Read ქართული ბიბლია, სრული ვერსია Ezekiel 1 Bible Online

Ezekiel 1 - ქართული ბიბლია, სრული ვერსია bible

Ezekiel 1

¹როცა ოცდამეათე წელს, მეოთხე თვის მეხუთე დღეს მე დევნილთა შორის ვიყავი მდინარე ქებარის პირას, ცა გაიხსნა და ვიხილე ღვთიური ხილვები.

²თვის მეხუთე დღეს (ეს იყო მეფე იეჰოიაქინის ტყვეობის მეხუთე წელს),

³გამოეცხადა უფლის სიტყვა ეზეკიელს, ბუზის ძეს, მღვდელს, ქალდეველთა ქვეყანაში, მდინარე ქებარის პირას; და იყო იქ მასზე უფლის ხელი.

⁴და მე ვიხილე: აჰა, მოდის მძვინვარე ქარი ჩრდილოეთიდან, ძლიერი ღრუბლები და ელვარე ცეცხლი და ციალი მის ირგვლივ, მის შუაში კი რაღაც კაშკაშა ლითონივით, ცეცხლის გულიდან ამომავალი.

⁵და მის შიგნით ჩანდა ოთხი ცხოველი, რომელთაც ადამიანის მსგავსი სახე ჰქონდათ.

⁶თითოეულ მათგანს ოთხ-ოთხი სახე და ოთხ-ოთხი ფრთა ჰქონდა.

⁷სწორი ფეხები ჰქონდათ და ტერფები ხბოს ჩლიქებივით, და ტანი ბრინჯაოსავით უელავდათ;

⁸და ადამიანის ხელები მოუჩანდათ ფრთებქვეშ, ოთხივე მხარეს. ოთხივეს ჰქონდა სახე და ფრთები.

⁹ერთმანეთს ეხებოდა მათი ფრთები, არ ტრიალდებოდნენ სიარულისას, თითოეული თავისი სახის მიმართულებით მიდიოდა.

¹⁰შესახედაობა მათი სახისა კი ასეთი იყო: სახე ადამიანისა და სახე ლომისა ოთხივეს მარჯვენა მხარეს ჰქონდა; ხარის სახე ოთხ მათგანს მარცხენა მხარეს და ორბის სახე ოთხივე მათგანს;

¹¹ოთხივეს სახე და ფრთები ზემოთკენ ჰქონდათ მიმართული; ორ-ორი ფრთა ერთმანეთზე ჰქონდათ გადაჭდობილი, ორ-ორი ფრთით ტანს იფარავდნენ.

¹²თითოეული თავისი სახის მიმართულებით მიდიოდა იქით, საითაც სულს მიჰყავდა, იქით მიდიოდნენ, არ ტრიალებდნენ სიარულისას.

¹³შესახედაობა ამ ცხოველებისა გაღვივებული ნაკვერცხლების მსგავსი იყო; რაღაც ალივით მიმოდიოდა ცხოველებს შორის; ნათება იყო ცეცხლის ირგვლივ და ელვა გამოდიოდა ცეცხლიდან.

¹⁴ეს ცხოველები იქით-აქეთ აწყდებოდნენ, ელვის მსგავსად.

¹⁵ვუყურებდი ამ ცხოველებს და, აჰა, თითო ბორბალი იყო მიწაზე ცხოველთა გვერდით, ოთხივე მხარეს.

¹⁶შესახედაობა ამ ბორბლებისა და მათი ნაკეთობა მსგავსი იყო ქრიზოლითისა. ერთნაირი იყო ოთხივე და ისე იყო ნაკეთები, თითქოს ბორბალი ბორბალში ჩაუსვამთო.

¹⁷როცა მოძრაობდნენ, ოთხივე მხარეს მიდიოდნენ, სვლისას არ უხვევდნენ.

¹⁸და მათი ბორბლების ფერსოები გრძელი და საშინელი იყო. და მათი ოთხივე ბორბლის ფერსოები გარშემო სავსე იყო თვალებით.

¹⁹და როდესაც ეს ცხოველები მოძრაობდნენ, ბორბლებიც თან მიჰყვებოდნენ, და როდესაც მიწიდან აიწევდნენ, ბორბლებიც იწეოდნენ მაღლა.

²⁰საითაც გაიწევდა სული წასასვლელად, იქით მიდიოდნენ, საითაც არ უნდა გაეწია წასასვლელად, ბორბლებიც მოძრაობდნენ მათ კვალობაზე, რადგან ცოცხალ არსებათა სული ედგათ ბორბლებს.

²¹მათი სვლისას ისინიც მიდიოდნენ და გაჩერებისას ისინიც ჩერდებოდნენ. მათი აწევით ბორბლებიც იწეოდნენ მიწიდან მათ კვალობაზე, რადგან ცოცხალ არსებათა სული ედგათ ბორბლებს.

²²ცხოველთა თავს ზემოთ თითქოს ბროლის გასაოცარი თაღი იყო გადაჭიმული.

²³თაღს ქვემოთ მათი გაშლილი ფრთები ერთმანეთს უსწორდებოდა. თითოეულს ორ-ორი ფრთა უფარავდა სხეულს ერთ მხარეს და მეორე მხარეს.

²⁴და მესმოდა მათი მოძრაობისას მათი ფრთების შრიალი, როგორც ხმა მრავალი წყლისა, როგორც ხმა ყოვლადძლიერისა, როგორც ხმა ამბოხისა, როგორც ხმა საბრძოლო ბანაკისა; როცა ჩერდებოდნენ, ფრთებს ჩამოყრიდნენ ხოლმე.

²⁵და ხმა გადმოდიოდა თაღიდან, რომელიც მათ თავს ზემოთ იყო გადაჭიმული. როცა ჩერდებოდნენ, ფრთებს ჩამოყრიდნენ ხოლმე.

²⁶თაღს ზემოთ, მათ თავზე რომ იყო გადაჭიმული, რაღაც ტახტის მაგვარი იდგა, მსგავსი საფირონის ქვისა, და ამ ტახტზე ადამიანის მსგავსი რამ იჯდა.

²⁷და მე ვიხილე რაღაც გავარვარებული ლითონივით, ცეცხლის მაგვარი მის შიგნით და მის ირგვლივ, მის წელს ზემოთ; და მის წელს ქვემოთ და ირგვლივ ვიხილე რაღაც ცეცხლი და ციალი იყო მის ირგვლივ.

²⁸როგორც ცისარტყელა ჩანს წვიმიან ღრუბლებში, ისეთი იყო ის ციალი. უფლის დიდების მსგავსი იყო ეს ხილვა. და როცა ვიხილე, პირქვე დავემხე და მომესმა ხმა მეტყველისა.