Read ქართული ბიბლია, სრული ვერსია Jeremiah 24 Bible Online

Jeremiah 24 - ქართული ბიბლია, სრული ვერსია bible

Jeremiah 24

¹მას შემდეგ, რაც ბაბილონის მეფე ნაბუქოდონოსორმა, გადაასახლა იუდას მეფე იექონია, იეჰოიაკიმის ძე, და იუდეის მთავარნი, ხურონი და კვერით-ხურონი იერუსალიმიდან და ბაბილონში მიიყვანა, უფალმა მიჩვენა ლეღვით სავსე ორი კალათა, რომლებიც უფლის ტაძრის წინ იდგა.

²ერთ კალათაში კარგი ლეღვი იყო, როგორიც ლეღვის პირველნაყოფია, ხოლო მეორე კალათაში — ძალიან ცუდი, რომლის ჭამაც არ შეიძლებოდა, იმდენად უვარგისი იყო.

³და მითხრა მე უფალმა: რას ხედავ, იერემია? და მივუგე მე: ლეღვს. კარგი ლეღვი ძალიან კარგია და ხენეში — ძალიან ხენეში, რომლის ჭამაც არ შეიძლება, იმდენად ცუდია.

⁴და იყო უფლის სიტყვა ჩემს მიმართ ნათქვამი:

⁵ასე ამბობს უფალი, ისრაელის ღმერთი: ამ კარგი ლეღვივით გამოვარჩევ ტყვეობაში მყოფ იუდაელთ, რომელნიც გავუშვი აქედან ქალდეველთა ქვეყანაში;

⁶და მე მივაპყრობ მათ ჩემს თვალს სასიკეთოდ და უკანვე დავაბრუნებ ამ ქვეყანაში; ავაშენებ მათ და არ დავანგრევ, ხელახლა დავნერგავ მათ და არ აღმოვფხვრი.

⁷და მე მივცემ მათ გულს ჩემს შესაცნობად, რომ მე ვარ უფალი. ისინი იქნებიან ჩემი ერი, და მე ვიქნები მათი ღმერთი; რადგან მთელი გულით მოიქცევიან ჩემსკენ.

⁸და როგორც ხენეშ ლეღვს, რომლის ჭამაც არ შეიძლება მისი უვარგისობის გამო, ისე მოვექცევი, — ამბობს უფალი, — ცედეკიას, იუდას მეფეს, და მის მთავართ და იერუსალიმის ნატამალს, ამ ქვეყანაში დარჩენილს, და ეგვიპტის ქვეყანაში მცხოვრებთ.

⁹და ვაქცევ მათ ქვეყნის ყველა სამეფოსათვის სასირცხვოდ და საიგავოდ, დასაცინად და ასაგდებად ყველგან, სადაც კი გავყრი მათ.

¹⁰და მივაწევ მათზე მახვილს, შიმშილსა და შავ ჭირს, სანამ არ აღვგვი იმ მიწიდან, რომელიც მივეცი მათ და მათ მამებს.