Read ქართული ბიბლია, სრული ვერსია Jeremiah 21 Bible Online

Jeremiah 21 - ქართული ბიბლია, სრული ვერსია bible

Jeremiah 21

¹სიტყვა, რომელიც იყო იერემიას მიმართ უფლისაგან ნათქვამი, როდესაც ცედეკიამ გააგზავნა მასთან ფაშხური, მალქიას ძე, და ცეფანია, მაყასეია მღვდლის ძე, რომ ეთქვათ მისთვის:

²ჰკითხე უფალს ჩვენზე, რადგან ბაბილონის მეფე ნაბუქოდონოსორი გარს მოგვადგა. იქნებ უფალმა ჩვენთვის მოახდინოს თავის სასწაულთა მსგავსი რამ სასწაული, რომ უკუიქცეს ჩვენგან ნაბუქოდონოსორი.

³და უთხრა მათ იერემიამ: უთხარით ცედეკიას:

⁴ასე ამბობს-თქო უფალი, ისრაელის ღმერთი: აჰა, მე წაგართმევთ საჭურველს, რომელიც თქვენს ხელთაა, რომლითაც თქვენ ეომებით ბაბილონის მეფეს და ქალდეველთ, რომელთაც ალყა შემოარტყეს თქვენს გალავნებს. და დავყრი იმ იარაღს ამ ქალაქის შუაგულში.

⁵და მე თვითონ ვიომებ თქვენს წინააღმდეგ აღმართული მკლავით და ძლიერი მარჯვენით და გულისწყრომითა და დიდ მრისხანებით.

⁶და დავცემ მე ამ ქალაქის მცხოვრებთ, კაცსა და პირუტყვს, და მოისრებიან ისინი შავი ჭირით.

⁷და ამის შემდეგ, — ამბობს უფალი, — ჩავყრი ცედეკიას, იუდას მეფეს და მის მსახურთ, და ამ ქალაქის მცხოვრებთ, ვინც შავ ჭირს, მახვილსა და შიმშილს გადაურჩება, ბაბილონის მეფის, ნაბუქოდონოსორის, ხელში, და სხვა მტერთა ხელში, და მათი სულის მაძიებელთა ხელში; და დასცემს ის მათ მახვილის პირით, არ დაინდობს, არ შეიბრალებს და არ შეიწყალებს მათ!

⁸ამ ხალხს კი უთხარი: ასე ამბობს-თქო უფალი: აჰა, მე გაძლევთ სიცოცხლის გზას და სიკვდილის გზას.

⁹ვინც ამ ქალაქში დარჩება მახვილით, შიმშილითა და შავი ჭირით მოისრება, ხოლო ვინც გავა და ქალდეველთ ჩაბარდება, რომელთაც ალყაში მოგიქციეს, ცოცხალი გადარჩება და მისი ცოცხლად გადარჩენა იქნება მისი ჯილდო.

¹⁰რადგან ამ ქალაქისკენ მივაქციე სახე უბედურებისათვის და არა სიკეთისათვის, — ამბობს უფალი, — ბაბილონის მეფის ხელთ გადაეცემა იგი და ის ცეცხლით გადაბუგავს მას.

¹¹იუდას მეფის სახლს კი უთხარი: ისმინეთ-თქო უფლის სიტყვა:

¹²დავითის სახლო! — ასე ამბობს უფალი: დილითვე საჯეთ სამართალი და გადაარჩინეთ მძარცველის ხელით მიტაცებული, ვიდრე ცეცხლივით აბრიალდება ჩემი რისხვა, აგიზგიზდება და არავინ იქნება ჩამქრობი თქვენი ავკაცობის გამო.

¹³აჰა, შენზე მოვდივარ, ველის მკვიდრო, დაბლობის კლდეო! — ამბობს უფალი, — რომ გაიძახით: ვინ დაგვესხმის და ვინ გაბედავს შინ შემოგვეჭრასო?

¹⁴მე მოგკითხავთ თქვენი ნამოქმედარის ნაყოფისამებრ, — ამბობს უფალი, — ცეცხლს მივცემ მის ტყეს და იგი ირგვლივ ყველაფერს შეჭამს.