Read ქართული ბიბლია, სრული ვერსია Jeremiah 41 Bible Online

Jeremiah 41 - ქართული ბიბლია, სრული ვერსია bible

Jeremiah 41

¹და იყო მეშვიდე თვეს: იშმაყელი, ძე ნეთანიასი, ძისა ელიშამაყისა, სამეფო მოდგმიდან, და მეფის დიდებულნი და ათი კაცი მასთან ერთად, მოვიდნენ მიცფაში გედალია ახიკამის ძესთან; და ჭამეს იქ პური ერთად, მიცფაში.

²და ადგა იშმაყელ ნეთანიას ძე — ის და მასთან მყოფი ათი კაცი და მახვილით დასცეს გედალია, ძე ახიკამისა, ძისა შაფანისა; მოკლეს კაცი, ვინც ბაბილონის მეფემ დანიშნა ქვეყნის განმგებლად.

³და ასევე დახოცა იშმაყელმა ყველა იუდაელი, რომლებიც გედალიასთან იყვნენ მიცფაში, და ქალდეველი მეომრები, რომლებიც აგრეთვე იქ იმყოფებოდნენ.

⁴გედალიას მკვლელობის მეორე დღეს, როცა არავინ არაფერი იცოდა ამის შესახებ,

⁵მოვიდნენ კაცები შექემიდან, შილოდან და სამარიიდან — 80 წვერგაპარსული, სამოსელშემოგლეჯილი და ტანდაკოდილი, ძღვენითა და გუნდრუკით ხელში უფლის სახლში მისატანად.

⁶და გამოვიდა იშმაყელი, ნეთანიას ძე, მიცფადან მათ შესაგებებლად, მოდიოდა და ტიროდა; და როდესაც მათ შეხვდა, უთხრა: შედით გედალია ახიკამის ძესთან.

⁷და როგორც კი ქალაქში შევიდნენ იშმაყელ ნეთანიას ძემ და მისმა კაცებმა დახოცეს ისინი, და ჭაში ჩაყარეს.

⁸მაგრამ ათი კაცი იყო მათ შორის, რომლებმაც უთხრეს იშმაყელს: ნუ დაგვხოცავთ, რადგან ჩვენ გადამალული გვაქვს მინდორში ხორბალი და ქერი, ზეთი და თაფლი. და ისიც გაჩერდა და არ დახოცა ისინი მათ მოძმეებთან ერთად.

⁹ორმო კი, რომელშიც იშმაყელმა ჩაყარა ყველა იმ კაცთა გვამები, რომლებიც დახოცა გედალიას გამო, სწორედ ის იყო, მეფე ასამ რომ ამოთხარა ისრაელის მეფის, ბაყაშას, შიშით; დახოცილებით გაავსო იშმაყელმა, ნეთანიას ძემ, ის ორმო.

¹⁰და დაატყვევა იშმაყელმა ხალხის მთელი ნატამალი, რომელიც მიცფაში დარჩა: მეფის ასულნი და მიცფაში დარჩენილი ხალხი, რომელებიც ნებუზარადანმა, ქონდაქართუხუცესმა, ჩააბარა გედალია ახიკამის ძეს, ტყვედ წაასხა იშმაყელ ნეთანიას ძემ, და წავიდა ყამონიანებთან გადასასვლელად.

¹¹და გაიგეს იოხანან კარეახის ძემ და ყველა მხედართმთავარმა, რომლებიც მასთან იყვნენ, ყველა ის ბოროტება, რაც იშმაყელ ნეთანიას ძემ ჩაიდინა,

¹²და გაიყვანეს ყველა კაცი და წავიდნენ იშმაყელ ნეთანიას ძესთან საბრძოლველად და იპოვეს იგი დიდ წყლებთან, რომლებიც გიბეონშია,

¹³და გაიხარა მთელმა ხალხმა, რომელიც იშმაყელთან იყო, როდესაც დაინახა იოხანან კარეახის ძე და ყველა მხედართმთავარი, რომლებიც მასთან იყვნენ.

¹⁴და მთელმა ხალხმა, რომელიც იშმაყელს ტყვედ ჰყავდა მიცფადან წამოყვანილი, პირი იბრუნა და წავიდა იოხანანთან, კარეახის ძესთან.

¹⁵მაგრამ იშმაყელ ნეთანიას ძემ რვა კაცით დააღწია თავი იოხანანს და წავიდა ყამონიანებთან.

¹⁶წაიყვანეს იოხანან კარეახის ძემ და მასთან მყოფმა მხედართმთავრებმა ხალხის მთელი ნატამალი, რომელიც ტყვედ წამოასხა მიცფადან ისმაელ ნეთანიას ძემ გედალია ახიკამის ძის მოკვლის შემდეგ, მათ შორის: მამკაცები, მეომრები, ქალები და ბავშვები და საჭურისები, რომლებიც გიბეონიდან დააბრუნა.

¹⁷წავიდნენ ისინი და დადგნენ გერუთ-ქიმჰამში, რომელიც ბეთლემთან იყო, რათა წასულიყვნენ ეგვიპტეში და

¹⁸გარიდებოდნენ ქალდეველებს, რადგანაც მათი ეშინოდათ, ვინაიდან იშმაყელ ნეთანიას ძემ მოკლა გედალია ახიკამის ძე, რომელსაც ბაბილონის მეფემ ჩააბარა იუდეის ქვეყანა.