Read ქართული ბიბლია, სრული ვერსია Ezekiel 12 Bible Online

Ezekiel 12 - ქართული ბიბლია, სრული ვერსია bible

Ezekiel 12

¹და იყო სიტყვა უფლისა ჩემდამი თქმული:

²ადამის ძევ! მეამბოხეთა სახლში ცხოვრობ შენ, რომელთაც თვალები აქვთ დასანახავად და ვერ ხედავენ, ყურები აქვთ მოსასმენად და არ ესმით, რადგან მეამბოხენი არიან ისინი.

³და შენ, ადამის ძევ, გაიმზადე ხიზნის ბარგი და დღისით-მზისით გადი მათ თვალწინ ხიზნად, და გადასახლდი შენი ადგილიდან სხვა ადგილას მათ თვალწინ, იქნებ გონს მოეგონ, თუმცა მეამბოხეთა სახლია ის.

⁴და გამოიტანე შენი ბარგი, როგორც ბარგი ხიზნისა დღისით, მათ თვალწინ, და გადი საღამოთი მათ თვალწინ, როგორც გადიან გადასასახლებად.

⁵მათ თვალწინ გაანგრიე კედელი და იქიდან გაიტანე შენი ბარგი.

⁶მათ თვალწინ მოიკიდე ზურგზე შენი ტვირთი და სიბნელეში გაიტანე; სახე დაიფარე, რომ არ დაინახო მიწა; რადგან ნიშნად მივეცი შენი თავი ისრაელის სახლს.

⁷და გავაკეთე ისე, როგორც მებრძანა: ჩემი ბარგი, როგორც საჭირო ნივთები გადასახლებაში მიმავლისა, გავიტანე დღისით, საღამოთი კი ხელით გავანგრიე კედელი, ბნელეში გავიტანე ბარგი და ზურგზე მოვიკიდე მათ თვალწინ.

⁸და იყო სიტყვა უფლისა ჩემს მიმართ დილით:

⁹ადამის ძევ! განა არ გკითხა ისრაელის სახლმა, მეამბოხეთა სახლმა, რას აკეთებო?

¹⁰უთხარი მათ: ასე ამბობს-თქო უფალი ღმერთი: ეს განაჩენი ეხება იერუსალიმის მთავარს და მთელ ისრაელის სახლს, ყველას, ვინც იქ არის.

¹¹უთხარი მათ: მე ნიშანი ვარ-თქო თქვენთვის. რასაც მე ვაკეთებ, იგივე გადახდება იერუსალიმელთ, — ხიზნად და ტყვეებად მოუწევთ წასვლა.

¹²და მთავარი, რომელიც მათ შორისაა, ზურგზე მოიკიდებს ტვირთს სიბნელეში და გავა. კედელს გამოუთხრიან წინ, რათა გაიყვანონ იქიდან. სახეს დაიფარავს, რათა აღარ იხილოს თვალით ეს ქვეყანა.

¹³და მოვისვრი მასზე ჩემს ბადეს და გაებმება ჩემს სათხეველში; და მოვიყვან მას ბაბილონში, ქალდეველთა ქვეყანაში, მაგრამ ვეღარ იხილავს მას, და იქ მოკვდება[2].

¹⁴და ყველას, ვინც მის ირგვლივ არიან, მის შემწეებს და მთელ მის ლაშქარს, გავფანტავ ყველა ქარის მიმართულებით, და მახვილს ვიშიშვლებ მათ კვალზე.

¹⁵და მიხვდებიან, რომ მე ვარ უფალი, როცა გავაბნევ მათ ხალხებში და ქვეყნებში მიმოვფანტავ.

¹⁶და მათგან მცირეოდენთ დავიფარავ მახვილის, შიმშილისა და შავი ჭირისაგან, რათა მოუთხრონ მთელი თავიანთი სისაძაგლე წარმართებს, რომლებთანაც მივლენ. და მიხვდებიან, რომ მე ვარ უფალი.

¹⁷და იყო სიტყვა უფლისა ჩემს მიმართ ნათქვამი:

¹⁸ადამის ძევ! შენი პური ტკივილით ჭამე და შენი წყალი ჭირითა და ტანჯვით სვი.

¹⁹და უთხარი ამ ქვეყნის ხალხს: ასე ამბობს-თქო უფალი ღმერთი იერუსალიმისა და ისრაელის ქვეყნის მკვიდრებზე: თავის პურს ტკივილით შეჭამენ და თავის წყალს ჭირითა და ტანჯვით შესვამენ, რადგან დაცარიელდება მათი ქვეყანა მისი სისავსისაგან მის მცხოვრებთა ძალადობის გამო.

²⁰დასახლებული ქალაქები დაინგრევა და გაუდაბურდება ქვეყანა; და მიხვდებით, რომ მე ვარ უფალი.

²¹და იყო სიტყვა უფლისა ჩემს მიმართ ნათქვამი:

²²ადამის ძევ! ეს რა ანდაზა გაქვთ თქვენ ისრაელის მიწაზე ნათქვამი: ჟამი გაივლის და ყოველი ხილვა გაქარწყლდებაო?

²³ამიტომ უთხარი მათ: ასე ამბობს-თქო უფალი ღმერთი: გავაუქმებ მე ამ ანდაზას და აღარ იტყვიან მას ისრაელში. უთხარი მათ: ახლოსაა-თქო ჟამი, და აღსრულება ყოველი ხილვისა.

²⁴რადგან აღარ იქნება არავითარი ცრუ ხილვა და მაცდუნებელი მისნობა ისრაელის სახლში.

²⁵რადგან მე ვარ უფალი, და რასაც მე ვლაპარაკობ, ის მოხდება და აღარ გადაიდება, რადგან თქვენს დღეებში, მეამბოხეთა სახლო, ვიტყვი სიტყვას და ავახდენ მას! — ამბობს უფალი ღმერთი.

²⁶და იყო სიტყვა უფლისა ჩემს მიმართ ნათქვამი:

²⁷ადამის ძევ! აჰა, ისრაელის სახლი ამბობს: ის წინასწარმეტყველური ხილვა, რომელიც მან იხილა, აღსრულდება მრავალი დღეების შემდეგ, და ის წინასწარმეტყველებს შორეულ დღეებზე.

²⁸ამიტომ უთხარი მათ: ასე ამბობს-თქო უფალი ღმერთი: აღარ გადაიდება არც ერთი ჩემი სიტყვა, რადგან სიტყვა, რომელსაც მე ვიტყვი, შესრულდება! — ამბობს უფალი ღმერთი.