Read ქართული ბიბლია, სრული ვერსია Jeremiah 44 Bible Online

Jeremiah 44 - ქართული ბიბლია, სრული ვერსია bible

Jeremiah 44

¹ეს არის უფლის სიტყვა იერემიას მიმართ თქმული ყველა იეუდაელზე, რომლებიც ცხოვრობდნენ ეგვიპტის ქვეყანაში — მიგდოლსა და თახფანხესში, ნოფსა და ფათროსის მიწაზე.

²ასე თქვა ცაბაოთ უფალმა, ისრაელის ღმერთმა: თქვენ იხილეთ ყველა ის უბედურება, რაც მე მოვაწიე იერუსალიმსა და იუდეის ყველა ქალაქს, და აოხრებულია დღეს ისინი და არავინ ცხოვრობს იქ,

³იმ ბოროტების გამო, რომელსაც ისინი ჩემს გასამწარებლად აკეთებდნენ, რომ უკმევდნენ და ემსახურებოდნენ უცხო ღმერთებს, რომლებსაც არ იცნობდნენ, და არ იცნობდით არც თქვენ და არც თქვენი მამები.

⁴და მე გიგზავნიდით ჩემს მსახურთ — წინასწარმეტყველთ — რომ ეთქვათ: ნუ გააკეთებთ ამ სისაძაგლეს, რომელიც მე მძულს-მეთქი;

⁵მაგრამ ისინი არც მისმენდნენ და ყურსაც არ იბერტყავდნენ, რომ მოქცეულიყვნენ ბოროტებიდან და არ ეკმიათ უცხო ღმერთებისათვის.

⁶და გადმოინთხა ჩემი გულისწყრომა და ჩემმა რისხვამ მოიცვა იუდეის ქალაქები და იერუსალიმის ქუჩები, და ნაოხარად იქცნენ ისინი, რასაც დღესაც ხედავთ.

⁷და ახლა ასე ამბობს უფალი ცაბაოთი, ისრაელის ღმერთი: რატომ უკეთებთ დიდ ბოროტებას თქვენსავე სულებს, რომ მოისპოთ სრულიად კაცი და ქალი, ყრმა და მეძუძური იუდაელთა შორის, და რომ აღარ დარჩეს თქვენი ნატამალი?

⁸რატომ მაგულისებთ თქვენი ხელის ნაკეთობებით, და უკმევთ უცხო ღმერთებს ეგვიპტის ქვეყანაში, სადაც თქვენ მწირობთ? რად გინდათ რომ ამოიძირკვოთ და შესაჩვენებელი და სამარცხვინო გახდეთ ქვეყნიერების თვალში?

⁹ნუთუ დაგავიწყდათ თქვენი მამების ბოროტმოქმედება, იუდეის მეფეთა ბოროტმოქმედება, მათი ცოლების ბოროტმოქმედება, თქვენი ბოროტმოქმედება და თქვენი ცოლების ბოროტმოქმედება, რაც ჩაიდინეთ იუდეის ქვეყანაში და იერუსალიმის ქუჩებში?

¹⁰დღემდე არ დაცხრნენ ისინი და არ შეშინდნენ, არ შეუდგნენ ჩემს რჯულსა და ჩემს კანონებს, რომლებიც თქვენ და თქვენს მამებს მოგეცით.

¹¹ამიტომ ასე ამბობს უფალი ცაბაოთი, ისრაელის ღმერთი: მე მოვაქცევ ჩემს სახეს თქვენს წინააღმდეგ თქვენს საუბედუროდ და მთელი იუდეის ამოსაგდებად,

¹²და იუდაელთა ნატამალს, რომელმაც მიაქცია პირი, რათა ეგვიპტის ქვეყანაში წასულიყო საცხოვრებლად, მთლიანად გავანადგურებ; და დაეცემიან ისინი ეგვიპტის ქვეყანაში მახვილით, შიმშილით გაწყდებიან დიდიან-პატარიანად, და საწყევარნი და საშინელებანი, საგინებლნი და სამარცხვინონი გახდებიან.

¹³და დავსჯი იუდაელთ, ეგვიპტის ქვეყანაში ნებით ჩასახლებულთ, როგორც იერუსალიმი დავსაჯე მახვილით, შიმშილითა და შავი ჭირით.

¹⁴თავდახსნილი და გადარჩენილი არ ეყოლება იუდეის ნატამალს, რომელიც ეგვიპტის ქვეყანაში მიდის საცხოვრებლად, ვეღარ დაბრუნდებიან იუდეის მიწაზე, საითკენაც ექნებათ მუდმივი სწრაფვა სულისა, რომ დასახლდნენ იქ. მაგრამ ვეღარავინ დაბრუნდება უკან, გარდა გამოქცეულებისა.

¹⁵და კაცებმა, რომლებმაც იცოდნენ, რომ უცხო ღმერთებს უკმევდნენ მათი ცოლები, და ქალების დიდმა ბრბომ და ეგვიპტის ქვეყანაში, ფათროსის მიწაზე დასახლებულმა მთელმა ხალხმა ასე უპასუხა იერემიას:

¹⁶ვერ დავუჯერებთ შენს სიტყვებს, რომლებიც უფლის სახელით გვითხარი,

¹⁷რადგან ჩვენ ყველაფერს ჩვენი სიტყვისამებრ გავაკეთებთ, როგორც ჩვენი პირიდან გამოვიდა, და კვლავაც ვუკმევთ ცის დედოფალს და კვლავაც ვუღვრით მას საღვრელს, როგორც ვაკეთებდით ჩვენ და ჩვენი მამები, ჩვენი მეფენი და ჩვენი მთავრები იუდეის ქალაქებში და იერუსალიმის ქუჩებში; პური ძღომაზე გვქონდა და კარგად ვიყავით, და არც უბედურება გვინახავს.

¹⁸მას შემდეგ კი, რაც შევწყვიტეთ ცის დედოფლის საპატივცემოდ გუნდრუკის კმევა და მისთვის საღვრელის ღვრა, მოგვაკლდა ყოველივე და მახვილითა და შიმშილით ვიხოცებით.

¹⁹და როცა ცის დედოფალს ვუკმევდით და საღვრელს ვუღვრიდით, განა ჩვენი კაცების თანხმობის გარეშე ვუცხობდით მას ხმიადებს მისი გამოსახულებით და ვუღვრიდით საღვრელს?

²⁰და უთხრა იერემიამ მთელ ხალხს — კაცსა და ქალს და მთელ მის მოპასუხეთ:

²¹განა ეს კმევა, რომელსაც თქვენ ასრულებდით იუდეის ქალაქებსა და იერუსალიმის ქუჩებში, თქვენ და თქვენი მამები და თქვენი მეფენი და თქვენი მთავრები და ქვეყნის ერი, არ გაიხსენა უფალმა და არ მოაგონდა?

²²და ვეღარ შეძლო უფალმა თქვენი ბოროტი ნამოქმედარისა და თქვენი სისაძაგლეების მეტად მოთმენა, რომელსაც თქვენ სჩადიოდით, და თქვენი ქვეყანა განადგურდა და საშინელებად და საწყევარად და უკაცრიელად იქცა, როგორც დღესაა.

²³იმის გამო, რომ უკმევდით და სცოდავდით უფალს და არ ისმინეთ მისი ხმა, და მის რჯულზე და მის კანონებზე და მის მოწმობებზე არ იარეთ, ამიტომ გეწიათ თქვენ ეს უბედურება.

²⁴და უთხრა იერემიამ მთელ ხალხს და ყველა ქალს: ისმინეთ უფლის სიტყვა, იუდაელნო, ვინც კი ეგვიპტის ქვეყანაში ხართ,

²⁵ასე ამბობს ცაბაოთ უფალი, ისრაელის ღმერთი: თქვენ და თქვენი ცოლები რასაც პირით ლაპარაკობდით, იმას აკეთებდით თქვენი ხელით, რომ ამბობდით: შევასრულებთო ჩვენს აღთქმებს, ცის დედოფალს კვლავაც ვუკმევთ და საღვრელსაც დავუღვრითო! — აჰა, მტკიცედ იცავთ თქვენს აღთქმებს და შურისგებითაც ასრულებთ.

²⁶ამიტომ ისმინეთ უფლის სიტყვა, ყველა იუდაელო, ეგვიპტის ქვეყანაში დასახლებულო: მე დავიფიცე ჩემი დიდებული სახელით, — ამბობს უფალი, — თუ იქნება კიდევ ჩემი სახელი წარმოთქმული მთელს ეგვიპტის ქვეყანაში იუდაელის პირით, რომელიც იტყვის: უფალს ვფიცავო!

²⁷მე გავიღვიძებ მათზე საბოროტოდ და არა სასიკეთოდ; და ყოველი იუდაელი, რომელიც ეგვიპტის ქვეყანაშია, მახვილითა და შიმშილით ამოწყდება, სანამ მთლიანად არ მოისპობიან.

²⁸და ეგვიპტის ქვეყნიდან მახვილს თავდაღწეული მცირერიცხოვანნი იუდეის ქვეყანაში დაბრუნდებიან. და გაიგებს ეგვიპტის ქვეყანაში საცხოვრებლად მისული ყველა დანარჩენი იუდაელი, თუ ვისი სიტყვა აღსრულდება — ჩემი თუ მათი.

²⁹აჰა, მე გაძლევთ ნიშანს, — ამბობს უფალი, — რომ დაგსჯით თქვენ ამ ადგილას, რომ იცოდეთ, რათა აღსრულებით აღსრულდება ჩემი სიტყვები თქვენდა საუბედუროდ.

³⁰და ამბობს უფალი: მე გადავცემ ეგვიპტის მეფეს, ფარაონ ხოფრას, მის მტერთა და მისი სულის მაძიებელთა ხელში, როგორც ცედეკია, იუდეის მეფე, გადავეცი ბაბილონის მეფეს, ნაბუქოდონოსორს, მისი სულის მაძიებელის ხელთ.