Read ქართული ბიბლია, სრული ვერსია Ezekiel 13 Bible Online

Ezekiel 13 - ქართული ბიბლია, სრული ვერსია bible

Ezekiel 13

¹და იყო სიტყვა უფლისა ჩემდამი თქმული:

²ადამის ძევ! იწინასწარმეტყველე ისრაელის წინასწარმეტყველთა მიმართ და უთხარი თავიანთი გულიდან მოწინასწარმეტყველთ: ისმინეთ-თქო სიტყვა უფლისა.

³ასე ამბობს-თქო უფალი ღმერთი: ვაი, უგუნურ წინასწარმეტყველთ, რომელნიც თავიანთ სულს მიჰყვებიან და არაფერი უხილავთ.

⁴წინასწარმეტყველნი შენნი, ისრაელ, როგორც ტურები უდაბურ ნანგრევებში!

⁵თქვენ არ გადიხართ განგრეულ კედელში და ზღუდეს არ ავლებთ ისრაელის სახლს, რათა მტკიცედ დადგეს ბრძოლაში უფლის დღეს.

⁶ამაოა მათი ხილვები და სიცრუეა მათი მისნობა და მათი ნათქვამი: უფალმა ბრძანაო. უფალს არ გამოუგზავნია ისინი; მათ კი იმედი აქვთ, რომ უფალი აღასრულებს მათ სიტყვას.

⁷განა ამაო ხილვა არ იხილეთ და სიცრუეს არ მისნობდით, რომ ამბობდით: უფლის სიტყვა არისო! მე კი არაფერი მითქვამს.

⁸ამიტომ ასე ამბობს უფალი ღმერთი: რადგან თქვენი სიტყვები სიცრუეა და მისნობა თქვენი ამაო, ამიტომ იცოდეთ, რომ თქვენს წინააღმდეგ ვარ, — ამბობს უფალი ღმერთი.

⁹და მისწვდება ჩემი ხელი წინასწარმეტყველთ, რომელთაც ამაო ხილვები აქვთ და სიცრუეს მისნობენ; ჩემი ერის საფიხვნოში ვერ დასხდებიან ისინი და ისრაელის სახლის წიგნში ვერ ჩაიწერებიან და ისრაელის მიწაზე ვერ მოვლენ. და მიხვდებით, რომ მე ვარ უფალი ღმერთი.

¹⁰იმის გამო, რომ ჩემს ერს აცდუნებენ და ეუბნებიან: მშვიდობა არისო, მაგრამ არ არის მშვიდობა. ჩემი ხალხი აშენებს კედელს, ისინი კი ტალახით აბათქაშებენ.

¹¹უთხარი ტალახით გამბათქაშებლებს: ჩამოწვება-თქო თქვენი კედელი. დაუშვებს კოკისპირული წვიმა, წამოვა კოხივით სეტყვა და ამოვარდება ქარიშხალი.

¹²და, აჰა, ჩამოწვება კედელი და ხომ გეტყვიან, სად არისო ის ბათქაში, რომლითაც შელესეთ?

¹³ამიტომ ასე ამბობს უფალი ღმერთი: განრისხებული ამოვაგდებ ქარიშხალს და წამოვა კოკისპირული წვიმა ჩემი გულისწყრომით; გაცეცხლებული დავუშვებ კოხივით სეტყვას შესამუსრად.

¹⁴და მე დავანგრევ იმ კედელს, რომელიც თქვენ გააბათქაშეთ ტალახით, და დავცემ მიწაზე და გამოჩნდება მისი საძირკველი. ჩამოწვება და დაიღუპებით მის ნანგრევებში და მიხვდებით, რომ მე ვარ უფალი.

¹⁵და დავასრულებ ჩემს რისხვას იმ კედელზე და ტალახის ბათქაშით მის გამბათქაშებლებზე, და გეტყვით: აღარ არის კედელი და აღარ არიან მისი გამბათქაშებელნი;

¹⁶ისრაელის წინასწარმეტყველნი, რომელნიც უწინასწარმეტყველებდნენ იერუსალიმს და აღუთქვამდნენ მშვიდობის ხილვას, მშვიდობა კი არ არის! — ამბობს უფალი ღმერთი.

¹⁷და შენ, ადამის ძევ! პირი ქენი შენი ერის ასულებისაკენ, რომელნიც წინასწარმეტყველებენ საკუთარი გულით, და იწინასწარმეტყველე მათზე.

¹⁸უთხარი: ასე ამბობს-თქო უფალი ღმერთი: ვაი, იმ ქალებს, რომლებიც სულების მოსანადირებლად სამისნო ტომსიკებს იკერავენ საიდაყვეებად და მათ, რომლებიც თავსაბურავებს ამზადებენ ყოველი სიმაღლის ადამიანისთვის. ნუთუ გგონიათ, რომ ჩემი ერის სულების მონადირებით თქვენს სულებს გადაარჩენთ?

¹⁹და სახელს მიტეხავთ მე ჩემი ხალხის თვალში ერთი მუჭა ქერისა და პურის ნატეხისათვის, როცა ხოცავთ სულებს, რომლებიც არ არიან დასახოცი და ცოცხლად ტოვებთ სულებს, რომლებიც არ არიან სასიცოცხლო, რომ ატყუებთ ჩემს ერს, სიცრუის დამჯერებელს.

²⁰ამიტომ ასე ამბობს უფალი ღმერთი: აჰა, აღვდგები თქვენი სამისნო ტომსიკების წინააღმდეგ, რომლებითაც სულებს იჭერთ. მე დაგაგლეჯთ მკლავებზე იმ ტომსიკებს და იმ სულებს, რომლებიც თქვენ დაიჭირეთ, გავათავისუფლებ.

²¹და დავფხრეწ თქვენს თავსაბურავებს და ვიხსნი ჩემს ერს თქვენი ხელიდან, და აღარ იქნებიან ისინი თქვენი ნანადირევი. და მიხვდებით, რომ მე ვარ უფალი.

²²რადგან მართლის გულს სიცრუით ამწუხრებდით, მე კი არ დამიმწუხრებია იგი; და ბიწიერს ხელებს უმაგრებდით, რომ არ მობრუნებულიყო ბოროტი გზიდან თავისი სიცოცხლის შესანარჩუნებლად.

²³ამიტომ ამაო ხილვებს აღარ იხილავთ და მისნობით აღარ იმისნებთ. და მე ვიხსნი ჩემს ერს თქვენი ხელიდან და მიხვდებით, რომ მე ვარ უფალი.