Read ქართული ბიბლია, სრული ვერსია Jeremiah 9 Bible Online

Jeremiah 9 - ქართული ბიბლია, სრული ვერსია bible

Jeremiah 9

¹ო, ნეტავ მომცა მოგზაურთა სადგური უდაბნოში! ვიტირებდი მე დღე და ღამე ჩემი ერის ასულის წყლულებზე!

²ო, ნეტავ, უდაბნოში მოგზაურთა თავშესაფარი მომცა! დავტოვებდი ჩემს ერს და გავშორდებოდი, რადგან ყველანი მრუშები არიან, მოღალატეთა ხროვა.

³მშვილდივით ჭიმავენ ენებს სიცრუისათვის, და სიმართლისათვის კი არ გამაგრდნენ ქვეყანაზე, არამედ ბოროტებიდან ბოროტებაზე გადადიან და არ მცნობენ მე, — ამბობს უფალი.

⁴მოერიდეთ თითოეული თავის მოყვასს და ნურც ერთ თქვენს ძმათაგანს ნუ ენდობით, რადგან ყოველი ძმა ფეხს უდებს მეორეს და ყოველი მოყვასი ცილისწამებას ავრცელებს.

⁵ყოველი თავის მოყვასს დასცინის და სიმართლეს არ ლაპარაკობენ; მიაჩვიეს ენა სიცრუეს, ქანცი გაუწყდათ თვალთმაქცობით.

⁶ვერაგობაში ცხოვრობ შენ! ვერაგნი არიან, ჩემი დანახვა არ სურთ, — ამბობს უფალი.

⁷ამიტომ ასე ამბობს ცაბაოთ უფალი: აჰა, მე გადავადნობ და გამოვცდი მათ, სხვაგვარად როგორ მოვიქცე ჩემი ერის ასულისთვის?

⁸მათი ენა — გამაპობელი ისარი, მზაკვრობით სავსეა მათი ბაგეები. პირით მშვიდობას ეუბნებიან მოყვასს, გულში კი მახეს უგებენ.

⁹როგორ არ დავსაჯო ისინი ამის გამო? — ამბობს უფალი, — ნუთუ ასეთ ხალხზე არ იძიებს შურს ჩემი სული?

¹⁰მთების გამო ავამაღლებ ტირილს და მოთქმას, და ველ-მინდვრების საძოვრების გამო, რადგან გადაბუგულია ისინი და აღარავინ დადის იქ, არ ისმის ნახირის ზმუილი; ცის ფრინველები გაფრინდნენ, მხეცები გადაიხვეწნენ.

¹¹და ვაქცევ იერუსალიმს ქვა-ღორღის გროვებად, ტურების ბუნაგად; და იუდას ქალაქებს გავაუდაბურებ, უკაცურს გავხდი.

¹²ვინ არის ისეთი ბრძენი, რომ ეს გაიგოს? და ვის მიმართავენ უფლის ბაგენი, რომელსაც შეუძლია ამცნოს, თუ რისთვის დაიღუპა ეს ქვეყანა და რისთვის გადაიხრუკა უდაბნოსავით, რომ აღარავინ ჭაჭანებს იქ?

¹³და ამბობს უფალი: ეს იმის გამოა, რომ მიატოვეს ჩემი რჯული, რომელიც მე მივეცი მათ და არ შეისმინეს ჩემი ხმა, და არ გაჰყვნენ მას,

¹⁴არამედ დადიოდნენ თავიანთი გულისთქმითა და ბაყალების კვალზე, როგორც მათმა მამებმა ასწავლეს მათ.

¹⁵ამიტომ ასე ამბოს ცაბაოთ უფალი, ისრაელის ღმერთი: მე შევაჭმევ ამ ერს აბზინდას, და შევასმევ გესლოვან წყალს;

¹⁶და გავფანტავ მათ ხალხებში, რომლებსაც არ იცნობდნენ არც ისინი და არც მათი მამები, და მახვილს მივაყოლებ უკან, ვიდრე არ ამოვწყვეტ მათ.

¹⁷ასე ამბობს ცაბაოთ უფალი: დაუკვირდით და მოუხმეთ მოზარე ქალებს, რომ მოვიდნენ, და გაგზავნეთ განთქმულ მოზარეებთან, რომ ისინიც მოვიდნენ.

¹⁸დროზე მოვიდნენ და ზარი თქვან ჩვენზე, რომ ჩვენს თვალთაგან ცრემლმა იდინოს და წამწამებიდან — წყალმა.

¹⁹მოთქმის ხმა ისმის სიონიდან: როგორ გავნადგურდით! როგორ მწარედ შევრცხვით, რომ მივატოვეთ ჩვენი ქვეყანა და დავაგდეთ ჩვენი სახლ-კარი!

²⁰აბა, ისმინეთ, ქალებო, უფლის სიტყვა! ყურად იღეთ სიტყვა მის ბაგეთა და ასწავლეთ თქვენს ასულთ მოთქმა და ერთმანეთს — გოდება;

²¹სიკვდილი მოგვადგა კარზე, შემოდის ჩვენს დარბაზებში, ბავშვებს ქუჩებში ცელავს და ჭაბუკებს — მოედნებზე.

²²და უთხარი მათ: ასე ამბობს-თქო უფალი: ადამიანთა გვამები მინდორზე ეყრება, როგორც ფუნა და, როგორც ხელეური მომკელის კვალზე და კაცი არ იქნება მათი ამკრეფი.

²³ასე ამბობს უფალი: ნუ იამაყებს ბრძენი თავისი სიბრძნით, და ნუ იამაყებს ძლიერი თავისი ძალით, და ნუ იამაყებს მდიდარი თავისი სიმდიდრით.

²⁴არამედ მან იამაყოს, ვინც იმით ამაყობს, რომ მე მიცნობს, რადგან მე, უფალი, ვიქმ წყალობას, სამართალსა და სიმართლეს ქვეყანაზე, რადგან ეს არის ჩემთვის სასურველი! — ამბობს უფალი. —

²⁵აჰა, დგება ჟამი, — ამბობს უფალი, — როცა დავსჯი მათ, ვისაც მხოლოდ ჩუჩა აქვს დაცვეთილი.

²⁶მე დავსჯი ეგვიპტესა და იუდას, ედომსა და ყამონელთ, მოაბსა და ყველა საფეთქელაპარსულს, რომლებიც უდაბნოში ცხოვრობენ. სხვა ხალხები წინადაუცვეთელნი არიან, ასევე ისრაელიანთა გულებიც წინადაუცვეთელია.