Read ქართული ბიბლია, სრული ვერსია Jeremiah 25 Bible Online

Jeremiah 25 - ქართული ბიბლია, სრული ვერსია bible

Jeremiah 25

¹სიტყვა, რომელიც იყო იერემიას მიმართ იუდას მთელს ერზე იუდას მეფის, იოშიას ძის, იეჰოიაკიმის, მეოთხე წელს (ეს იყო ბაბილონის მეფის, ნაბუქოდონოსორის პირველი წელი),

²სიტყვა, რომელიც უქადაგა იერემია წინასწარმეტყველმა იუდას მთელ ერსა და იერუსალიმის ყველა მცხოვრებს:

³იუდას მეფის, ამონის ძის, იოშიას, მეფობის მეცამეტე წლიდან დღემდე, აი უკვე 23 წელია, რაც იყო უფლის სიტყვა ჩემს მიმართ, და მე გელაპარაკებოდით თქვენ, როგორც კი თვალს გავახელდი, და თქვენ არ ისმენდით.

⁴და აგზავნიდა უფალი თქვენთან ყველა თავის მსახურს, წინასწარმეტყველთ, განთიადიდან გიგზავნიდათ და არ უსმენდით, აინუნშიც არ აგდებდით მის სიტყვას.

⁵გეუბნებოდნენ: მოიქცესო ყოველი კაცი თავისი ბოროტი გზიდან და თავისი ბოროტი საქმეებიდან, და დასახლდითო მიწაზე, რომელიც უფალმა მოგცათ თქვენ და თქვენს მამებს საუკუნოდ;

⁶ნუ მისდევთო უცხო ღმერთებს სამსახურებლად და თაყვანისსაცემად, რათა არ გამარისხოთ მე თქვენი ხელით ნაკეთებით, და მეც არაფერს დაგიშავებთო.

⁷მაგრამ თქვენ არ მისმენდით მე, — ამბობს უფალი, — და მარისხებდით თქვენი ხელით ნაკეთებით, თქვენსავე საბოროტოდ.

⁸ამიტომ ასე ამბობს ცაბაოთ უფალი: იმის გამო, რომ არ ისმინეთ ჩემი სიტყვები,

⁹აჰა, მოვუხმობ და წამოვიყვან ჩრდილოეთის ყველა ტომს, — ამბობს უფალი, — და ბაბილონის მეფე ნაბუქოდონოსორს, ჩემს მსახურსაც გავუგზავნი კაცებს და ავამხედრებ მათ ამ ქვეყანაზე და მის მცხოვრებლებზე და ყველა იმ ხალხებზე, ირგვლივ რომ ცხოვრობენ; სრულიად გავანადგურებ მათ; უკაცრიელ, დასაცინ და საუკუნო ნანგრევებად ვაქცევ ყოველივეს.

¹⁰და მოვსპობ მათგან შვებისა და სიხარულის ხმას, ნეფის ხმასა და საპატარძლოს ხმას, დოლაბების რაკუნსა და ლამპრის შუქს.

¹¹და მთელი ეს ქვეყანა გაოხრდება და გაუკაცურდება, და მთელი ეს ხალხები ბაბილონის მეფის მონობაში იქნებიან 70 წელიწადს.

¹²და როცა გაივლის 70 წელი, დავსჯი მე ბაბილონის მეფეს და ამ ხალხს, — ამბობს უფალი, — და ქალდეველთა ქვეყანას მათი ურჯულოების გამო, და სამარადისო უდაბნოდ ვაქცევ მას.

¹³და ავახდენ იმ ქვეყანაზე ყველა ჩემს სიტყვას, რომელიც წარმოვთქვი მასზე, ყოველივეს ჩაწერილს ამ წიგნში, რომელიც იწინასწარმეტყველა იერემიამ ყველა ამ ხალხებზე.

¹⁴რადგან მათაც დაიმონებენ მრავალი ხალხები და დიდი მეფენი; და მივუზღავ მათ მათი საქმეებისა და მათ ხელთა ნაქნარისამებრ.

¹⁵რადგან ასე მითხრა მე უფალმა, ისრაელის ღმერთმა: ჩამომართვი ეს რისხვის ღვინით სავსე თასი და შეასვი ყველა ხალხებს, რომლებთანაც შენ გაგაგზავნი.

¹⁶და შესვამენ და აბობოქრდებიან და გაგიჟდებიან მახვილის წინაშე, რომელსაც მე მოვუვლენ მათ.

¹⁷ხელიდან ჩამოვართვი უფალს თასი და შევასვი ყველა ხალხებს, ვისთანაც გამაგზავნა უფალმა:

¹⁸იერუსალიმს და იუდას ქალაქებს, და მის მეფეებს, და მის მთავრებს, რათა გაეოხრებინა, შემზარავი და სამარცხვინო სანახავი გაეხადა და შეეჩვენებინა, როგორც დღევანდლამდე არიან,

¹⁹ფარაონს — ეგვიპტის მეფეს, და მის მსახურთ, მის მთავრებს და მთელ მის ხალხს,

²⁰და ყველა შერეულ ხალხს, და ყუცის ქვეყნის ყველა მეფეს, და ფილისტიმელთა ქვეყნის ყველა მეფეს, და აშკელონს, ღაზას და ყეკრონს და აშდოდის ნატამალს,

²¹ედომს და მოაბს, და ყამონელთ,

²²და ცორის ყველა მეფეს და ციდონის ყველა მეფეს, და ზღვისგაღმელ მეფეთ;

²³დედანს, თემას და ბუზს, და ყველა საფეთქელაპარსულს;

²⁴და არაბეთის ყველა მეფეს, და უდაბნოში დავანებულ ყველა აღრეული ტომების მეფეებს;

²⁵და ზიმრის ყველა მეფეს, ყელამის ყველა მეფეს და მიდიის ყველა მეფეს;

²⁶ჩრდილოეთის ყველა მეფეს, ერთმანეთის ახლობელს და შორებელს; და მსოფლიოს ყველა სამეფოს, რომელიც დედამიწის ზურგზეა, და შეშაქის[19] მეფე მათ შემდეგ შესვამს.

²⁷და უთხარი მათ: ასე ამბობს-თქო ცაბაოთ უფალი, ისრაელის ღმერთი: სვით და დათვერით, და ამოარწყიეთ და დაცვივდით, და ნუ ადგებით მახვილის დანახვისას, რომელსაც მე მოვავლენ თქვენზე.

²⁸და თუ უარს იტყვიან შენი ხელიდან თასის მიღებაზე, რომ შესვან, მაშინ უთხარი მათ: ასე ბრძანა ცაბაოთ უფალმა, რომ უნდა შესვათ-თქო.

²⁹რადგან ამ ქალაქზე, რომელიც ჩემი სახელით იწოდება, მე ვიწყებ უბედურების მოწევას; და ნუ იფიქრებთ, რომ არ დაისჯებით, რადგან მახვილს მოვუხმობ ამ ქვეყნის ყველა მცხოვრებზე, — ამბობს ცაბაოთ უფალი.

³⁰აუწყე მათ ყველა ეს სიტყვა და უთხარი მათ: უფალი სიმაღლიდან დაიგრგვინებს და მისი წმიდა სავანიდან გამოსცემს ხმას; საშინელი გრგვინვით დაიგრგვინებს თავის ფარეხზე; როგორც საწნახელში ყურძნის მწურავები, ისე დასჭექს დედამიწის ყველა მცხოვრებთა თავზე.

³¹ხმა მიაღწევს ქვეყნის კიდეებამდე, რადგან დავა აქვს უფალს ხალხებთან: განიკითხავს იგი ყველა ხორციელს, ბოროტმოქმედნი მახვილს მიეცემიან, — ამბობს უფალი.

³²ასე ამბობს ცაბაოთ უფალი: აჰა, უბედურება გადადის ხალხიდან ხალხზე და დიდი ქარბორბალა აღიძვრის ქვეყნის კიდეებიდან.

³³და ეყრებიან იმ დღეს უფლის მიერ დახოცილნი ქვეყნის კიდიდან კიდემდე, და არავინ დაიტირებს მათ, არავინ აკრეფს და არავინ დამარხავს, ნეხვივით ეყრებიან მიწის ზურგზე.

³⁴ივალალეთ, მწყემსებო, და იკივლეთ, და მიწა-მტვერი გადაიყარეთ თავზე, ფარების სარქლებო, რადგან მოაწია დღეებმა თქვენი დაკვლისა და გაფანტვისა, და დაიმსხვრევით, როგორც ძვირფასი ჭურჭელი.

³⁵არ ექნებათ თავშესაფარი მწყემსებს და ვეღარ გადარჩებიან ფარების სარქლები.

³⁶მწყემსთა ყვირილისა და ფარის სარქლების ვაების ხმაა, რადგან აჩანაგებს უფალი მათ საძოვრებს.

³⁷და ჩანაგდება მშვიდობიანი საძოვრები უფლის გაცეცხლებული რისხვით.

³⁸ლომივით დატოვა მან თავისი ბუნაგი, რადგან გაუკაცრიელდა მათი ქვეყანა ამაოხრებლის მრისხანებითა და მისი რისხვის ცეცხლით.