Read ქართული ბიბლია, სრული ვერსია Jeremiah 28 Bible Online

Jeremiah 28 - ქართული ბიბლია, სრული ვერსია bible

Jeremiah 28

¹და იყო იმავე წელს, იუდას მეფე ცედეკიას მეფობის დასაწყისში, მეოთხე წლის მეხუთე თვეს, ხანანია ყაზურის ძემ, გიბეონელმა წინასწარმეტყველმა, მითხრა მე უფლის სახლში მღვდლებისა და მთელი ხალხის თვალწინ:

²ასე ამბობს ცაბაოთ უფალი, ისრაელის ღმერთი: მე დავლეწავ ბაბილონის მეფის უღელს.

³ორ წელიწადში დავაბრუნებო ამ ადგილას უფლის ტაძრის მთელ ჭურჭელს, რომელიც ბაბილონის მეფე ნაბუქოდონოსორმა გაზიდა აქედან ბაბილონში;

⁴და იექონია იეჰოიაკიმის ძეს, იუდეის მეფეს, და ბაბილონში მყოფ ყველა ტყვედ წაყვანილ იუდაელს დავაბრუნებ ამ ადგილას, — ამბობს უფალი, — რადგან მე დავლეწავ ბაბილონის მეფის უღელს.

⁵და უთხრა იერემია წინასწარმეტყველმა ხანანია წინასწარმეტყველს უფლის სახლში მდგომი მთელი ხალხისა და მღვდლების თვალწინ,

⁶და თქვა იერემია წინასწარმეტყველმა: ამინ! ეგრე ყოს უფალმა! აღასრულოს უფალმა შენი სიტყვები, რომლებიც იწინასწარმეტყველე უფლის ტაძრის ჭურჭლისა და ყველა ტყვის დაბრუნებაზე ბაბილონიდან ამ ადგილას.

⁷მხოლოდ მოისმინე ეს სიტყვა, რომელსაც მე ვიტყვი შენს გასაგონად და მთელი ერის მოსასმენად.

⁸წინასწარმეტყველნი, რომლებიც ჩემზე უწინ იყვნენ და შენზე უწინაც დიდი ხნით ადრე, უწინასწარმეტყველებდნენ ბევრ ქვეყანას და დიდ სამეფოებს ომებს, უბედურებებსა და შავ ჭირს;

⁹თუ წინასწარმეტყველი მშვიდობას წინასწარმეტყველებს, მხოლოდ მაშინ აღიარებენ, უფლის მიერ მოვლინებულ ჭეშმარიტ წინასწარმეტყველად, როცა ახდება მისი წინასწარმეტყველება.

¹⁰მაშინ ახსნა ხანანია წინასწარმეტყველმა წინასწარმეტყველ იერემიას კისრიდან უღელი და დალეწა.

¹¹და თქვა ხანანიამ მთელი ხალხის თვალწინ: „ასე ამბობს უფალი: ‘ასევე დავლეწავ ნაბუქოდონოსორის, ბაბილონის მეფის, უღელს ორ წელიწადში ყველა ხალხების ქედზე.’“ და წავიდა იერემია წინასწარმეტყველი თავისი გზით.

¹²და იყო უფლის სიტყვა იერემიას მიმართ მას შემდეგ, რაც ხანანია წინასწარმეტყველმა ქედიდან მოხსნა წინასწარმეტყველ იერემიას უღელი და დალეწა:

¹³წადი და უთხარი ხანანიას: ასე ამბობს-თქო უფალი: შენ ხის უღელი დალეწე, ახლა რკინის უღელი მოვა-თქო მის ნაცვლად.

¹⁴რადგან ასე თქვა ცაბაოთ უფალმა, ისრაელის ღმერთმა: რკინის უღელი დავადგი მე ყველა ამ ხალხებს ქედზე, რათა დაემორჩილნენ ბაბილონის მეფე ნაბუქოდონოსორს, და დაემორჩილებიან კიდეც, თვით ველის ნადირიც კი მას დაემორჩილება.

¹⁵და უთხრა იერემია წინასწარმეტყველმა ხანანია წინასწარმეტყველს: ისმინე, ხანანია, უფალს არ გამოუგზავნიხარ შენ, და ტყუილად აიმედებ ამ ხალხს.

¹⁶ამიტომ ასე ამბობს უფალი: აჰა, მოგაშორებ მზის ნათელს, ამ წელს მოკვდები, რადგან უფლის წინააღმდეგ ლაპარაკობდი.

¹⁷და მოკვდა ხანანია წინასწარმეტყველი იმ წელიწადს, მეშვიდე თვეში.