Read ქართული ბიბლია, სრული ვერსია Jeremiah 22 Bible Online

Jeremiah 22 - ქართული ბიბლია, სრული ვერსია bible

Jeremiah 22

¹ასე თქვა უფალმა: ჩადი იუდას მეფის სახლში, ჩაიტანე იქ ეს სიტყვა

²და თქვი: ისმინეთ უფლის სიტყვა, იუდას მეფევ, დავითის ტახტზე რომ ზიხარ, შენ და შენმა მსახურებმა და ამ კარიბჭეებით მავალმა შენმა ხალხმა!

³ასე ამბობს-თქო უფალი: ქმენით სამართალი და სიმართლე; დაიხსენით უპოვარი მოძალადის ხელიდან; მწირსა და ქვრივ-ობოლს ნუ მოატყუებთ, ნუ გაძარცვავთ და უდანაშაულო სისხლს ნუ დაღვრით ამ ადგილას.

⁴თუ შეასრულებთ ამ სიტყვას, მაშინ შემოვლენ ამ სასახლის კარიბჭეებში დავითის ტახტზე მსხდომი მეფენი, ამხედრებულნი ეტლებსა და ცხენებზე, და შემოვლენ მათი მსახურნი და მათი ხალხი.

⁵და თუ არ გაიგონებთ ამ სიტყვებს, ჩემს თავს ვიფიცავ, — ამბობს უფალი, — რომ ნანგრევებად იქცევა ეს სასახლე.

⁶რადგან ასე ამბობს უფალი იუდას მეფის სახლზე: თუმცა გალაადი ხარ შენ ჩემთვის, ლიბანის მწვერვალი ხარ, მაგრამ მაინც უდაბნოდ გაქცევ და უკაცრიელ ქალაქად.

⁷და მოგისევ შემმუსვრელთ, ნაჯახებით ხელში, და გაჩეხავენ ისინი შენს რჩეულ კედრებს და ცეცხლში ჩაყრიან.

⁸და გადაივლიან მრავალი წარმართნი ამ ქალაქზე და ეტყვიან ერთმანეთს: რატომ მოექცაო უფალი ასე ამ დიდებულ ქალაქს?

⁹და უპასუხებენ: იმის გამო, რომ მიატოვეს უფლის, თავიანთი ღმერთის, აღთქმა და სხვა ღმერთებს სცემდნენ თაყვანს და მათ ემსახურებოდნენო.

¹⁰ნუ სტირით მკვდარს და ნუ იგლოვთ მას, იტირეთ ტირილით მიმავალი[17], რადგან არასოდეს დაბრუნდება ის, და ვეღარ იხილავს მშობელ ქვეყანას.

¹¹რადგან ასე ამბობს უფალი შალუმზე, იუდას მეფის, იოშიას ძეზე, ვინც თავისი მამის, იოშიას შემდგომ მეფობდა და ვინც გავიდა აქედან და აღარ დაბრუნდება აქ,

¹²რადგან იქ მოკვდება, სადაც დაასახლეს, და ამ ქვეყანას ვეღარ იხილავს.

¹³ვაი მას, ვინც უსამართლობით იშენებს სახლს და უკანონობით — პალატებს! თავის მოძმეს მუქთად ამუშავებს და გასამრჯელოს არ აძლევს;

¹⁴ვინც ამბობს: ავიშენებ ფართო სახლს და ვრცელ დარბაზებსო, — სარკმლებს ატანს, კედრით აპირკეთებს და ჟღალისფრად ღებავს.

¹⁵იმად ხომ არ მეფობ,[18] რომ კედარზე გაგიჟდე? განა მამაშენი არ ჭამდა და არ სვამდა? მაგრამ სამართალსა და სიმართლეს იქმოდა და ამიტომაც ჰქონდა სიკეთე;

¹⁶მდაბალსა და დავრდომილს განიკითხავდა, და სიკეთე არ აკლდა, განა ეს არ არის, რომ მან სწორად შემიცნო? — ამბობს უფალი.

¹⁷შენი თვალ-გული კი მხოლოდ ანგარებას ეძებს, უდანაშაულო სისხლისღვრას, ძარცვა-გლეჯასა და ძალადობას.

¹⁸ამიტომ ასე ამბობს უფალი იეჰოიაკიმზე, იუდას მეფის, იოშიას, ძეზე: არ დაიტირებენ მას: „ვაი, ძმაო ჩემოო!“ და: „ვაი, დაო ჩემოო!“ „ვაი, ხელმწიფეო!“ და: „ვაი, დიდებულო მბრძანებელოო!“

¹⁹დამარხავენ, როგორც ვირს მარხავენ, გაათრევენ და იერუსალიმის კარიბჭეთა მიღმა დააგდებენ.

²⁰ადი ლიბანზე და კივილი მორთე, ბაშანამდე უწიე შენი ხმა და ყაბარიმიდან იყვირე, რადგან დაილეწა ყველა შენი მეგობარი.

²¹მე გელაპარაკებოდი შენი ბედნიერების ჟამს, მაგრამ შენ ამბობდი: არ მოვისმენო! ასეთი იყო შენი გზა შენი სიყმაწვილიდან, რომ არ უსმენდი ჩემს ხმას.

²²ყველა შენს მწყემსს ქარი წაიღებს, და შენს მეგობრებს ტყვეებად გაირეკავენ. მაშინ კი შერცხვები და შეურაცხ-იქმნები ყველა შენი ბოროტების გამო.

²³ლიბანის მკვიდრო, კედრებში დაბუდებულო, რა სანახავი იქნები, როდესაც გეწევა ტანჯვა, როგორც მშობიარის ტკივილები.

²⁴თავს ვფიცავ, — ამბობს უფალი, — რომ შენ, ქონია იეჰოიაკიმის ძევ, იუდას მეფევ, ბეჭედიც რომ იყო ჩემი მარჯვენა ხელისა, თუ არ წაგიძრო

²⁵და არ მიგცე შენი სულის მაძიებელთა ხელთ, და მათ ხელთ, რომელთა წინაშეც ძრწი — ბაბილონის მეფის, ნაბუქოდონოსორის, ხელთ და ქალდეველთა ხელთ.

²⁶და გაგაძევებთ შენ და დედაშენს სხვა ქვეყანაში, სადაც არ შობილხართ, და იქ დაიხოცებით;

²⁷ხოლო იმ ქვეყანაში, საითკენაც დაბრუნებას გაუწევთ გული, ვეღარ დაბრუნდებიან ისინი.

²⁸ნუთუ მართლაც უღირსი ქმნილებაა, განკიცხულია ეს ქონია? თუ უსარგებლო ჭურჭელი? რატომ არიან გადაყრილნი ის და მისი თესლი და იმ ქვეყანაში, რომელსაც არ იცნობდნენ?

²⁹ქვეყანავ, ქვეყანავ, ქვეყანავ! ისმინე უფლის სიტყვა.

³⁰ასე ამბობს უფალი: ჩაწერეთ ეს კაცი, როგორც უმემკვიდრო, რომელმაც ვერ გაიხარა თავის დღეში: რადგან ვერ გაიხარებს მისი მემკვიდრე, ვერ დაჯდება დავითის ტახტზე, რომ იმეფოს იუდაზე.