნისგან თიხის დოქი; თან წაიყვანე ხნიერი ხალხი და მღვდლების უხუცესნი.

²გადი ბენ-ჰინომის ველზე, რომელიც ხარშითის კარიბჭის გარეთ არის, და თქვი იქ ის სიტყვები, რომლებსაც მე გეტყვი.

³და თქვი: ისმინეთ უფლის სიტყვა, იუდას მეფენო და იერუსალიმის მკვიდრნო! ასე ამბობს-თქო ცაბაოთ უფალი, ისრაელის ღმერთი: აჰა, მე მოვავლენ ამ ადგილას ისეთ უბედურებას, რომ მის გამგონეს ყურები ჟუილს დაუწყებს,

⁴იმის გამო, რომ მათ მიმატოვეს მე და უცხო ღმერთებეს დაუთმეს ეს ადგილი და აქ უკმევენ უცხო ღმერთებს, რომელთაც არ იცნობდნენ არც თვითონ და არც მათი მამები, და არც იუდას მეფენი; და მორწყეს ეს ადგილი უდანაშაულოთა სისხლით.

⁵და მოუწყვეს ბაყალს მაღლობები, რათა ცეცხლში დაეწვათ თავიანთი ძენი ბაყალის სრულადდასაწველ მსხვერპლად, რაც მე არ მიბრძანებია მათთვის და არ მითქვამს, და გულშიც არ გამივლია.

⁶ამიტომ აჰა, მოდის დღეები, — ამბობს უფალი, — და აღარ ერქმევა ამ ადგილს თოფეთი ანუ ბენ-ჰინომის ველი, არამედ სასაკლაო ველი.

⁷და ჩავშლი ამ ადგილას იუდაელთა და იერუსალიმელთა გეგმებს, და მახვილით დავცემ მათ მათი მტრების წინ და მათი სულის მაძიებელთა ხელით, და მათ გვამებს ცის ფრინველთა და ტყის ნადირთა საჯიჯგნად გავხდი.

⁸და ვაქცევ ამ ქალაქს საშინელებად და დასაცინად. და ყოველი იქ გამვლელი შეძრწუნდება და დაუსტვენს მისი ნანგრევების მნახველი.

⁹კბილით დავაჭმევ აქ მცხოვრებთ თავის ძეთა და ასულთა ხორცს; და ყოველი კაცი თავისი მოყვასის ხორცს შეჭამს მტერთაგან და მათი სულის მაძიებელთაგან ალყასა და გასაჭირში მყოფი.

¹⁰და დაამსხვრიე დოქი თანწამოყოლილი ხალხის თვალწინ,

¹¹და უთხარი მათ: ასე თქვა-თქო ცაბაოთ უფალმა: ასე დავამსხვრევ ამ ხალხს და ამ ქალაქს, როგორც ამსხვრევენ თიხის ჭურჭელს, რომლის შეკოწიწებაც აღარ მოხერხდება, და თოფეთში დამარხავენ მათს მკვდრებს, სხვა დასამარხი ადგილი რომ აღარ დარჩება ქალაქში.

¹²ასე მოვექცევი ამ ადგილს და მის მკვიდრთ, — ამბობს უფალი, — თოფეთივით ვაქცევ ამ ქალაქს.

¹³და იერუსალიმის სახლები და იუდას მეფეთა სახლები თოფეთივით შეილანძღება, რადგან ყოველი სახლის ბანზე ცის მხედრობას უკმევენ და საღვრელს უღვრიან უცხო ღმერთებს.

¹⁴და მოვიდა იერემია თოფეთიდან, სადაც ის უფალმა წინასწარმეტყველებისთვის გააგზავნა, და დადგა ის უფლის ტაძრის ეზოში და აუწყა მთელ ხალხს:

¹⁵ასე ამბობს ცაბაოთ უფალი, ისრაელის ღმერთი: აჰა, მე მომაქვს ამ ქალაქისათვის და იუდეის მთელი ქალაქებისთვის ყველა ის უბედურება, რომლითაც დავემუქრე მათ, რადგან ქედი არ მოიხარეს ჩემი სიტყვების მოსასმენად.