Read ქართული ბიბლია, სრული ვერსია Jeremiah 50 Bible Online

Jeremiah 50 - ქართული ბიბლია, სრული ვერსია bible

Jeremiah 50

¹სიტყვა, რომელიც თქვა უფალმა ბაბილონზე და ქალდეველთა ქვეყანაზე იერემია წინასწარმეტყველის პირით:

²გამოაცხადეთ და ასმინეთ ხალხებში, და აღმართეთ ალამი, ასმინეთ, ნუ დაფარავთ, თქვით: აღებულია ბაბილონი, შერცხვენილია ბელი, დალეწილია მეროდაქი, შერცხვენილია მისი კერპები, დამსხვრეულია მათი ძეგლები!

³რადგან მის წინააღმდეგ აღდგა ხალხი ჩრდილოეთიდან, უდაბნოდ აქცევს მის ქვეყანას და არ დარჩება მასში მცხოვრები, კაციან პირუტყვიანად ყველა წავა და გადაიხვეწება.

⁴იმ დღეებში და იმ დროს, — ამბობს უფალი, — მოვლენ ისრაელიანები, ისინი და იუდაელნი ერთად ივლიან მოთქმით და ძებნას დაუწყებენ უფალს, თავიანთ ღმერთს.

⁵სიონის გზას იკითხავენ, აქეთ მოაქცევენ პირს და იტყვიან: მოდით და შევეკრათ უფალს, საუკუნო კავშირით, რომელიც არ იქნება დავიწყებული.

⁶გზააბნეულ ფარას ჰგავს ჩემი ერი, მათმა მწყემსებმა აუბნიეს გზა, მთებზე ახეტიალებენ; მთიდან ბორცვებზე გადადიან, დაივიწყეს თავისი ბინა.

⁷ყველას ლუკმა იყვნენ, ვისაცკი გადაეყრებოდნენ. მათი მტრები ამბობდნენ: ბრალი არა გვაქვს, რადგან მათ შესცოდეს უფალს, უფალს — სიმართლის სავანეს, და უფალს — მათი მამების იმედს.

⁸დაიძარით ბაბილონიდან და ქალდეველთა ქვეყნიდან გამოდით; და იქნებით, როგორც ფარის წინამძღოლი ვაცები,

⁹რადგან, აჰა, მე გამოვაღვიძებ და აღვძრავ ბაბილონზე დიდი ხალხების ურდოებს ჩრდილოეთის ქვეყნიდან, დაჯარდებიან ისინი მის წინააღმდეგ და ტყვედ ჩაიგდებენ; მათი ისრები ხელოვანი მეომრის ისრებია და ფუჭად არ ბრუნდებიან უკან.

¹⁰ქალდეველთა ქვეყანა მათი ნადავლი გახდება და გაძღება ყველა მისი მძარცველი, — ამბობს უფალი.

¹¹რადგან გიხაროდათ და ილხენდით, ჩემი სამკვიდრებლის ყაჩაღებო; რადგან გასუქდით, როგორც დეკეული მწვანეზე, და ბედაურებივით ჭიხვინებდით.

¹²შერცხვენილი დარჩება დედათქვენი, გაწითლდება თქვენი მშობელი; აჰა, ხალხების მომავალი — უდაბნო, ურწყული და ტრამალი.

¹³უფლის რისხვის გამო აღარ დასახლდება და მთლიანად უდაბნოდ იქცევა. ბაბილონზე გამვლელი ყოველი კაცი გაოცდება და დაუსტვენს მისი წყლულების შემხედვარე.

¹⁴გარსშემოეწყვეთ ბაბილონს, ყველა მშვილდის მომჭიმელნო, დაუშინეთ ისრები, ნუ დაინანებთ, რადგან შესცოდა მან უფალს.

¹⁵დასჭექეთ მის ირგვლივ! ხელები ჩამოსწყდა მას, დაიქცა მისი ბურჯები, დაირღვა მისი ზღუდე, რადგან უფლის შურისგებაა ეს; შური იძიეთ მასზე, როგორც იქცეოდა, ისე მოექეცით მას!

¹⁶მხვნელ-მთესველი მოსპეთ ბაბილონში და ნამგლის ამღები მკათათვეში. ყველამ თავის ერს მიაშუროს და ყველა თავის ქვეყანაში გაიქცეს ბასრი მახვილის შიშით.

¹⁷გაფანტული ცხვარია ისრაელი; ლომებმა დააფრთხეს ის. ჯერ აშურის მეფე ჭამდა მას, ბოლოს ბაბილონის მეფე ნაბუქოდონოსორმა დაუმტვრია ძვლები.

¹⁸ამიტომ ასე თქვა ცაბაოთ უფალმა, ისრაელის ღმერთმა: მე დავსჯი ბაბილონის მეფეს და მის ქვეყანას, როგორც დავსაჯე მეფე აშურისა.

¹⁹კვლავ დავაბრუნებ მე ისრაელს თავის საძოვრებზე და იბალახებს ქარმელზე და ბაშანზე, და ეფრემისა და გალაადის მთებზე გაძღება მისი სული.

²⁰იმ დღეებში და იმ დროს, — ამბობს უფალი, — ძებნას დაუწყებენ ისრაელის ურჯულოებას და აღარ იქნება იგი, და იუდეის ცოდვებს და ვერ იპოვნიან, რადგან მივუტევებ მათ, ვისაც ცოცხლად დავტოვებ.

²¹მერათაიმის ქვეყანას დაეცი და ფეკოდის მცხოვრებთ და ააოხრე და გაანადგურე ყველაფერი მათ შემდეგ, — ამბობს უფალი, — და გააკეთე ყოველივე ისე, როგორც მე გიბრძანე.

²²ბრძოლის კიჟინაა ქვეყანაში და დიდია ნგრევა.

²³როგორ გადატყდა და დაიმსხვრა ურო[25] მთელი ქვეყნისა! როგორ იქცა ბაბილონი ხალხთა შიშის დამცემი!

²⁴მახე დაგიგე და შეპყრობილი ხარ, ბაბილონო, შენ კი ვერც მიხვდი. მოგძებნეს და შეგიპყრეს კიდეც, რადგან უფალს აუჯანყდი.

²⁵გახსნა უფალმა თავისი საცავი და გამოიტანა თავისი რისხვის საჭურველი, რადგან უფალს, ცაბაოთ ღმერთს ანგარიში აქვს ქალდეველთა ქვეყანასთან.

²⁶შედით იქ ქვეყნის ყოველი კიდიდან, გახსენით მისი ბეღლები, გალეწეთ იგი ბზესავით და მოსრეთ სრულიად, რათა აღარ დარჩეს მისი ნატამალი.

²⁷მახვილს მიეცით მისი ხარები, ჩარეკეთ სასაკლაოზე! ვაი მათ, რადგან დადგა მათი დღე, ჟამი მათი განკითხვისა.

²⁸გაქცეულთა და ლტოლვილთა ხმაა ბაბილონის ქვეყნიდან, რათა სიონზე გამოაცხადონ უფლის, ჩვენი ღმერთის შურისგება მისი ტაძრის სანაცვლოდ.

²⁹მოუხმეთ ბაბილონის წინააღმდეგ მოისართ, ყველა მშვილდის მომჭიმელმა დაიბანაკოს მის ირგვლივ, რათა არ იყოს მისი ხსნა, მისი საქმისამებრ მიუზღეთ მას; როგორც იქცეოდა, ისე მოექეცით, რადგან გაუმედიდურდა უფალს, ისრაელის წმიდას.

³⁰ამიტომ მისი ჭაბუკნი მის მოედნებზე დაეცემიან და ყველა მისი მებრძოლი დაიღუპება იმ დღეს, — ამბობს უფალი.

³¹აჰა, მოვდივარ შენზე, გულზვიადო, — ამბობს უფალი, ცაბაოთ ღმერთი, — რადგან დადგა შენი დღე, ჟამი შენი განკითხვისა!

³²და წაიბორძიკებს გამედიდურებული და დაეცემა; არავინ იქნება მისი ამყენებელი; ცეცხლს მივცემ მის ქალაქებს და ის შეჭამს მის დაბა-სოფლებს.

³³ასე ამბობს ცაბაოთ უფალი: ემძლავრებიან ისრაელიანთ და იუდეის ძეთ; მოძალადეებს მაგრად უჭირავთ ისინი და არ უნდათ მათი გაშვება.

³⁴მაგრამ ძლიერია მათი გამომხსნელი, უფალი ცაბაოთია მისი სახელი, ის განიკითხავს მათ საქმეს, რათა შვებით ამოასუნთქოს ქვეყანას და ძრწოლა მოჰგვაროს ბაბილონის მკვიდრთ.

³⁵მახვილი ქალდეველებს, — ამბობს უფალი, — და ბაბილონის მცხოვრებთ, მის მთავრებს და მის ბრძენთ!

³⁶მახვილი მისნებს და შეიშლებიან ისინი; მახვილი მის მამაცებს და დაფრთხებიან ისინი;

³⁷მახვილი მის ცხენებს და მის ეტლებს და ყველა მის უცხოტომელს, რომლებიც იქ მწირობენ, და დადედლდებიან ისინი; მახვილი მის საგანძურებს და გაიძარცვებიან ისინი;

³⁸გვალვა მის წყლებს და დაშრებიან, რადგან კერპთა ქვეყანაა ის და შეიშლებიან ისინი კერპებისაგან!

³⁹ამიტომ დაიბუდებს იქ ველის ნადირი აფთრებთან ერთად, და დაიბუდებს იქ სირაქლემა. და აღარ დასახლდება ის აღარასოდეს და იქნება უკაცური თაობიდან თაობამდე.

⁴⁰როგორც ღვთისგან დაქცეული სოდომი და გომორაა და მათი ახლო ქალაქები, — ამბობს უფალი, — ასევე იქაც კაციშვილი არ იცხოვრებს და ადამის ძე არ დასახლდება მასში.

⁴¹აჰა, ხალხი მოდის ჩრდილოეთიდან, დიდი ხალხი, და მრავალი მეფეები აღდგებიან ქვეყნის კიდეებიდან.

⁴²მშვილდი და ლახვარი უჭირავთ ხელთ; სასტიკნი არიან და უწყალონი, მათი ხმა ზღვასავით გრგვინავს და ცხენებზე ამხედრებულან; როგორც ერთი, მზად არიან შენთან საომრად, ბაბილონის ასულო!

⁴³მოესმა ბაბილონის მეფეს მათი ამბავი და ხელები დაუძაბუნდა, ტკივილმა შეიპყრო, კრუნჩხვებმა დაუარეს მშობიარე ქალივით.

⁴⁴ლომივით წამოვიდა იგი იორდანეს შამბნარებიდან საძოვრებისაკენ; მე წამში გავაქცევ მათ იქიდან და ჩემს რჩეულს დავადგენ მასზე; რადგან ვინ არის ჩემი მსგავსი და ვინ დამიწესებს ჟამს? და რომელი მწყემსი დამიდგება წინ?

⁴⁵ამიტომ ისმინეთ უფლის განაჩენი, რაც ბაბილონს განუჩინა და მისი ზრახვები, რაც ქალდეველთა ქვეყნის წინააღმდეგ განიზრახა. ნახეთ, თუ არ დაიტაცონ კრავები ფარებიდან, თუ მათთან ერთად არ გააჩანაგოს მათი ფარეხები!

⁴⁶და შეზანზარდება დედამიწა, როცა ხმა გაისმება: ბაბილონი დაეცაო და კივილის ხმა გავარდება ხალხებში.