Read ქართული ბიბლია, სრული ვერსია Lamentations 3 Bible Online

Lamentations 3 - ქართული ბიბლია, სრული ვერსია bible

Lamentations 3

¹მე ვარ კაცი, მისი წყრომის კვერთხისაგან ჭირის მნახველი.

²ის წამიძღვა და მატარა ბნელში და არა ნათელში.

³მხოლოდ მე მიღერებს ხელს დღენიადაგ;

⁴გალია ჩემი ხორცი და ტყავი, ძვლები დამილეწა.

⁵შემომადგა და ტანჯვა-წამება შემომარტყა.

⁶ბნელში დამასახლა, როგორც საუკუნოდ მკვდარი.

⁷ზღუდე შემომავლო, რომ ვერ გამოვიდე, დაამძიმა ჩემი ბორკილები.

⁸კიდევაც რომ ვიღაღადო და მოვუხმო მშველელს, ის ჩაახშობს ჩემს ვედრებას.

⁹თლილი ქვით გადამიღობა გზები, დამიხლართა ბილიკები.

¹⁰დათვივით მიმზერს საფარიდან, ლომივით ჩამისაფრდა.

¹¹გააუკუღმართა ჩემი გზები და დამფლითა, არარაობად მაქცია.

¹²მშვილდი მოჭიმა და ისრის სამიზნედ დამსვა.

¹³თირკმელებში გამიტარა გესლი[2] თავისი კაპარჭისა.

¹⁴მთელი ჩემი ხალხის დასაცინი გავხდი, ყოველდღიური საშაირო,

¹⁵სიმწარით გამაძღო, ნაღვლით დამათრო.

¹⁶ქვით ჩამიფხვნა კბილები, ნაცარი მაჭამა.

¹⁷მშვიდობა გაშორდა ჩემს სულს, დამავიწყდა კეთილდღეობა.

¹⁸და ვთქვი: წახდა ჩემი ძალა და იმედი უფლისგან.

¹⁹გაიხსენე, უფალო, ჩემი უბედურება და ტანჯვა და სიმწარე.

²⁰კარგად ახსოვს ეს ჩემს სულს და მიღონდება სული.

²¹ამას ვპასუხობ ჩემს გულს, ამის გამო ვესავ მას:

²²უფლის მადლით არ გავქრით, რადგან მისი გულმოწყალება არ დასრულებულა.

²³განახლდებიან ისინი ყოველ დილით, დიდია შენი ერთგულება.

²⁴ჩემი ხვედრია უფალი, — ამბობს ჩემი სული, — ამიტომაც ვესავ მას.

²⁵კეთილია უფალი მისი მოსავისთვის, მისი მაძიებელი სულისათვის.

²⁶სიკეთე მას, ვინც მოთმინებით ელოდება უფლისგან ხსნას.

²⁷სიკეთე კაცს, რომელმაც ზიდა თავისი უღელი სიყმაწვილეში;

²⁸რომელიც განმარტოებით ზის და დუმს, რადგან უფალმა დაადგა მას იგი.

²⁹მიწას ეხება ბაგეებით ამ ფიქრით: იქნებ კიდევ არისო იმედი.

³⁰ლოყა მიუშვიროს თავის მცემელს, გაძღეს საყვედურებით.

³¹რადგან არ მიატოვებს უფალი სამუდამოდ.

³²რადგან, თუ დაამწუხრებს, შეიბრალებს კიდეც თავისი დიდი მოწყალებით.

³³რადგან არა თავისი ნებით აყენებს ის ტანჯვას და ამწუხრებს ადამიანის ძეთ,

³⁴რომ გათელოს თავის ფეხქვეშ ქვეყნის ყველა პყრობილი,

³⁵რომ გაამრუდოს კაცის სამართალი უზენაესის წინაშე,

³⁶რომ გააბათილოს ადამიანი მის საქმეში — არ ხედავს ამას უფალი?

³⁷ვინ არის, რომ თქვა და შესრულდა, განა უფალს არ უბრძანებია?

³⁸განა უზენაესის ბაგეებიდან არ გამოდის უბედურებაცა და სიკეთეც?

³⁹რატომ ჩივის ცოცხალი ადამიანი თავისი ცოდვების სასჯელის გამო?

⁴⁰მოვიძიოთ ჩვენი გზები და გამოვიძიოთ და მივუბრუნდეთ უფალს.

⁴¹ხელით ავწიოთ ჩვენი გულები ღმერთისაკენ ზეცაში.

⁴²ჩვენ შეგცოდეთ და გეურჩებოდით, შენ ეს არ გვაპატიე.

⁴³შენ შეიმოსე რისხვით და გვდევნე, გვხოცავდი და არ გვიბრალებდი.

⁴⁴შენ ქუფრ ღრუბლებში, გაეხვიე, რათა არ მოეღწია შენამდე ჩვენს ლოცვას.

⁴⁵ნაგვად და სისაძაგლედ გვაქციე ხალხებს შორის.

⁴⁶პირი დააღო ჩვენზე ყველა ჩვენმა მტერმა.

⁴⁷შიში და ორმო[3] წილად გვხვდა, ნგრევა და შემუსვრა.

⁴⁸ნაკადულებად მდის ცრემლები ჩემი ერის ასულის დაღუპვის გამო.

⁴⁹თვალთაგან ცრემლი მდის უწყვეტ ნაკადად,

⁵⁰ვიდრე გადმოხედავდეს უფალი ზეციდან და დაინახავდეს.

⁵¹სულს მიმწუხრებს ჩემი თვალი ჩემი ქალაქის ყველა ასულის გამო.

⁵²გაძლიერდნენ ჩემი მტრები, რათა უცოდველი ჩიტივით მომინადირონ.

⁵³მღვიმეში ჩაკლეს ჩემი სიცოცხლე და ქვით ჩამქოლეს.

⁵⁴თავზე გადამიარეს წყლებმა და ვთქვი: დავიღუპე-მეთქი.

⁵⁵ქვესკნელიდან ვუხმობდი შენს სახელს, უფალო.

⁵⁶შენ გესმოდა ჩემი ხმა; ნუ დაიმძიმებ ყურებს ჩემი სულთქმის მოსასმენად, ჩემი ღაღადების გასაგონად.

⁵⁷შენ მიახლოვდებოდი იმ დღეს, როდესაც მოგიხმობდი და მანუგეშებდი: ნუ გეშინისო.

⁵⁸შენ იცავდი, უფალო, ჩემი სულის საქმეს; შენ იხსენი ჩემი სიცოცხლე.

⁵⁹შენ ხედავ, უფალო, როგორ უსამართლოდ მექცევიან, განსაჯე ჩემი საქმე.

⁶⁰შენ ხედავ მთელ მათ შურისგებას, მათ ზრახვებს ჩემს მიმართ.

⁶¹შენ გესმის, უფალო, როგორ მაგინებენ, რას განიზრახავენ ჩემს წინააღმდეგ,

⁶²რას ამბობენ ჩემს მომხდურთა ბაგენი, რა ხრიკებს აწყობენ ჩემს წინააღმდეგ დღენიადაგ.

⁶³შეხედე, სხედან თუ დგანან, მე დამცინიან თავიანთი სიმღერებით.

⁶⁴მიაგე მისაგებელი მათი, უფალო, მათი ხელმრუდობისთვის.

⁶⁵დაუბნელე მათ გული, შენი წყევლა იყოს მათზე.

⁶⁶დევნე ისინი რისხვით და გაანადგურე უფლის ცის ქვეშ.